章節 | 全民台語聖經漢羅經文 | 註釋 |
17:1 | 立約ê記號—割禮亞伯蘭九十九歲ê時,上主對亞伯蘭顯現,kā伊講:「我是全能上帝,你tī我ê面前行為tio̍h完全, | |
17:2 | 我to̍h beh kah你立我ê約,hō͘你ê kiáⁿ孫非常chē。」 | |
17:3 | 亞伯蘭to̍h仆落tī地裡;上帝koh kah伊講話,講: | |
17:4 | 「我kah你立我ê約,你ē做真chē國ê父。 | |
17:5 | Tùi taⁿ以後,你ê名無koh叫做亞伯蘭,是beh叫做亞伯拉罕,因為我已經立你做真chē國ê父。 | |
17:6 | 我beh hō͘你ê kiáⁿ孫非常chē;國度ē tùi你來立,君王ē tùi你來出。 | |
17:7 | 「我beh kah你,以及你歷代ê kiáⁿ孫,設立我ê約做永遠ê約;我beh做你kah你ê kiáⁿ孫ê上帝。 | |
17:8 | 我ē kā你現在出外寄腳ê地,to̍h是迦南全地,賞賜hō͘你kah你ê kiáⁿ孫,做永遠ê產業;我mā beh做in ê上帝。」 | |
17:9 | 上帝koh對亞伯拉罕講:「你kah你ê kiáⁿ孫,tio̍h歷代遵守我ê約。 | |
17:10 | Lín中間所有ê chapo͘ ê,lóng tio̍h受割禮;這to̍h是我kah你以及你ê kiáⁿ孫所立ê約,是lín所tio̍h遵守ê。 | |
17:11 | Lín tio̍h割lín陽物ê皮,這是beh做我kah lín所立ê約ê記號。 | |
17:12 | Lín歷代ê chapo͘ ê,無論厝內生ê,á是你ê kiáⁿ孫以外用銀tùi外面ê人買來ê,出世了後第八日,lóng tio̍h受割禮。 | |
17:13 | 你厝內生ê kah你用銀買來ê,lóng一定tio̍h受割禮。Án-ne,我ê約beh hē tī lín ê身上,做永遠ê約。 | |
17:14 | 無受割禮ê chapo͘ ê,伊身軀既然無受割禮,是違背我ê約,一定tio̍h tùi人民ê中間除去。」 | |
17:15 | 上帝koh對亞伯拉罕講:「你ê bó͘撒萊,m̄ thang koh kā她叫做撒萊,她ê名beh改叫做撒拉。 | |
17:16 | 我ē賜福hō͘她,我mā ē hō͘你tùi她得tio̍h一个kiáⁿ。我ē賜福hō͘她,她mā ē做列國ê老母;ē有邦國ê王tùi她出。」 | |
17:17 | 亞伯拉罕to̍h仆teh笑,心內想講:「一百歲 ê人kám iáu會生kiáⁿ?撒拉已經九十歲ā,kám iáu會生kiáⁿ?」 | |
17:18 | 亞伯拉罕對上帝講:「但願以實瑪利活tī祢ê面前。」 | |
17:19 | 上帝講:「M̄是lah,你ê bó͘撒拉ē kā你生一个kiáⁿ,你ē kā伊號名叫做以撒。我ē kah伊設立我ê約,做伊ê kiáⁿ孫永遠ê約。 | |
17:20 | 關係以實瑪利,我mā有聽你求;你看!我已經kā伊賜福,beh hō͘伊興旺,加添非常chē。伊ē生十二個族長,我mā beh hō͘伊成做大國。 | |
17:21 | 到明年ê chit時,撒拉ē kā你生以撒,我ē kah伊設立我ê約。」 | |
17:22 | 上帝kah亞伯拉罕講soah,to̍h離開伊,上天去。 | |
17:23 | Tú-tú hit日,亞伯拉罕照上帝所kā伊講ê,kā伊ê kiáⁿ以實瑪利kah亞伯拉罕厝內一切ê chapo͘人,無論tī厝內生ê,á是用伊ê銀買來ê lóng行割禮。 | |
17:24 | 亞伯拉罕受割禮ê時,九十九歲。 | |
17:25 | 伊ê kiáⁿ以實瑪利受割禮ê時,十三歲。 | |
17:26 | Tú-tú hit日,亞伯拉罕kah伊ê kiáⁿ以實瑪利同受割禮。 | |
17:27 | 厝內所有ê人,無論tī厝內生ê,á是用銀tùi外面ê人買來ê,lóng kah伊同齊受割禮。 |