章節 | 全民台語聖經漢羅經文 | 註釋 |
29:1 | 腓利士人無相信大衛腓利士人聚集in ê軍兵來到亞弗;以色列人紮營tī耶斯列ê水泉邊。 | |
29:2 | 腓利士人hiahê首領chhōa兵,有ê一百,有ê一千,進前去。大衛kah tòe伊ê人,以及亞吉tòe tī後面。 | |
29:3 | 腓利士人ê首領講:「Chiahê希伯來人tī chia做啥物?」亞吉kā腓利士人ê首領講:「Chitê kám m̄是以色列王掃羅ê人臣大衛?伊kah我tòa已經有chiahê日,chiahê年。Tùi伊投降我到今á日,我m̄ bat看tio̍h伊有過失。」 | |
29:4 | 腓利士人ê首領對伊受氣,腓利士人ê首領kā伊講:「Tio̍h hō͘ chitê人tńg去,tńg去你所安置伊ê所在,m̄ thang hō͘伊kah咱落陣,恐驚伊tī陣內做咱ê對敵。伊ē kah伊ê主人koh和,beh用啥物?Kám m̄是chiahê人ê頭殼? | |
29:5 | 早前in有人跳舞、唱和,講:『掃羅kā inthâi死 ê千千, 大衛 kā inthâi死 ê萬萬。』所講ê,kám m̄是chitê大衛?」 | |
29:6 | 亞吉叫大衛來,kā伊講:「我kí永遠活ê上主來chiùchōa,你是正直,你kah我出入tī軍隊中,我看是好。因為tùi你來我chia ê時到今á日,我m̄ bat看tio̍h你有啥物過失,獨獨chiahê首領看你做m̄好。 | |
29:7 | Taⁿ你tńg去,安然去,恐驚你所做ê,腓利士人ê首領無歡喜。」 | |
29:8 | 大衛kā亞吉講:「我bat做啥物?Tùi我起頭來你ê面前ê時到今á日,你tī你ê奴僕有看出啥物tāichì,hō͘我無thang kah王—我ê主ê對敵交戰?」 | |
29:9 | 亞吉應大衛講:「我知你tī我ê目chiu 前是好,ná親像上主ê使者;總是,腓利士人ê首領講:『Chitê人m̄ thang kah咱去交戰。』 | |
29:10 | 所以,你以及你ê主ê奴僕kah你來ê,tio̍h早早起來,你起來了後,到天光to̍h tio̍h出去!」 | |
29:11 | 隔工早起,大衛kah tòe伊ê人早早起來,出發tńg去腓利士ê地。腓利士人mā去耶斯列。 |