章節 | 全民台語聖經漢羅經文 | 註釋 |
63:1 | 上主戰贏萬國Chitê tùi以東來,tùi波斯拉到,身穿紅衫,衫褲高貴,有大氣力,大步teh行ê是啥人?是我,是照公義講話,有大氣力,ē行拯救ê上主。 | |
63:2 | 「你ê衫褲ná ē有紅色,你ê衫褲ná ē親像踏酒窟ê?」 | |
63:3 | 上主應講:「我kakī 一个踏酒窟;眾人ê中間無一个人kah我同在。我受氣kā in踏,大受氣kā in thún踏。In ê血濺tī我ê衫,koh hō͘我所有ê衫褲無清氣。 | |
63:4 | 因為報仇ê日tī我ê心內,我救贖我ê子民ê年已經到。 | |
63:5 | 我看,m̄ koh看無幫贊ê;我tio̍h驚kah gāng去,因為無人kā我扶持。所以,我kakī ê手kā我行拯救;我ê大受氣kā我扶持。 | |
63:6 | 我受氣,踏列邦;大受氣,hō͘ in醉醉,hō͘ in ê血流tī地裡。」 | |
63:7 | 上主恩待以色列我beh照上主所有賞賜hō͘咱ê,來講起上主ê慈愛kah上主ê名聲,以及祂ǹg以色列ê子民所施ê大恩,to̍h是照祂ê憐憫kah豐盛ê慈愛賞賜hō͘ in ê。 | |
63:8 | 因為祂講:「In真正是我ê子民,無行虛假ê kiáⁿ兒」;所以,祂成做in ê救主。 | |
63:9 | Tī in一切ê苦難中,祂mā kah in同受苦難,koh有祂面前ê使者kā in拯救;祂用慈愛kah憐憫kā in救贖;tī古早ê日子tiāⁿ-tiāⁿ kā in抱,kā in看顧。 | |
63:10 | 總是,in悖逆,hō͘祂ê聖神憂悶;祂to̍h顛倒做in ê對敵,本身來kā in攻擊。 | |
63:11 | 然後,人民就ē記得古早摩西ê日,講:Chhōa in kah祂全群ê牧者tùi海裡出來ê tī tó位?Kā祂ê聖神hē tī in中間ê tī tó位? | |
63:12 | Hō͘祂榮光ê手tī摩西ê正手行動,tī in ê面前kā水分開,koh為tio̍h kakī 立永遠ê名, | |
63:13 | chhōa in經過海中親像馬行tī曠野,hō͘ in ê腳無踢tio̍h ê tī tó位? | |
63:14 | 上主ê聖神hō͘ in得tio̍h安息,親像ánne,chengseⁿ落到山腳;ánne,祢mā chhōa祢ê子民,為tio̍h kakī 建立榮光ê名。 | |
63:15 | 求助ê祈禱求祢tùi天àⁿ落來看,tùi祢聖潔榮光ê所在看。祢ê熱心kah祢大權能ê所做tī tó位?祢疼痛ê心腸kah憐憫對我停止。 | |
63:16 | 雖然亞伯拉罕m̄ bat阮,以色列m̄認阮,總是,祢是阮ê父。上主ah,祢是阮ê父,tùi萬古以來,祢ê名叫做「救贖阮ê主」。 | |
63:17 | 上主ah,祢ná ē hō͘阮行偏邪,離開祢ê路,hō͘阮ê心硬,無敬畏祢?求祢為tio̍h祢ê奴僕,為祢ê產業—各支族ê緣故,倒tńg來。 | |
63:18 | 祢聖ê子民不過是暫時得tio̍h chitê產業;阮ê對敵已經thún踏祢ê聖所。 | |
63:19 | 阮親像tùi古早m̄ bat hō͘祢治理ê人,親像m̄ bat用祢ê名來稱呼ê。 |