章節 | 全民台語聖經漢羅經文 | 註釋 |
15:1 | 摩西之歌Hit時,摩西kah以色列人唱chitê歌oló上主,講:我beh唱歌oló上主,因為祂至koân至大,祂 kā馬kah騎馬ê hiat落去海中。 | |
15:2 | 上主是我ê氣力,是我ê詩歌,mā是做我拯救ê主。祂是我ê上帝,我beh oló祂,是我ê父ê上帝,我beh尊祂做大。 | |
15:3 | 上主是戰士,祂ê名叫做耶和華。 | |
15:4 | 法老ê車kah伊ê軍兵,上主kā in hiat落去海中;伊特別揀ê軍長,lóng沉tī紅海。 | |
15:5 | 深淵kā in蓋起來;in親像石頭,墜到深ê所在。 | |
15:6 | 上主ah,祢ê正手展出能力,得tio̍h榮光;上主ah,祢ê正手phah碎對敵。 | |
15:7 | 祢發出大威嚴,chhia倒hiahê起來攻擊祢ê;祢發出大受氣,kā in燒毀親像teh燒草。 | |
15:8 | 祢發出鼻中ê氣,水就ná chhèng ná koân,大水khiā起來親像kui堆牆;海中ê深水變乾地。 | |
15:9 | 對敵講:我beh jiok in,我beh jiok tio̍h in,我beh分所搶ê物,我beh tī in ê身上來滿足我ê心願。我beh拔刀,我ê手beh kā in消滅。 | |
15:10 | 祢一下pûn風,海to̍h kā in蓋密;in親像鉛沉tī大水中。 | |
15:11 | 上主ah,chiahê神明ê中間,啥人ē親像祢? 啥人親像祢,至聖thang榮光,威嚴thang oló,行出奇事? | |
15:12 | 祢伸出正手, 地to̍h kā in吞滅。 | |
15:13 | 祢用祢ê慈愛,chhōa祢所救贖ê子民;祢用祢ê權能,chhōa in入去祢聖ê所在。 | |
15:14 | 列邦聽tio̍h就phi̍h-phi̍h chhoah;tòa tī腓利士地ê,tú tio̍h痛苦。 | |
15:15 | Hit時,以東ê族長tio̍h驚kah gāng去,摩押英雄ê人致使phi̍h-phi̍h chhoah,tòa tī迦南地ê人民,心lóng消熔。 | |
15:16 | 恐怖驚惶臨到tī in。上主ah,因為祢ê手ê大權能,in tiāⁿ-tiāⁿ 親像石頭,thèng候祢ê子民經過,thèng候祢所得tio̍h ê子民過去。 | |
15:17 | 祢ē chhōa in入去,栽培in tī祢ê產業ê山,上主ah,to̍h是祢為kakī 所準備tòa ê所在,主ah,to̍h是祢ê手所建立ê聖所。 | |
15:18 | 上主beh做王,一直到永遠。 | |
15:19 | 米利暗之歌因為法老ê馬kah伊ê車、伊ê馬兵,到tī海中,上主hō͘海水反流kā in淹死;獨獨以色列人tī海中行乾地。 | |
15:20 | 亞倫ê大姊女先知米利暗,手裡gia̍h lin-long鼓,眾chabó͘人mā tòe她出去,gia̍h lin-long鼓跳舞。 | |
15:21 | 米利暗和所唱ê講:Lín tio̍h唱歌oló上主,因為祂是至koân至大, kā馬kah騎馬ê lóng hiat落去海中。 | |
15:22 | 摩西chhōa以色列人tùi紅海進前行,in出去,來到書珥ê曠野,tī曠野行三日,chhōe無水。 | |
15:23 | 來到瑪拉ê時,瑪拉ê水bē lim得,因為水苦,所以kā hit所在ê名叫做瑪拉。 | |
15:24 | 人民to̍h對摩西哀怨,講:「阮beh lim啥物?」 | |
15:25 | 摩西求叫上主,上主指示伊一欉樹,伊to̍hka7 hit欉樹hiat落去水裡,水to̍h變甘。上主tī hia為in定律例kah法度,tī hia kā in試煉。 | |
15:26 | Koh講:「你若致意聽上主—你ê上帝ê聲,koh行祂所看做合宜ê tāichì,注意聽祂ê誡命,守祂一切ê律例,我hō͘埃及人所tú ·tio̍h ê破病,就一定無hō͘你tú tio̍h,因為我是kā你醫治ê上主。」 | |
15:27 | In來到以琳,tī hia有十二個水泉,七十欉ê棗樹,in to̍hti7 hia ê水邊紮營。 |