Chit段经文特别提起全以色列境内ê祭司kah利未人lóng迁徙到南国ê犹大，原因是北国以色列ê耶罗波安不准in继续担任祭司ê工作。这mā看出kui个北国以色列人民离开上帝ê道jú来jú远。

	Koh讲，chit段经文mā kā罗波安ê家族留落来简略记录。

第13到15节，chit三节ē-sái讲是非常重要ê资料，mā thang看出耶罗波安一上任，就想掌握宗教信仰团体，因为伊无想beh照摩西律法ê规定，hō͘利未人继续带领祭祀礼仪ê工作，却是kā in lóng废除。因为án-ne，全以色列ê祭司kah利未人lóng离开北国以色列，南迁到犹大。同时，in mā丧失原本tī北国tī约书亚时代分配到ê khiā起城市。Koh khah惨ê是，耶罗波安甚至指派家己ê人当祭司，带领人民去「拜山羊魔神kah家己铸造ê金牛」，这明明是就是公然侮辱上帝。耶罗波安ê作为，thang看出以色列人民tī信仰上已经堕落真厉害了，并无因为所罗门建造耶路撒冷圣殿而tī信仰上ê态度koh khah坚定。对照列王记上第十二章25到31节，就thang明白为甚么耶罗波安就是为tio̍h beh阻止北国人民继续无停地前往南国犹大耶路撒冷去献祭敬拜上帝，特别铸造金牛排tī伯特利kah siōng北pêng ê「但」，并且kā北国以色列人民讲，hit-ê金牛是带领in离开埃及ê神，ài in拜金牛偶像当做神明，引chhōa人民弃sak上帝。伊差不多就是重蹈以色列人民祖先tī旷野漂流时代所犯ê重大错误（参考出埃及记第三十二章）。

第16到17节，chit两节说明相对tī北国以色列耶罗波安ê南国犹大罗波安，伊m̄-nā接纳利未人kah祭司进入耶路撒冷á是犹大、便雅悯等宗族去协助献祭敬拜ê工作，tī北国以色列有真chē人民mā lóng跟tòe前往耶路撒冷去献祭，因为he是in认为敬拜上帝ê中心殿宇，mā因为án-ne，in对罗波安ê向心力就jú强。In拥护罗波安ê政策，hō͘伊执政lóng非常顺利，ná亲像in老父所罗门时代仝款。

第18到23节，chit段经文thang讲简略地讲述罗波安ê家族，伊分别娶大卫ê孙女，以及押沙龙ê cha-bó͘-kiáⁿ，共计妻细姨chē kah七十八个以及八十八个kiáⁿ，伊mā分派ê kiáⁿ分别tī伊统治下ê犹大kah便雅悯区内ê设防城市，为tio̍h是beh防范北国以色列á是其他外族人入侵，伊hō͘家己ê kiáⁿ负起防卫ê责任，而且供给in所需要ê一切。