章節 | 全民台語聖經漢羅經文 | 註釋 |
20:1 | 亞伯拉罕kah亞比米勒亞伯拉罕tùi hia漸漸ǹg南方徙去;寄腳tī加低斯kah書珥之間ê基拉耳。 | |
20:2 | 亞伯拉罕講到伊ê bó͘撒拉,to̍h講她是kakī ê小妹;基拉耳王亞比米勒to̍h差人kā撒拉chhōa去。 | |
20:3 | 暗時,眠夢中,上帝來kā亞比米勒講:「你是該死ê人,因為你所娶hitê chabó͘人是人ê bó͘。」 | |
20:4 | 亞比米勒iáu未親近她,to̍h講:「主ah,行義ê人民,祢kám mā beh kā伊滅掉? | |
20:5 | Hitê人kám m̄是本身對我講:『她是我ê小妹』?chabó͘人本身mā講:『伊是我ê阿兄。』我做chitê tāichì,是心端正,手清氣。」 | |
20:6 | 上帝kā伊託夢,講:「我本知你做chitê tāichì是心中端正;我chiah阻擋你,免得你得罪我,所以,我無容允你摸tio̍h她。 | |
20:7 | Taⁿ你tio̍h kā chitê人ê bó͘還伊,因為伊是先知,伊beh替你祈禱,你chiah ē活;你若m̄還伊,你tio̍h知,你kah你所有ê人lóngē死。」 | |
20:8 | 亞比米勒透早起來,叫眾奴僕來,kā chiahê tāichì lóng講hō͘ in聽,hiahê人lóng真驚。 | |
20:9 | 亞比米勒叫亞伯拉罕來,對伊講:「你對阮所行ê是啥物事?我有啥物得罪你,你竟然hō͘我kah我國內ê人陷落重罪?你對我行無應該行ê tāichì。」 | |
20:10 | 亞比米勒koh對亞伯拉罕講:「你看tio̍h啥物,chiah做chitê tāichì?」 | |
20:11 | 亞伯拉罕講:「我想講chit所在ê人lóng無驚上帝,in ē為tio̍h我ê bó͘ ê緣故thâi死我。」 | |
20:12 | 而且她mā實在是我ê小妹,siâng父無siâng母,後來,做我ê bó͘。 | |
20:13 | 當上帝叫我離開老父ê家去四界行ê時,我kā她講:『將來咱所beh到ê所在,請你kā人講:伊是我ê阿兄。這to̍h是你款待我ê恩。』」 | |
20:14 | 亞比米勒kā羊、牛、奴僕、女婢hō͘亞伯拉罕,koh kā伊ê bó͘撒拉還伊。 | |
20:15 | 亞比米勒koh講:「你看,我ê地lóng tī你ê面前,你thang隨意tòa。」 | |
20:16 | Koh kā撒拉講:「我hō͘你ê阿兄一千銀,做你tī全家面前遮目chiu ê錢;taⁿ你tī眾人面前無tāichì à。」 | |
20:17 | 亞伯拉罕祈禱上帝,上帝to̍h醫好亞比米勒kah伊ê bó͘,以及她ê女婢,into̍h ē生kiáⁿ。 | |
20:18 | 因為上主為tio̍h亞伯拉罕ê bó͘撒拉ê緣故,已經hō͘亞比米勒厝內ê chabó͘人bē tàng生kiáⁿ。 |