章節 | 全民台語聖經漢羅經文 | 註釋 |
15:1 | 耶穌tī彼拉多面前受審問(太27:1-2,11-14;路23:1-5;約18:28-38)到天光,hiahê祭司長、長老、經學教師kah全議會做伙討論好勢,kā耶穌縛起來,押去交hō͘彼拉多。 | |
15:2 | 彼拉多問耶穌講:「祢是偤太人ê王,是無?」耶穌應講:「照你講ánne。」 | |
15:3 | 大祭司告耶穌真chē項。 | |
15:4 | 彼拉多koh問耶穌講:「祢ná ē lóng無應?祢看,in告祢hiah chē項。」 | |
15:5 | 耶穌猶原無應半句。彼拉多soah感覺真奇怪。 | |
15:6 | 耶穌Hông判死刑(太27:15-26;路23:13-25;約18:39-19:16)Tī ta̍k年ê Pôaⁿ過節,總督lóng有照人民所求ê來放一个犯人hō͘ in。 | |
15:7 | Hit時,有一个kah hiahê作亂ê人做伙關監,名叫做巴拉巴ê犯人。 | |
15:8 | 群眾聚集óa去,要求彼拉多照慣例來放一个犯人。 | |
15:9 | 彼拉多問in講:「Lín ài我放偤太人ê王hō͘ lín,是無?」 | |
15:10 | 因為伊知hiahê祭司長是為tio̍h怨妒chiah kā耶穌交hō͘伊。 | |
15:11 | M̄ koh,hiahê祭司長煽動群眾,顛倒要求彼拉多放巴拉巴hō͘ in。 | |
15:12 | 彼拉多koh應講:「Án-ne,lín叫做偤太人ê王hit位,我tio̍h án怎kā祂辦?」 | |
15:13 | In koh大聲hoah:「Kā祂釘十字架!」 | |
15:14 | 彼拉多kā in講:「是án怎lè,祂kám有犯啥物罪?」總是,群眾ná大聲hoah:「Kā祂釘十字架!」 | |
15:15 | 彼拉多為tio̍h beh hō͘群眾歡喜,to̍h放巴拉巴hō͘ in。伊koh命令人鞭phah耶穌。然後kā耶穌交hō͘ in去釘十字架。 | |
15:16 | 兵á戲弄耶穌(太27:27-31;約19:2-3)兵á拖耶穌入去總督府ê院內,koh召全隊ê兵á來。 | |
15:17 | In kā耶穌穿一領紫色ê長袍,koh kā祂戴刺á編ê冕旒, | |
15:18 | 然後kā耶穌請安講:「偤太人ê王,平安!」 | |
15:19 | In koh用蘆竹捽耶穌ê頭殼,kā祂phùi嘴瀾,跪落去kā祂拜。 | |
15:20 | In戲弄soah,kā hit領紫色ê長袍thǹg起來,koh kā耶穌kakī ê衫穿倒tńg去,然後kā祂押去釘十字架。 | |
15:21 | 耶穌Hông釘十字架(太27:32-44;路23:26-43;約19:17-27)有一个古利奈人西門,to̍h是亞力山大kah Ló͘-ho͘h ê老父,tùi庄腳來,àn hia經過。兵á就強迫伊來giâ耶穌ê十字架。 | |
15:22 | In kā耶穌押到各各他ê所在,hitê地名翻譯to̍h是「頭殼碗ê所在。」 | |
15:23 | In用攪沒藥ê酒hō͘耶穌lim。祂m̄-lim。 | |
15:24 | In kā耶穌釘十字架了後,分祂ê衫褲,拈鬮來看啥人得tio̍h啥物。 | |
15:25 | In kā耶穌釘tī十字架ê時是早起時九點。 | |
15:26 | 祂ê罪狀ê牌á寫講:「偤太人ê王」。 | |
15:27 | 有兩 个賊kah耶穌同齊釘十字架,一个tī正pêng,一个tī倒pêng。 | |
15:28 | Án-ne是來應驗經典所記載:祂mā hō͘人kā祂算做罪犯。(有ê抄本無chit節) | |
15:29 | Tùi hia經過ê人kā祂侮辱,搖頭講:「Ai-ah,祢chitê講beh毀壞聖殿,三日內beh koh起起來ê人, | |
15:30 | taⁿ tio̍h救祢kakī ,tùi十字架頂落來!」 | |
15:31 | Hiahê祭司長kah經學教師mā是ánne kā祂恥笑,互相講來講去,講:「祂bat救別人,taⁿ bē tàng救kakī 。 | |
15:32 | 以色列ê王基督,taⁿ tio̍h tùi十字架落來hō͘阮看,阮chiah beh信。」同齊釘tī十字架ê兩 个賊頭mā kā祂侮辱。 | |
15:33 | 耶穌ê死亡(太27:45-56;路23:44-49;約19:28-30)中晝ê時,全地烏暗,續到下晡三點。 | |
15:34 | 三點ê時,耶穌大聲hoah:「Í-lô-i,Í-lô-i,la̍h-má sat-pak-tāi-nî?」Chit句亞南話ê意思是:「我ê上帝,我ê上帝,祢ná ē放sak我?」 | |
15:35 | Tī邊á teh khiā ê一个人聽tio̍h,to̍h講:「你看,祂teh叫以利亞。」 | |
15:36 | 有一个人走óa去,用海綿浸醋,縛tī蘆竹á尾,tu去hō͘耶穌suh,講:「慢且lè,咱來看以利亞ē來kā祂救落來á bē。」 | |
15:37 | 耶穌大聲喉叫一聲,to̍h斷氣。 | |
15:38 | 聖殿內ê帳簾tùi頂到下裂做兩pêng。 | |
15:39 | Khiā tī耶穌ê對面ê連長看tio̍h祂ánne斷氣,to̍h講:「Chitê人真正是上帝ê Kiáⁿ。」 | |
15:40 | Koh有幾nā个婦人人tùi遠遠teh看,其中有抹大拉ê馬利亞,小雅各kah約瑟ê老母馬利亞,以及Sa-ló-meh。 | |
15:41 | In to̍h是耶穌tī加利利省ê時,跟tòe來服事耶穌ê婦人人。Mā有真chē kah耶穌同齊上耶路撒冷ê婦人人,in lóng tùi遠遠teh看。 | |
15:42 | 耶穌ê埋葬(太27:57-61;路23:50-56;約19:38-42)時已經暗,hit日koh是準備Pôaⁿ過節ê日,to̍h是安息日ê前一日。 | |
15:43 | 有A-li-má-tha-iah ê約瑟來,好膽入去見彼拉多,請求hō͘伊收耶穌ê身屍。約瑟是尊貴ê議員,本身mā是欣慕上帝國度ê人。 | |
15:44 | 彼拉多聽tio̍h耶穌已經死,感覺奇怪。伊叫連長來,問看耶穌死去á未。 | |
15:45 | 伊tùi hitê連長知影耶穌已經死去,就允准kā身屍交hō͘約瑟。 | |
15:46 | 約瑟買一塊幼苧布來,kā耶穌tùi十字架頂收落來,用幼苧布包身屍,kā祂安葬tī石磐所phah ê墓。伊mā kō一塊石頭來塞tī墓口。 | |
15:47 | 抹大拉ê馬利亞kah約瑟ê老母馬利亞,有看tio̍h埋葬耶穌ê所在。 |