路加福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
23 耶穌hō͘人押去彼拉多Hia
(太27：1-2，11-14；可15：1-5；約18：28-38)
全體議員lóng khiā起來，kā耶穌押去彼拉多ê面前。
2 In控告講：「阮看chitê人迷惑阮ê人民，禁止人納稅hō͘皇帝，koh自稱做基督，做王。」
3 彼拉多問耶穌講：「祢是偤太人ê王，是無？」耶穌應講：「是，照你講ánne。」
4 彼拉多對hiahê祭司長kah kui陣ê人講：「我看chitê人無罪。」
5 總是，in jú堅持講：「祂tùi加利利省開始，taⁿ來到chia，祂tī偤太全地教示人，煽動人民。」
6 耶穌tī希律ê面前
彼拉多一下聽tio̍h，to̍h問看chitê人是加利利人á m̄是。
7 伊一下知耶穌屬tī希律所管轄，to̍h kā祂送去希律hia。Hit時，希律人mā tī耶路撒冷。
8 希律看tio̍h耶穌真歡喜，因為伊bat聽tio̍h耶穌ê tāichì，一直ài beh見祂，koh ǹg望ē tàng看tio̍h祂行神跡。
9 希律問耶穌真chē tāichì，m̄ koh，耶穌lóng無應伊半句。
10 祭司長kah經學教師khiā起來，極力控告耶穌。
11 希律kah伊ê兵mā kā祂侮辱、戲弄。然後kā祂穿一領真súi ê長袍，chiah kā祂送tńg去還彼拉多。
12 希律kah彼拉多本來有結怨，tùi hit日起soah變做朋友。
13 耶穌Hông判死刑
(太27：15-26；可15：6-15；約18：39-19：16)
彼拉多召hiahê祭司長、官員kah人民來，
14 kā in講：「Lín押chitê人來我chia，控告祂煽動人民。Taⁿ我tī lín ê面前kā祂審問，總是，我查lóng無lín告祂ê罪。
15 希律mā認定祂無罪，chiah kā祂送tńg來還咱，可見祂無做啥物應該死ê tāichì。
16 所以，我beh kā祂鞭phah，教示一下chiah放祂去。」
17 每年ê Pôaⁿ過節，總督tio̍h照in ê要求kā in放一个犯人。(有ê版本無chit節)
18 群眾同齊大聲hoah：「Tio̍h除去chitê人，放巴拉巴hō͘阮。」
19 Chitê巴拉巴，因為tī城內作亂kohthâi死人，chiah hông關落監。
20 彼拉多ài beh放耶穌，to̍h koh對眾人講一pái。
21 M̄ koh，in大聲hoah：「Kā祂釘十字架！Kā祂釘十字架！」
22 彼拉多第三pái對in講：「到底是án怎？祂kám有做啥物pháiⁿ tāichì？我看祂並無應該死ê罪，所以，我beh kā祂鞭phah，教示一下chiah放祂去。」
23 In繼續大聲hoah，要求彼拉多kā耶穌釘十字架。結果in ê聲soah khah贏。
24 彼拉多就照in所求ê來宣判，
25 放in所要求hitê因為作亂kohthâi死人，hō͘人關落監ê巴拉巴，koh kā耶穌交hō͘ in，順in ê意思去處理。
26 耶穌Hông釘十字架
(太27：32-44；可15：21-32；約19：17-27)
兵á押耶穌去ê時，有一个古利奈ê人，名叫做西門，tùi庄腳來；in kā伊khiú來，kā十字架掛tòa伊ê肩胛頭hō͘伊giâ，來tòe耶穌ê後面行。
27 有一大陣人teh tòe耶穌，其中有一kóa婦人人為祂悲傷啼哭。
28 耶穌oa̍t頭對in講：「耶路撒冷ê婦人人，lín m̄免為我啼哭，tio̍h為lín kakī kah lín ê kiáⁿ兒來啼哭！
29 因為時teh beh到，人ē講：『Bē懷孕，m̄ bat生kiáⁿ，m̄ bat hō͘ gín-á食奶ê婦人人真有福氣。』
30 Hit時，人ē對大山講：『Kā阮teh落來！』mā對小山講：『Kā阮蓋落來！』(註：何10：8)
31 因為連青ê樹木都ánne，乾去ê樹木kám bē koh khah厲害？」
32 十字架頂ê耶穌
Koh有兩 个犯人hō͘人押去kah耶穌做伙處死刑。
33 In去到一个名叫做頭殼碗ê所在，to̍h tī hia kā耶穌釘十字架，mā釘hit兩 个犯人，一个tī正pêng，一个tī倒pêng。
34 耶穌講：「天父ah，赦免in，因為in m̄知in所做ê。」然後in to̍h拈鬮來分耶穌ê衫。
35 眾人khiā tī hia teh看。Hiahê偤太人ê頭人kā耶穌恥笑講：「祂bat救別人，祂若是上帝所揀選ê基督，tio̍h救kakī ！」
36 Hiahê兵á mā kā祂戲弄，行óa去phâng酸醋hō͘祂，
37 講：「祢若是偤太人ê王，tio̍h救祢kakī 。」
38 Tī耶穌ê頭殼頂面有罪狀ê牌á寫講：「Chitê是偤太人ê王。」
39 做伙釘十字架ê犯人中ê一个侮辱耶穌，講：「祢kám m̄是基督？Tio̍h救祢kakī ，mā tio̍h救阮。」
40 另外一个犯人kā hitê責備，講：「你kah祂仝款teh受刑，你kám m̄驚上帝？
41 咱受刑是公道，因為咱有犯罪應該受處罰，m̄ koh，chitê人無做m̄ tio̍h ê tāichì。」
42 Hitê犯人講：「耶穌ah，祢做王來臨ê時，請ē記得我！」
43 耶穌kā伊講：「我實在kā你講，今á日你ē kah我做伙tī樂園。」
44 耶穌ê死亡
(太27：45-56；可15：33-41；約19：28-30)
差不多中晝ê時，全地烏暗，到下晡三點ê時，日頭失光。
45 聖殿內ê帳簾tùi中裂開。
46 耶穌大聲叫，講：「天父ah，我ê靈魂交託祢。」講soahto̍h斷氣。
47 連長看tio̍h所發生ê tāichì，to̍h oló上帝，講：「Chitê真正是義人！」
48 聚集tī hia teh看ê群眾，看tio̍h所發生ê tāichì，lóng ná行ná搥心肝，悲傷tńg去。
49 Hiahê bat耶穌ê人kah tùi加利利省tòe耶穌來ê婦人人，lóng khiā遠遠teh看chiahê tāichì。
50 耶穌ê埋葬
(太27：57-61；可15：42-47；約19：38-42)
有一个人名叫做約瑟，伊是一个議員，做人良善koh有正義。
51 伊無贊成其他議員ê計謀kah行動。伊是偤太人ê城市A-li-má-tha-iah ê人，平時有teh期待上帝國度ê來臨。
52 Chitê人去見彼拉多，請求收埋耶穌ê身屍。
53 伊kā耶穌ê身屍收落來，用幼苧布包。然後kā祂埋葬tī石壁phah好ê墓內。Chitê墓lóng iáu m̄ bat用過。
54 Hit日是備辦節ê日，安息日teh beh到à。
55 Tùi加利利省kah耶穌做伙來hiahê婦人人tòe tī約瑟ê後面。In 斟酌看hitê墓，看耶穌ê遺體án怎hē。
56 Into̍h tńg去準備芳料kah芳油。安息日，hiahê婦人人照律法ê規定歇睏。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。