章節 | 全民台語聖經漢羅經文 | 註釋 |
19:1 | 上主beh懲罰埃及關係埃及ê默示。你看,上主坐真緊ê雲臨到埃及。埃及ê偶像tī祂ê面前phi̍h-phi̍h chhoah;埃及人ê心tī hit內面消熔。 | |
19:2 | 我beh激動埃及人攻擊埃及人,兄弟攻擊兄弟,厝邊攻擊厝邊,城攻擊城,國攻擊國。 | |
19:3 | 埃及人ê心神ē tī內面失膽,我beh敗壞in ê計謀。In會求偶像kah念咒ê、做童乩ê,以及行邪術ê。 | |
19:4 | 我beh kā埃及人交tī殘忍ê主人ê手,強暴ê王ē kā in管轄。這是主—萬軍ê上主講ê。 | |
19:5 | 海中ê水會絕斷,河水ē消失乾去。 | |
19:6 | 江河ē變臭,埃及ê河水會減少,koh乾乾去;蘆葦kah蘆竹lóng ē乾去。 | |
19:7 | 河邊kah河口ê草埔,以及河邊所栽種ê lóng ē乾去,受掃除,消失去。 | |
19:8 | 討魚ê人ē啼哭,放釣餌tī河裡ê人ē悲傷;拋網tī水裡ê人ē衰敗。 | |
19:9 | 織幼苧布kah織白布ê人lóng ē見笑。 | |
19:10 | 國家ê石柱會tú tio̍h phah碎,所有倩工ê心ē煩惱。 | |
19:11 | 瑣安ê首領非常愚戇!法老大智慧ê謀士所計畫ê成做愚蠢。Lín ná敢對法老講:我是智慧人ê kiáⁿ孫,我是古早君王ê kiáⁿ孫? | |
19:12 | 你ê智慧人chitmá tī tó位?萬軍ê上主關係埃及所定tio̍h ê旨意,in thang來hō͘你知,thang kā你講à。 | |
19:13 | 瑣安ê首領lóngē變做戇人,挪弗ê首領lóngē受迷惑;埃及支族ê厝角頭ê石chhōa它ê人民tī迷路。 | |
19:14 | 上主用lāmsám ê神靈摻入去tī in中間,致使in chhōa埃及所行ê一切lóng出差錯,親像食酒醉ê人teh東倒西歪。 | |
19:15 | 埃及ê中間無論頭kah尾,棕枝kah蘆葦所做ê工,無一項會成。 | |
19:16 | 埃及會敬拜上主到hit日,埃及ē親像chabó͘人,koh ē驚惶phi̍h-phi̍h chhoah。因為萬軍ê上主ê手ê舞弄,to̍h是祂tī in ê頂面所舞弄ê,ē來kā in刑罰。 | |
19:17 | 偤大地會成做埃及所驚惶ê,見若對伊講起偤大地伊to̍h驚惶。這是萬軍ê上主對埃及所定tio̍h ê旨意。 | |
19:18 | 當hit日,埃及地ē有五個城講迦南ê腔口,koh kí萬軍ê上主來chiùchōa。ē有一个叫做滅亡ê城。 | |
19:19 | 當hit日,tī埃及地ê中間,ē為tio̍h上主起一座壇;tī埃及ê邊界,ē為上主khiā一支柱。 | |
19:20 | 這lóngē tī埃及地為萬軍ê上主做記號kah證據。埃及人因為受人ê制壓,哀求上主,祂to̍h差一位獻身者,to̍h是有才能ê來kā in拯救。 | |
19:21 | 上主beh hō͘埃及人bat祂,tī hit日,埃及人一定ēbat上主,mā ē獻祭物kah禮物kā祂敬拜,koh對上主下願kah謝願。 | |
19:22 | 上主ēphah埃及,沿路phah沿路醫治,in ē就ánne歸向上主。祂ē聽in ê祈禱,來kā in醫治。 | |
19:23 | 當hit日,ē有大路tùi埃及透到亞述。亞述人ē入去埃及,埃及人mā ē入去亞述;埃及人ē kah亞述人做伙服事上主。 | |
19:24 | 當hit日,以色列ē kah埃及chham亞述,三个平等做伙存在,hō͘地chiūⁿê人lóng得tio̍h福氣。 | |
19:25 | 因為萬軍ê上主賜福in,講:「埃及—我ê人民,亞述我ê手所造ê,以色列我ê產業,人人lóng有福氣!」 |