撒母耳記下 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
6:1 帶約櫃來到耶路撒冷
(代上13：1-14；15：25-16：6, 43)
大衛koh聚集以色列中所揀ê三萬人。
6:2 大衛出發chhōa tòe伊ê人民，tùi巴拉偤大去，beh tùi hia扛上主ê櫃來；chitê櫃ê名，是用坐tī兩 个ki-lō͘-peng ê中間ê萬軍ê上主ê名來稱呼ê。
6:3 In kā上主ê櫃hē tī新ê車，tùi山頂亞比拿達ê家載出來；亞比拿達兩 个kiáⁿ，烏撒kah亞希約，趕hit台新車。
6:4 In kā伊kah上主ê約櫃，tùi山頂亞比拿達ê家載出來，亞希約行tī櫃ê頭前。
6:5 大衛kah以色列ê全家，tī上主ê面前用松柴所造ta̍k種ê樂器kah琴瑟、lin-long鼓kah大鼓、鈸，來奏樂跳舞。
6:6 In到Ná-kùn ê稻埕，烏撒伸手扶上主ê約櫃，因為約櫃hō͘牛腳踢tio̍h。
6:7 上主對烏撒受氣，上主tī hia因為伊ê錯誤來kā伊phah，伊to̍h死tī hia，tī上主ê櫃邊。
6:8 因為上主忽然phah死烏撒，大衛無歡喜，就稱hit所在叫做Pe-le-chuh-u-chà（註：希伯來文ê音讀，意思是「處罰烏撒」），到今á日。
6:9 當hit日，大衛驚上主，講：「上主ê櫃ná thang來到我ê所在。」
6:10 就ánne，大衛m̄肯kā上主ê櫃扛入去大衛ê城，去到kakī ê所在，大衛to̍h kā它扛oat入去迦特人俄別以東ê家。
6:11 上主ê櫃tiàm tī迦特人俄別以東ê厝三月日，上主賜福氣hō͘俄別以東kah伊ê全家。
6:12 有人kā大衛王講：「上主因為上主ê櫃，賜福tī俄別以東ê家kah見若屬tī伊ê。」大衛to̍h去，歡喜扛上主ê櫃tùi俄別以東ê厝，來到大衛ê城。
6:13 扛上主約櫃ê人行六步，大衛to̍h獻一隻牛kah一隻肥ê chengseⁿ做祭祀。
6:14 大衛tī上主ê面前盡力跳舞，大衛縖幼苧布ê祭司服。
6:15 Án-ne，大衛kah以色列全家扛上主ê櫃來，出歡喜ê聲，pûn哨角。
6:16 上主ê櫃入去大衛城ê時，掃羅ê chabó͘ kiáⁿ米甲 tùi窗á門teh看，看tio̍h大衛chông起來tī上主ê面前跳舞，心to̍h看輕伊。
6:17 In扛上主ê櫃入去，hē tī它ê所在，to̍h是大衛為它搭ê布棚，大衛tī上主ê面前獻燒祭kah謝恩祭。
6:18 大衛獻燒祭kah謝恩祭了後，to̍h用萬軍上主ê名kā人民祝福。
6:19 Koh tī hiahê眾人，to̍h是以色列人民，無論男女，每人分hō͘ in一塊餅、一塊肉kah一塊葡萄干餅；眾人to̍h離開，ta̍k人tńg去in kakī ê厝。
6:20 大衛tńg去beh kā伊ê家眷祝福，掃羅ê chabó͘ kiáⁿ米甲出來迎接大衛，講：「以色列王今á日有gōa大ê榮光！今á日露體tī人臣ê女婢目chiu 前，親像一个無hē落ê人無驚見笑露體。」
6:21 大衛kā米甲講：「這是tī上主ê面前，祂揀我pôaⁿ過你ê老父kah伊ê全家，設立我做上主ê子民—以色列人ê君王，所以，我beh tī上主ê面前跳舞。
6:22 我ē比chitê koh khah粗俗，kakī 看做卑賤。你所講hiahê女婢，我ē受in尊重。」
6:23 就ánne，掃羅ê chabó͘ kiáⁿ米甲，到死ê日無koh生kiáⁿ兒。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。