| 章節 | 全民台語聖經全羅經文 | 註釋 |
| 10:1 | Sí ê hô͘-sîn ē hō͘ chò phang-liāu ê iû hoat-chhut chhàu-bī; ánne, chi̍t-tiám-á ê gû-gōng mā ē pāi-hoāi tōa tì-hūi kah chun-kùi. | 註釋 串珠 康來昌 字典 原文 典藏 |
| 10:2 | Tì-hūi ê lâng ê sim sī tī i ê chiàⁿ chhiú pêng, gû-gōng ê lâng ê sim sī tī i ê tò chhiú pêng. | 註釋 串珠 康來昌 原文 典藏 |
| 10:3 | Jî-chhiáⁿ gōng lâng kiâⁿ tī lō͘-.ni̍h, khiàm-khoeh tì-hūi, tùi chèng lâng kóng i sī gōng lâng. | 註釋 串珠 康來昌 字典 原文 典藏 |
| 10:4 | Nā-sī chiáng-koân-.ê ê sim-sîn siūⁿ beh kong-kek lí, m̄ thang lī-khui lí ê pún ūi, in-ūi un-hô ē bián-tit tōa ê kòe-sit. | 註釋 串珠 康來昌 原文 典藏 |
| 10:5 | Góa khòaⁿ tio̍h ji̍t-kng ê ē-bīn ū chi̍t hāng m̄-hó, chhin-chhiūⁿ sī chhut tī chiáng-koân-.ê ê chhò-gō͘; | 註釋 串珠 康來昌 原文 典藏 |
| 10:6 | to̍h-sī an-tì gōng lâng tī koân ūi, hó-gia̍h lâng chē tī kē ūi. | 註釋 串珠 康來昌 原文 典藏 |
| 10:7 | Góa khòaⁿ tio̍h lô͘-po̍k khiâ bé, kùi-cho̍k chhin-chhiūⁿ lô͘-po̍k kiâⁿ tī tē-.ni̍h. | 註釋 串珠 康來昌 字典 原文 典藏 |
| 10:8 | Ku̍t hām-kheⁿ ê lâng ē kakī poa̍h lo̍h-khì hit lāi-bīn; thiah chhiûⁿ ê lâng ē hō͘ chôa kā-.tio̍h. | 註釋 串珠 康來昌 字典 原文 典藏 |
| 10:9 | Phah chio̍h ê lâng ē hō͘ chio̍h-thâu siong-.tio̍h, phòa chhâ ê lâng ē tú tio̍h gûi-hiám. | 註釋 串珠 康來昌 原文 典藏 |
| 10:10 | Thih-khì í-keng tūn, nā bô bôa lāi i ê chhùi, chiū tio̍h ke chhut chin chē la̍t; to̍k-to̍k tit tio̍h tì-hūi ê kà-sī chiū ū lī-ek. | 註釋 串珠 康來昌 原文 典藏 |
| 10:11 | Iáu-bōe liām chiù ê sî, chôa nā kā tio̍h lâng, liām-chiù ê lâng chiū bô lī-ek. | 註釋 串珠 康來昌 字典 原文 典藏 |
| 10:12 | Tì-hūi ê lâng só͘ kóng ê sī un-hūi ê ōe; gû-gōng ê chhùi thun-bia̍t kakī. | 註釋 串珠 康來昌 原文 典藏 |
| 10:13 | I ê chhùi só͘ kóng ê ōe khí-thâu sī gû-gōng; i ê ōe ê lō͘-bóe sī hāi lâng ê tian-kông. | 註釋 串珠 康來昌 原文 典藏 |
| 10:14 | Gōng lâng chin kāu-ōe, to̍k-to̍k lâng m̄-chai chiong-lâi ē án-chóaⁿ; i sin-āu só͘ ē hoat-seng ê tāichì, siáⁿ lâng ē kā i kóng? | 註釋 串珠 康來昌 原文 典藏 |
| 10:15 | Gōng lâng ê lô-lo̍k tì-sú hō͘ in ià-siān, in-ūi liân ji̍p siâⁿ ê lō͘ i mā m̄-chai. | 註釋 串珠 康來昌 原文 典藏 |
| 10:16 | Pang-kok, lí ê ông nā-sī gín'á, lí ê kùi-cho̍k chá-khí sî iàn-lo̍k, lí chiū ū chai-hō. | 註釋 串珠 康來昌 原文 典藏 |
| 10:17 | Pang-kok, lí ê ông nā-sī chun-kùi ê lâng ê kiáⁿ, lí ê kùi-cho̍k chiàu-sî lim-chia̍h, ūi tio̍h beh pó͘ in ê thé-la̍t, m̄-sī in-ūi hò͘ⁿ lim, lí chiū ū hok-khì. | 註釋 串珠 康來昌 字典 原文 典藏 |
| 10:18 | In-ūi pîntōaⁿ ê lâng, chhù kòa ē lap lo̍h-.khì; ūi tio̍h chhiú pîntōaⁿ ê lâng, in ê chhù chiū ē lāu hō͘. | 註釋 串珠 康來昌 字典 原文 典藏 |
| 10:19 | Iàn-se̍k sī ūi tio̍h hoaⁿ-hí lâi siat, chiú sī beh hō͘ lâng khùiⁿ-oa̍h; chîⁿ-gîn sī beh chò bān-hāng sū ê lō͘-ēng. | 註釋 串珠 康來昌 字典 原文 典藏 |
| 10:20 | Lí m̄ thang chiù-chó͘ kun-ông, sim mā m̄ thang ánne siūⁿ; tī lí ê khùn-pâng mā m̄ thang chiù-chó͘ hó-gia̍h lâng, in-ūi khong-tiong ê poe-chiáu ē thoân-pò͘ chit-ê siaⁿ, ū si̍t-kó͘ ê mā ē kóng-khí chit-ê tāichì. | 註釋 串珠 康來昌 字典 原文 典藏 |