章節 | 全民台語聖經漢羅經文 | 註釋 |
33:1 | 上主命令以色列人離開西奈山上主對摩西講:「我bat chiùchōa應允亞伯拉罕、以撒、雅各,講:『Beh kā土地賞賜hō͘你ê kiáⁿ孫。』Τaⁿ你去,你kah你tùi埃及地所chhōa出來ê人民,tio̍h tùi chia上去hitê地。 | |
33:2 | 我beh差使者tī你ê頭前,我ē趕出迦南、亞摩利、赫、比利洗、希未kah耶布斯hiahê族, | |
33:3 | chhōa你到流奶kah蜜ê地。因為我m̄ kah你上去,為tio̍h你是頷頸硬ê人民,恐驚我tī路裡kā你滅亡。」 | |
33:4 | 人民聽tio̍h chitê pháiⁿ消息就憂悶,無人打扮。 | |
33:5 | 上主對摩西講:「你tio̍h kā以色列人講:『Lín是頷頸硬ê人民,我若一目nih久到lín中間,我一定kā lín剿滅。Τaⁿ tio̍h kā lín身軀ê打扮剝起來,我to̍h知我beh án怎kā lín款待。』」 | |
33:6 | 以色列人tùi tī何烈山以後,to̍h kā身軀ê打扮lóng剝落來。 | |
33:7 | 上主ê聖幕摩西kā布棚搭tī營外,離開營有hiah遠,伊稱chitê布棚叫做會幕,所有走chhōe上主ê人,to̍h來到營外ê會幕hia。 | |
33:8 | 當摩西出去到布棚ê時,眾人to̍h lóng起來,ta̍k人khiā tī in ê布棚口teh看摩西,一直到伊入去布棚。 | |
33:9 | 摩西入去布棚ê時,雲柱to̍h落來,khiā tī布棚ê門前,上主to̍h kah摩西講話。 | |
33:10 | 眾人看tio̍h雲柱khiā tī布棚ê門前,人民to̍h lóng起來,ta̍k人tī in ê布棚門口跪拜。 | |
33:11 | 上主kah摩西面對面講話,親像人kah朋友講話仝款。摩西倒tńg來營內,獨獨跟tòe伊ê少年人嫩ê kiáⁿ約書亞無離開布棚。 | |
33:12 | 上帝應允kah子民同在摩西對上主講:「你看,祢對我講:『Kā chiahê人民chhōa去』,總是,無hō͘我知祢會差啥人kah我做伙去。只有講:『我用名揀召你,你tī我ê面前mā得tio̍h恩典。』 | |
33:13 | 我taⁿ若tī祢ê面前得tio̍h恩典,求祢kā祢ê路指示我,hō͘我bat祢,thang tī祢ê面前得tio̍h恩典。你tio̍h數念chit族是祢ê子民。」 | |
33:14 | 上主講:「我beh親身kah你去,hō͘你平安。」 | |
33:15 | 摩西對祂講:「祢若無親身kah我去,to̍h m̄ thang chhōa阮tùi chia上去。 | |
33:16 | Tùi án怎會知,我kah祢ê子民tī祢ê面前得tio̍h恩典?Kám m̄是tùi祢kah阮做伙去,hō͘我kah祢ê子民kah地chiūⁿê萬民有分別?」 | |
33:17 | 上主對摩西講:「你所講chitê tāichì,我mā beh做;因為你tī我ê面前得tio̍h恩典,koh我用我ê名揀召你。」 | |
33:18 | 摩西講:「求祢hō͘我看tio̍h祢ê榮光。」 | |
33:19 | 上主講:「我beh hō͘我一切ê恩惠經過你ê面前,mā宣布我ê聖名—耶和華tī你ê面前。我beh施恩tī我所施恩ê,我beh憐憫tī我所憐憫ê。」 | |
33:20 | Koh講:「你bē tàng看我ê面,因為無人ē看tio̍h我koh iáu會活。」 | |
33:21 | 上主講:「你看,tī我chia有所在,你tio̍h khiā tī石磐頂。 | |
33:22 | 當我ê榮光經過你ê時,我beh kā你hē tī石磐縫內,用我ê手kā你遮(cha̍h)teh,thèng候我過去。 | |
33:23 | 然後我ē kā我ê手kiu倒tńg來,你to̍h ē看tio̍h我ê尻脊骿(phiaⁿ)後;總是bē tàng看tio̍h我ê面。」 |