章節 | 現代台語2021版漢字經文 | 註釋 |
5:17 | 耶穌醫好半身不遂的人( 太 9:1-8 可 2:1-12 )有一日,耶穌啲教示人的時,有法利賽派的人及律法教師佇遐啲坐。𪜶是對加利利及猶太逐庄社,以及耶路撒冷來的。主的權能及耶穌同在,互伊會當醫好病人。 | |
5:18 | 彼時,有人用床扛一個半身不遂的人來,想欲扛入去下佇耶穌的面前; | |
5:19 | 毋拘因為人真多,尋無路通扛入去,就𬦰去厝頂,拆厝瓦,將彼個半身不遂的連床縋落去眾人的中間,下佇耶穌的面前。 | |
5:20 | 耶穌看見𪜶的信心,就講:「朋友啊,你的罪赦免啦。」 | |
5:21 | 許個經學教師及法利賽派的人議論講:「此個啲褻瀆上帝的是啥人?上帝以外,什麼人會當赦罪?」 | |
5:22 | 耶穌知影𪜶啲質問什麼,就對𪜶講:「是按怎恁心內啲質問? | |
5:23 | 講『你的罪赦免啦』,抑是講『起來行』,叨一項較簡單? | |
5:24 | 不過我欲互恁知人子佇地上有赦罪的權柄。」耶穌對彼個半身不遂的人講:「我給你講,起來,夯你的床,轉去恁兜!」 | |
5:25 | 彼個人隨時佇眾人的面前𬦰起來,夯伊所倒的床轉去𪜶兜,那行那歸榮光互上帝。 | |
5:26 | 眾人攏真著驚,歸榮光互上帝,心內充滿敬畏講:「阮今仔日有看著奇妙的代誌!」 |