| 章節 | 全民台語聖經全羅經文 | 註釋 |
| 17:1 | Ná-than hō͘ Ta-bi̍t ê Sìn-sit( SMH 7: 1-17)Ta-bi̍t tòa tī i ê kiong lāi, Ta-bi̍t tùi Ná-than sian-ti kóng, " Lí khòaⁿ, góa tòa tī pek-hiuⁿ chhâ ê kiong lāi, chóng-.sī, Siōng-chú ê iok-kūi tī tiùⁿ-pâng lāi. " | 註釋 串珠 字典 原文 典藏 |
| 17:2 | Ná-than kā Ta-bi̍t kóng, " Kiàn-nā tī lí sim-lāi só͘ siūⁿ ê, thang chiàu ánne kiâⁿ, in-ūi Siōng-chú kah lí tông-chāi. " | 註釋 串珠 原文 典藏 |
| 17:3 | Hit mê, Siōng-chú ê ōe lîm-kàu Ná-than kóng, | 註釋 串珠 原文 典藏 |
| 17:4 | " Lí khì kā Góa ê lô͘-po̍k — Ta-bi̍t kóng: Siōng-chú ánne kóng, ' Lí m̄ thang khí chhù hō͘ Góa tòa, | 註釋 串珠 原文 典藏 |
| 17:5 | in-ūi tùi Góa chhōa I-su-la-el khí-.lâi ê ji̍t kàu kin-á-ji̍t, Góa m̄ bat tòa tī chhù lāi, sī tùi chit-ê pò͘-pêⁿ kàu hit-ê pò͘-pêⁿ, tùi chit-ê tiùⁿ-pâng kàu hit-ê tiùⁿ-pâng. | 註釋 串珠 字典 原文 典藏 |
| 17:6 | Kiàn-nā Góa kah I-su-la-el lâng só͘ kàu ê só͘-chāi, tī Góa só͘ hoan-hù chiàu-kò͘ Góa ê jîn-bîn ê I-su-la-el ê sū-su tiong, Góa kám bat tùi in chi̍t-ê lâng kóng, ' Lí ná ē bô kā Góa khí pek-hiuⁿ chhâ ê chhù? ' | 註釋 串珠 字典 原文 典藏 |
| 17:7 | " Taⁿ lí tio̍h khì kā Góa ê lô͘-po̍k — Ta-bi̍t kóng: Bān-kun ê Siōng-chú ánne kóng, ' Góa bat tī iûⁿ-tiâu, tùi teh kò͘ iûⁿ lâi tiàu lí, chò Góa ê chú-bîn — I-su-la-el lâng ê kun-ông. | 註釋 串珠 字典 原文 典藏 |
| 17:8 | Kiàn-nā lí só͘ bat khì ê só͘-chāi, Góa tiāⁿtiāⁿ kah lí tông-chāi, tī lí ê bīn-chêng châu-bia̍t lí só͘-ū ê tùi-te̍k; Góa beh hō͘ lí tōa chhut-miâ, chhin-chhiūⁿ tē-chiūⁿ chiahê úi-jîn ê miâ-siaⁿ. | 註釋 串珠 原文 典藏 |
| 17:9 | Jî-chhiáⁿ Góa ē kā Góa ê chú-bîn — I-su-la-el lâng tiāⁿ tio̍h chi̍t-ê só͘-chāi, lâi chai-pôe in, hō͘ in tòa kakī ê só͘-chāi, bô koh chhian-sóa; hiong-ok ê lâng mā bô chhin-chhiūⁿ khí-thâu ánne kā in hām-hāi, | 註釋 串珠 原文 典藏 |
| 17:10 | mā bô chhin-chhiūⁿ Góa bēng-lēng sū-su tī-lí Góa ê chú-bîn — I-su-la-el lâng ê sî. Góa ē hō͘ lí ê tùi-te̍k lóng khut-ho̍k. Góa koh kā lí kóng, Siōng-chú ē kā lí kiàn-li̍p chi̍t-ê ke. | 註釋 串珠 原文 典藏 |
| 17:11 | Kàu lí ê ji̍t-chí boán-chiok, tńg-khì lí ê chó͘-sian hia, Góa ē hō͘ lí ê kiáⁿ-sun sòa-chiap lí ê ūi, Góa mā ē kian-kò͘ i ê kok-ūi. | 註釋 串珠 原文 典藏 |
| 17:12 | I ē kā Góa khí chhù, Góa ē kian-kò͘ i ê chō-ūi kàu éng-oán. | 註釋 串珠 字典 原文 典藏 |
| 17:13 | Góa ē chò i ê Thiⁿ-pē, i ē chò Góa ê kiáⁿ; Góa bô beh hō͘ Góa ê chû-ài lī-khui i, chhin-chhiūⁿ Góa chá-chêng hō͘ i lī-khui hit-ê lí chêng chi̍t-ê ông. | 註釋 串珠 原文 典藏 |
| 17:14 | Góa mā ē éng-oán kian-kò͘ i tī Góa ê ke, tī Góa ê kok; i ê chō-ūi mā ē kian-kò͘ kàu éng-oán. '" | 註釋 串珠 字典 原文 典藏 |
| 17:15 | Ná-than chiū chiàu chiahê ōe, chiahê be̍k-sī, khì kā Ta-bi̍t kóng. | 註釋 串珠 原文 典藏 |
| 17:16 | Ta-bi̍t Kám-un ê Kî-tó( SMH 7: 18-29)Ta-bi̍t ông chiū ji̍p-.khì, chē tī Siōng-chú ê bīn-chêng, kóng, " Siōng-chú — Siōng-tè ah, góa sī siáⁿ lâng, góa sī siáⁿ-mi̍h hō ê ke, Lí chiah chhōa góa kàu chit-ê tē-pō͘? | 註釋 串珠 原文 典藏 |
| 17:17 | Siōng-tè ah, Lí khòaⁿ chit-ê iáu lia̍h-chò sī sió-khóa, in-ūi Lí koh kóng tio̍h Lí ê lô͘-po̍k ê ke kàu tī kú-tn̂g. Siōng-chú — Siōng-tè ah, Lí khoán-thāi góa chhin-chhiūⁿ chun-kùi ê lâng ê tē-ūi. | 註釋 串珠 原文 典藏 |
| 17:18 | Ta-bi̍t iáu ū siáⁿ-mi̍h ōe thang tùi Lí kóng-kàu Lí ê lô͘-po̍k só͘ tit tio̍h ê chun-kùi? In-ūi Lí chin liáu-kái Lí ê lô͘-po̍k. | 註釋 串珠 原文 典藏 |
| 17:19 | Siōng-chú ah, in-ūi Lí ê lô͘-po̍k ê iân-kò͘, koh chiàu Lí ê sim-ì, Lí ū kiâⁿ chit-ê tōa sū, koh hián-chhut chiahê tōa sū. | 註釋 串珠 原文 典藏 |
| 17:20 | Siōng-chú ah, chiàu goán ê hīⁿ-khang só͘ thiaⁿ-.tio̍h ê, bô chi̍t-ê chhin-chhiūⁿ Lí, Lí í-gōa bô pa̍t-ê chin-sîn. | 註釋 串珠 原文 典藏 |
| 17:21 | Tē chiūⁿ ū tó chi̍t kok chhin-chhiūⁿ Lí ê chú-bîn — I-su-la-el lâng, to̍h-sī Siōng-chú chá-chêng khì kiù-sio̍k in lâi chò kakī ê jîn-bîn, hō͘ Lí tùi ke̍k tōa koh thang kiaⁿ ê tāichì tit tio̍h miâ, in-ūi kóaⁿ-tio̍k lia̍t kok lī-khui Lí ê chú-bîn, to̍h-sī Lí só͘ kiù-sio̍k chhut Ai-gi̍p hiahê jîn-bîn ê bīn-chêng. | 註釋 串珠 原文 典藏 |
| 17:22 | In-ūi Lí hō͘ Lí ê chú-bîn — I-su-la-el lâng chò Lí ê chú-bîn, it-ti̍t kàu éng-oán; Siōng-chú ah, Lí mā chò in ê Siōng-tè. | 註釋 串珠 原文 典藏 |
| 17:23 | Siōng-chú ah, taⁿ Lí só͘ kóng tio̍h Lí ê lô͘-po̍k kah i ê ke ê ōe, goān i kian-kò͘ kàu éng-oán, kiû Lí chiàu Lí só͘ kóng-lâi kiâⁿ. | 註釋 串珠 原文 典藏 |
| 17:24 | Goān Lí ê miâ éng-oán kian-kò͘, siū chun chò tōa, kóng, ' Bān-kun ê Siōng-chú sī I-su-la-el ê Siōng-tè, sī chò I-su-la-el ê Siōng-tè. ' Lí ê lô͘-po̍k — Ta-bi̍t ê ke ē tī Lí ê bīn-chêng kian-kò͘. | 註釋 串珠 原文 典藏 |
| 17:25 | Góa ê Siōng-tè ah, in-ūi Lí ū khé-sī hō͘ Lí ê lô͘-po̍k chai, Lí ē kā i kiàn-li̍p chi̍t-ê ke, só͘-í, Lí ê lô͘-po̍k hó-táⁿ tī Lí ê bīn-chêng kî-tó. | 註釋 串珠 原文 典藏 |
| 17:26 | Siōng-chú ah, chí ū Lí sī Siōng-tè, Lí ēng chit-ê hok-khì èng-ín Lí ê lô͘-po̍k. | 註釋 串珠 原文 典藏 |
| 17:27 | Taⁿ Lí hoaⁿ-hí sù-hok hō͘ Lí ê lô͘-po̍k ê ke, hō͘ i éng-oán tī Lí ê bīn-chêng. Siōng-chú ah, in-ūi Lí í-keng sù-hok, góa it-tēng éng-oán tit tio̍h hok-khì. " | 註釋 串珠 原文 典藏 |