章節 | 全民台語聖經全羅經文 | 註釋 |
25:1 | Iô-tah Ông A-má-chiah( LOH 14: 2-6)A-má-chiah chē-ūi ê sî jī-cha̍p gō͘ hòe, tī Ê-lú-sa-lèm chò ông kiōng jī-cha̍p káu nî. I ê lāu-bú ê miâ kiò-chò E-ho-a-tan, sī Ê-lú-sa-lèm lâng. | 註釋 串珠 原文 典藏 |
25:2 | A-má-chiah kiâⁿ Siōng-chú só͘ khòaⁿ-chò hó ê tāichì, chóng-.sī, sim bô choan-it. | 註釋 串珠 原文 典藏 |
25:3 | I ê kok-koân í-keng kian-kò͘, chiū thâi-sí chêng chhì-kek i ê lāu-pē Iô-tah ông hiahê jîn-sîn, | 註釋 串珠 原文 典藏 |
25:4 | chóng-.sī, bô kā in ê kiáⁿ thâi-sí, sī chiàu Mô͘-se lu̍t-hoat ê chheh só͘ kì-chài, Siōng-chú bēng-lēng kóng, " M̄-thang in-ūi kiáⁿ lâi thâi-sí lāu-pē, mā m̄ thang in-ūi lāu-pē lâi thâi-sí kiáⁿ, ta̍k lâng tio̍h ūi tio̍h kakī pún-sin ê chōe lâi sí. " | 註釋 串珠 字典 原文 典藏 |
25:5 | E-tóm ê Chiàn-cheng( LOH 14: 7)A-má-chiah chū-chi̍p Iô-tah lâng, chiàu Iô-tah kah Biān-iá-mín ê chong-cho̍k, siat-li̍p iâⁿ-tiúⁿ, liân-tiúⁿ lâi chhōa in, koh sǹg lâng-gia̍h, tùi jī-cha̍p hòe í-siōng, tit tio̍h kòe kéng ê peng, ē gia̍h chhiuⁿ, kōaⁿ tîn-pâi chiūⁿ-tīn ê, kiōng saⁿ-cha̍p bān. | 註釋 串珠 字典 原文 典藏 |
25:6 | Koh ēng gîn chi̍t pah tha-lan-t, tùi I-su-la-el chio-bō͘ tōa lêng-le̍k ê ióng-sū, cha̍p bān lâng. | 註釋 串珠 字典 原文 典藏 |
25:7 | Ū Siōng-tè ê lô͘-po̍k lâi kìⁿ i kóng, " Ông, m̄ thang hō͘ I-su-la-el ê kun-peng kah lí khì, in-ūi Siōng-chú bô kah I-su-la-el lâng, to̍h-sī E-hu-laim ê kiáⁿ-sun tông-chāi. | 註釋 串珠 原文 典藏 |
25:8 | Lí nā it-tēng beh khì, chiū tio̍h hùn-ióng cheng-chiàn! Siōng-chú ē hō͘ lí pāi tī tùi-te̍k ê bīn-chêng, in-ūi Siōng-chú ū koân ē pang-chān lâng, mā ē chhia-tó lâng. " | 註釋 串珠 原文 典藏 |
25:9 | A-má-chiah mn̄g Siōng-tè ê lô͘-po̍k kóng, " Góa í-keng ēng gîn chi̍t pah tha-lan-t hō͘ I-su-la-el ê kun-tūi, hiahê beh án-chóaⁿ lè? " Siōng-tè ê lô͘-po̍k ìn kóng, " Siōng-chú ē kā pí chiahê khah chē hō͘ lí. " | 註釋 串珠 字典 原文 典藏 |
25:10 | Chiū ánne, A-má-chiah hō͘ hiahê tùi E-hu-laim lâi ê kun-peng tńg-khì in tau. Só͘-í, in chin siū-khì Iô-tah lâng, khì phut-phut tńg-khì in tau. | 註釋 串珠 原文 典藏 |
25:11 | A-má-chiah kakī hùn-ióng, chhōa i ê jîn-bîn chhut-khì kàu iâm ê soaⁿ-kok, thâi-sí Se-il lâng chi̍t bān. | 註釋 串珠 原文 典藏 |
25:12 | Iô-tah lâng koh oa̍h-lia̍h chi̍t bān lâng, ah lâi-kàu soaⁿ-khàm téng, tùi soaⁿ-khàm téng kā in chhia lo̍h-.khì, tì-sú in lóng siak kah chhùi-chhùi. | 註釋 串珠 原文 典藏 |
25:13 | A-má-chiah só͘ chhe tńg-khì hiahê kun-tūi, m̄-chún in kah i khì kau-chiàn ê, in kong-kek Iô-tah hiahê siâⁿ, tùi Sa-má-lī-a kàu Bia̍t-ho-lông, thâi-sí saⁿ chheng lâng, chhiúⁿ chin chē mi̍h. | 註釋 串珠 原文 典藏 |
25:14 | A-má-chiah thâi E-tóm lâng tò tńg-.lâi, chiū tòa Se-il cho̍k hiahê sîn-bêng, li̍p i chò kakī ê sîn-bêng, tī i ê bīn-chêng kūi-pài, sio hiuⁿ hō͘ i. | 註釋 串珠 字典 原文 典藏 |
25:15 | In-ūi ánne, Siōng-chú tùi A-má-chiah tōa siū-khì, chiū chhe chi̍t-ê sian-ti khì kìⁿ i, kóng, " Hiahê jîn-bîn ê sîn-bêng bē tàng kiù in ê jîn-bîn thoat-lī lí ê chhiú, lí ná ē kiû in? " | 註釋 串珠 原文 典藏 |
25:16 | I kah i kóng-ōe ê sî, ông kā i kóng, " Goán kám sī siat-li̍p lí chò ông ê bô͘-sū? Lí tiām-tiām, beh thó phah, sī-.bô? " Sian-ti chiū tiām-tiām, koh kóng, " Góa chai Siōng-tè tiāⁿ tio̍h ì-sù beh bia̍t lí, in-ūi lí chò chit-ê tāichì, m̄-thiaⁿ góa ê khoàn-kái. " | 註釋 串珠 原文 典藏 |
25:17 | Iô-tah Kong-táⁿ I-su-la-el( LOH 14: 8-20)Hit sî, Iô-tah ông A-má-chiah chham-siông chhe sù-chiá khí kìⁿ E-hú ê sun, E-hoa-há-chuh ê kiáⁿ, I-su-la-el ông Io-a-si, kóng, " Lâi! Lán nn̄g lâng tī chiàn-tiûⁿ kìⁿ-bīn. " | 註釋 串珠 原文 典藏 |
25:18 | I-su-la-el ông Io-a-si chhe sù-chiá khì kìⁿ Iô-tah ông A-má-chiah kóng, " Le-ba-nòng ê chháu-chhì chhe sù-chiá khì kìⁿ Le-ba-nòng ê pek-hiuⁿ chhiū kóng, ' Kā lí ê chabó͘ kiáⁿ hō͘ góa ê kiáⁿ chò bó͘. ' Āu-lâi, Le-ba-nòng ū chi̍t chiah iá-siù keng-kòe thún-ta̍h hit-ê chháu-chhì. | 註釋 串珠 字典 原文 典藏 |
25:19 | Taⁿ lí kóng, lí í-keng phah-iâⁿ E-tóm, lí ê sim chiū kiau, tì-sú lí khoa-kháu. Lí tī chhù lāi an-jiân tòa chiū hó, ná ē beh khí-sū jiá chai-hō, hō͘ lí pún-sin kah Iô-tah kok chò-hóe tó-hoāi? " | 註釋 串珠 原文 典藏 |
25:20 | Chóng-.sī, A-má-chiah m̄-khéng thiaⁿ, in-ūi chit-ê tāichì sī chhut tī Siōng-tè, beh kā in kau tī tùi-te̍k ê chhiú, in-ūi in cháu-chhōe E-tóm hiahê sîn-bêng. | 註釋 串珠 原文 典藏 |
25:21 | Chiū ánne, I-su-la-el ông Io-a-si khí-.lâi, tī Iô-tah ê Bia̍t-si-mé-si kah Iô-tah ông A-má-chiah tī chiàn-tiûⁿ sio kìⁿ-bīn. | 註釋 串珠 原文 典藏 |
25:22 | Iô-tah tī I-su-la-el ê bīn-chêng thâi-su, ta̍k lâng cháu tńg-khì in ê pò͘-pêⁿ. | 註釋 串珠 原文 典藏 |
25:23 | I-su-la-el ông Io-a-si, tī Bia̍t-si-mé-si lia̍h tio̍h E-hoa-há-chuh ê sun, Io-a-si ê kiáⁿ Iô-tah ông A-má-chiah, chiū ah i kàu Ê-lú-sa-lèm, koh thiah-húi Ê-lú-sa-lèm ê siâⁿ chhiûⁿ, tùi E-hu-laim mn̂g kàu kak mn̂g, kiōng sì pah tiú. | 註釋 串珠 字典 原文 典藏 |
25:24 | Koh chhú Siōng-chú tiān lāi O-biat-e-tóm só͘ kò͘-siú ê kim, gîn, khì-kū kah ông-kiong ê châi-pó, koh lia̍h lâng chò chún-tǹg, chiū tńg-khì Sa-má-lī-a. | 註釋 串珠 字典 原文 典藏 |
25:25 | I-su-la-el ông E-hoa-há-chuh ê kiáⁿ Io-a-si sí liáu-āu, Iô-tah ông Io-a-si ê kiáⁿ A-má-chiah iáu oa̍h cha̍p gō͘ nî. | 註釋 串珠 原文 典藏 |
25:26 | A-má-chiah kî-tha ê tāichì, tùi-thâu kàu-bóe, kám bô lóng kì tī Iô-tah kah I-su-la-el chiahê ông ê kì-lio̍k? | 註釋 串珠 字典 原文 典藏 |
25:27 | Tùi A-má-chiah phian-lī bô tòe Siōng-chú liáu-āu, tī Ê-lú-sa-lèm ū lâng kiat-tóng beh hāi i, i chiū cháu kàu La̍h-ki-sih; in chhe lâng jiok i kàu La̍h-ki-sih, tī hia kā i thâi-sí. | 註釋 串珠 原文 典藏 |
25:28 | Lâng chiū ēng bé chài i ê sin-si tńg-lâi kah i ê chó͘-sian tâng bâi-chòng tī Iô-tah ê siâⁿ. | 註釋 串珠 字典 原文 典藏 |