| 章节 | 现代台语2021版汉字经文 | 注释 |
| 1:1 | 上帝的创造起头，上帝创造天及地。 | |
| 1:2 | 地是浑沌，犹未成形；深渊的顶面乌乌暗暗；上帝的神运行伫水面。 | |
| 1:3 | 上帝讲「着有光」，就有光。 | |
| 1:4 | 上帝看光是好；上帝将光及暗分开。 | |
| 1:5 | 上帝叫光做日时，叫暗做暝时。有下昏有早起，是头一日。 | |
| 1:6 | 上帝讲：「诸个水的中间着有穹苍，将水顶下隔开。」 | |
| 1:7 | 上帝就造穹苍，将穹苍下面的水及穹苍顶面的水分开；代志就按呢完成。 | |
| 1:8 | 上帝叫穹苍做天。有下昏有早起，是第二日。 | |
| 1:9 | 上帝讲：「天下面诸个水着集中伫一所在，互焦地出现。」代志就按呢完成。 | |
| 1:10 | 上帝叫焦地做地，叫集中的水做海；上帝看这做好。 | |
| 1:11 | 上帝讲：「地着有植物：会结籽的菜蔬，及会结果子内面有籽的树；各照𪜶的种类。」代志就按呢完成。 | |
| 1:12 | 地就照种类生出植物，就是会结籽的菜蔬，及有种籽的果子树；上帝看这做好。 | |
| 1:13 | 有下昏有早起，是第三日。 | |
| 1:14 | 上帝讲：「天顶的穹苍着有光体，来分别日及暝，嘛做季节、日、年的记号， | |
| 1:15 | 阁伫穹苍发光照地面。」代志就按呢完成。 | |
| 1:16 | 上帝就造两个大的光体，大的管日时，细的管暝时；嘛造星辰。 | |
| 1:17 | 上帝将𪜶下伫天顶的穹苍，互𪜶照地面， | |
| 1:18 | 嘛管日及暝，分别光及暗；上帝看这做好。 | |
| 1:19 | 有下昏有早起，是第四日。 | |
| 1:20 | 上帝讲：「水内着生湠真多生物；地的顶面、天里的穹苍着有鸟仔啲飞。」 | |
| 1:21 | 上帝就创造海里的大鱼，及水内生湠真多的生物，各照𪜶的种类；阁创造逐款飞鸟，各照𪜶的种类；上帝看这做好。 | |
| 1:22 | 上帝赐福𪜶，讲：「着生湠，着加添，互海里充满生物，互地上的鸟仔生湠真多。」 | |
| 1:23 | 有下昏有早起，是第五日。 | |
| 1:24 | 上帝讲：「地着生出生物，各照𪜶的种类；有牲生、啲爬的动物、走兽，各照𪜶的种类。」代志就按呢完成。 | |
| 1:25 | 上帝就照𪜶的种类造地上的走兽、牲生，及一切啲爬的动物；上帝看这做好。 | |
| 1:26 | 上帝讲：「咱着照咱的形像，照咱的款式造人，互𪜶管理海里的鱼、天里的鸟、地上的牲生及野兽，以及伫地上啲爬的动物。」 | |
| 1:27 | 上帝就照伊家己的形像创造人；伊照伊的形像创造𪜶，有男有女。 | |
| 1:28 | 上帝赐福𪜶，对𪜶讲：「着生湠，加添真多，充满全地，阁治理全地，嘛着管理海里的鱼、天里的鸟，及地上所有会振动的生物。」 | |
| 1:29 | 上帝阁讲：「我将全地所有会结籽的菜蔬，及一切有种籽的果子树，拢互恁做食物。 | |
| 1:30 | 地上逐种的走兽、空中一切的鸟仔，及伫地上所有啲爬的活物，我将青色的菜蔬互𪜶做食物。」代志就按呢完成。 | |
| 1:31 | 上帝看伊所造的一切真好。有下昏有早起，是第六日。 |