章節 | 全民台語聖經漢羅經文 | 註釋 |
32:1 | Chiahê天ah,tio̍h àⁿ耳孔,我beh講話;願地mā tio̍h聽我ê嘴所講ê。 | |
32:2 | 我ê教示ē親像雨降落,我ê話親像露水teh滴;親像幼綿綿ê雨落tī幼幼ê草,親像大雨落tī菜蔬。 | |
32:3 | 因為我beh宣布上主ê名;lín tio̍h遵咱ê上主做大。 | |
32:4 | 做石磐ê,祂所做ê是完全,祂ê路lóng是公平;是真實ê上主,lóng無不義,祂是公義,koh正直。 | |
32:5 | Chitê乖癖彎曲ê世代kakī 敗壞;m̄是祂ê kiáⁿ,是in ê弊病。 | |
32:6 | 愚戇無知ê人民,lín kám ánne報答上主?祂kám m̄是你ê老父,買你ê?祂有創造你,建立你。 | |
32:7 | Tio̍hē記得古早ê日,數念歷代ê年;問你ê老父,伊ē kā你指示,問你ê序大,inē kā你講。 | |
32:8 | 至koân ·ê分業hō͘列邦,分開世間人ê時,to̍h定tio̍h人民ê界限,照以色列人ê數額。 | |
32:9 | 上主ê份額是祂ê子民;祂所得tio̍h ê產業是雅各。 | |
32:10 | 祂tú tio̍h伊tī拋荒ê地,tī野獸哮ê荒廢曠野,to̍h kā伊圍起來,看顧伊,保護伊親像目chiu 仁。 | |
32:11 | Koh親像鷹鳥lā牠ê巢,tī鷹á ê頂面ia̍t牠ê翼,thí開翼股來承牠,kā牠載tī牠ê翼股。 | |
32:12 | 只有上主chhōa伊,無別个神明kah伊同在。 | |
32:13 | to̍h hō͘伊khiā tī地chiūⁿkoân ê所在,得tio̍h食田裡ê農產物;koh hō͘伊tùi石磐suh蜜,tùi火石suh油; | |
32:14 | mā食牛奶油kah羊奶,肥ê羊á-kiáⁿ,巴珊所出ê綿羊káng kah山羊,kah siōng好ê小麥,mā lim葡萄汁ê酒。 | |
32:15 | 耶書崙肥就鴨霸,你已經肥,koh大粒,肉真phauh;伊to̍h離開創造伊ê上主,看輕拯救伊ê石磐。 | |
32:16 | In用別个神明激祂嫉妒,用可惡ê惹祂受氣。 | |
32:17 | In祭獻邪鬼,m̄是真ê上帝,to̍h是in平時所m̄ bat ê神明,是新ê,近來chiah有ê,是你ê祖先所無驚畏ê。 | |
32:18 | 生你ê石磐,你無數念祂,生你ê上主,你bē記得祂。 | |
32:19 | 上主看tio̍h就怨恨,因為祂ê kiáⁿ兒激祂ê緣故,to̍h講: | |
32:20 | 我beh tùi in掩我ê面,看in結局án怎。In是乖癖ê族類,無信實ê kiáⁿ兒。 | |
32:21 | In用hitê m̄是上主ê激我ê嫉妒,用in ê虛假ê物惹我受氣。我to̍h用m̄是做人民ê激in ê嫉妒,用愚戇ê人民惹in ê受氣。 | |
32:22 | 因為tī我ê受氣中有火to̍h起來,燒到陰間極深ê所在,mā燒地kah地ê出產,mā起火燒chiahê山ê地基。 | |
32:23 | 我beh積聚災禍tī in ê頂面,用我所有ê箭來射in。 | |
32:24 | Inē因為iau餓來消瘦,hō͘炎熱kah毒症吞滅。我ē hō͘ in tú tio̍h野獸ê嘴齒,kah蛇ê毒。 | |
32:25 | 外面有刀劍,內面有驚惶,hō͘人死亡,hō͘少年ê chapo͘人kah在室女,食奶ê kah白頭毛ê人,lóng滅亡。 | |
32:26 | 我講:我beh hō͘ in四散tī遠遠,tī人ê中間除in ê名字。 | |
32:27 | 總是,我驚對敵激我,恐驚in ê對敵誤會,恐驚in ē講:是阮ê手gia̍h koân,m̄是上主行chiahê tāichì。 | |
32:28 | 因為in是bē曉得想ê人民,tī心內無聰明。 | |
32:29 | 願in有智慧,會明白chitê,會想in ê結局。 | |
32:30 | 若m̄是in ê石磐賣in,若m̄是上主kā in交hō͘人,怎樣對敵一个會趕in一千?兩 个ē hō͘ in一萬個逃走? | |
32:31 | In ê石磐無親像咱ê石磐,連咱ê對敵mā ánne評斷。 | |
32:32 | In ê葡萄樹是tùi所多瑪ê葡萄樹傳ê,mā tùi蛾摩拉ê園出ê;in ê葡萄是毒ê葡萄,kui葩lóng是苦ê。 | |
32:33 | In ê酒是龍ê毒,是惡蛇殘害ê毒。 | |
32:34 | 這kám m̄是積聚tī我chia,封密tī我寶貝ê庫房? | |
32:35 | 申冤報應在tī我,tī in ê腳踏顛ê時,因為in tú tio̍h災禍ê日teh beh到,所beh tú ·tio̍h ê tāichì會真緊到。 | |
32:36 | 上主看tio̍h祂ê子民氣力已經死去,hiahê拘束ê,自由ê,lóng無留kah半個,to̍h beh替in申冤,因為祂ê奴僕來後悔。 | |
32:37 | 伊ē講:In ê神明,in所óa靠ê石磐, | |
32:38 | to̍h是食in祭祀ê油,Lim in灌奠ê酒ê,taⁿ tī tó位?Thang hō͘ in起來幫贊lín,保護lín。 | |
32:39 | Lín taⁿ tio̍h看,我,我to̍h是;我以外無有上帝。我hō͘人死,我hō͘人活;我kā伊損傷,我kā伊醫治,無一个ē tùi我ê手救出。 | |
32:40 | 我gia̍h起手ǹg天講,我kí我ê永遠活命來講: | |
32:41 | 我若磨我光nà-nà ê刀,我若執行審判,to̍h beh刑罰我ê對敵,報應怨恨我ê人。 | |
32:42 | 我beh hō͘我ê箭lim血到醉,我ê刀beh食肉,to̍h是受thâi受掠ê人ê血,對敵首領ê頭ê肉。 | |
32:43 | 列國,lóng tio̍h kah祂ê子民做伙歡喜;因為祂ē為祂ê奴僕ê血申冤,報應伊ê對敵,beh贖伊ê地kah伊ê人民ê罪。 | |
32:44 | 摩西來,用chitê歌一切ê話念hō͘人民聽,嫩ê kiáⁿ約書亞mā kah伊tī ·leh。 | |
32:45 | 摩西ê遺言摩西對以色列ê群眾講chiahê話了後,to̍h kā in講: | |
32:46 | 「我今á日所對lín見證一切ê話,lín tio̍h khǹg tī心裡,mā tio̍h吩咐lín ê kiáⁿ孫執守來行chitê律法所有ê話。 | |
32:47 | 因為這對lín來講 m̄是空空ê tāichì,是lín ê活命,mā ē因為chitê tāichì,lín ê日子得tio̍h久長,tī lín過約旦河beh入去承接ê地。」 | |
32:48 | 當日,上主吩咐摩西講: | |
32:49 | 「你去亞巴琳山,尼波ê山頭,kah耶利哥城對面ê摩押地,看我賞賜以色列人做產業ê迦南地。 | |
32:50 | 你ē死tī你所去ê山內,親像你ê阿兄亞倫死tī何珥山。 | |
32:51 | 因為lín tī尋(Chîn)ê曠野,加低斯ê米利巴ê水邊,tī以色列人中得罪我,因為tī以色列人中無尊我做聖。 | |
32:52 | 你thang對面看hitê地,總是,bē tàng入去到我所賞賜以色列人ê地。」 |