撒母耳記上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
12:1 撒母耳離開前ê苦勸
撒母耳kā以色列人民講:「見若lín對我所講ê話,我lóng有聽tio̍h,設立一个王來管lín。
12:2 你看,taⁿ有一个王行tī lín ê面前。我已經老ā,頭毛mā白,我ê kiáⁿ lóng tī lín chia。我tùi少年到taⁿ,lóng行tī lín ê面前。
12:3 我tī chia,lín tio̍h tī上主ê面前kah祂所抹油ê ê面前,kā我做見證。我有牽啥人ê牛?牽啥人ê驢á?欺負啥人?壓制啥人?對啥人ê手接受人ê烏紗,致使遮我ê目chiu ?若有,我ē還lín。」
12:4 民眾講:「你m̄ bat欺負阮,m̄ bat壓制阮,mā m̄ bat tùi人ê手the̍h啥物物。」
12:5 撒母耳kā in講:「Lín tī我ê手無chhōe tio̍h啥物物,今á日上主對lín做見證,祂所抹油ê,mā做見證。」 In講:「願祂做見證。」
12:6 撒母耳kā人民講:「早前設立摩西kah亞倫ê,chhōa lín ê祖先出埃及ê是上主。
12:7 Taⁿ lín tio̍h khiā ·leh,我beh tī上主ê面前kah lín辯論上主對lín kah lín ê祖先所行一切公義ê tāichì。
12:8 早前雅各來到埃及,lín ê祖先mā有求叫上主,hit時,上主to̍h差摩西kah亞倫chhōa lín ê祖先出埃及,hō͘ in tòa tī chitê所在。
12:9 總是,in bē記得上主—in ê上帝,祂to̍h kā in賣hō͘ 夏瑣ê軍長西西拉ê手,kah腓利士人ê手,kah摩押王ê手,一直到hiahê人來kā in攻擊。
12:10 In求叫上主講:『阮有罪à,因為阮有離開上主,去服事巴力kah亞斯她錄。Taⁿ求祢救阮脫離阮對敵ê手,阮beh服事祢。』
12:11 上主to̍h差耶路巴力、Be-tàn、耶弗他kah撒母耳,來救lín脫離四箍圍對敵ê手,lín chiah平安tòa落去。
12:12 Lín看tio̍h亞捫人ê王拿轄來kā lín攻擊,to̍h對我講:『M̄-lah,阮定tio̍h beh一个王來管理阮。』其實上主—lín ê上帝to̍h是lín ê王。
12:13 Taⁿ看lín所揀所求ê王tī chia,你看,上主已經設立王來管lín。
12:14 Lín若敬畏上主,服事祂,聽祂ê話,無違背上主ê命令,lín kah kā lín管轄ê王mā順服上主—lín ê上帝to̍h好。
12:15 設使lín m̄遵thàn上主ê話,違背上主ê命令,上主ê手就ē kā lín攻擊,親像早前攻擊lín ê祖先ánne。
12:16 Taⁿ lín tio̍h khiā ·leh,來看上主tī lín ê目chiu 前所beh行ê大事。
12:17 今á日kám m̄是割小麥ê時?我求上主,祂ē起雷落雨,hō͘ lín mā知mā看出,lín為kakī 求設立王ê tāichì,tī上主ê面前所犯ê罪是真大。」
12:18 就ánne,撒母耳求叫上主,上主to̍h tī chit日起雷落雨,眾人to̍h真驚上主kah撒母耳。
12:19 人民kā撒母耳講:「求你替你chiahê奴僕求上主—你ê上帝,免得阮死亡,因為阮為kakī 求一个王,真正是tī罪ê頂面加添罪。」
12:20 撒母耳kā人民講:「M̄免驚,lín雖然行chitê pháiⁿ,總是,m̄ thang偏離無tòe上主,獨獨tio̍h盡心服事上主。
12:21 M̄-thang偏離,因為偏離to̍h是遵thàn虛假ê物,無利益,mā無拯救ê,因為in是虛假。
12:22 上主為tio̍h kakī ê大名,一定無棄sak祂ê子民,因為上主歡喜kā lín當做祂ê子民。
12:23 講到我替lín祈禱,絕對無停soah,致使得罪上主,我ē用好koh正直ê路kā lín指示。
12:24 獨獨lín tio̍h敬畏上主,誠心實意服事祂,因為lín tio̍h ē記得祂為lín所做ê tāichì有gōa大。
12:25 Lín若猶原做pháiⁿ,lín kah lín ê王會做一下滅亡。」
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。