民數記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
8:1 安置七盞燈
上主吩咐摩西講:
8:2 「你吩咐亞倫kā伊講:你點燈ê時,七盞燈lóng tio̍h tī燈台前照光。」
8:3 亞倫照ánne行,點燈照光tī燈台前,是照上主命令摩西ê。
8:4 Chitê燈台ê做法,是用金phah-ê,連它ê座kah它ê花lóng是phah-ê。摩西製造燈台,是照上主所指示ê款式。
8:5 利未人ê潔淨kah奉獻
上主吩咐摩西講:
8:6 「你tio̍h tùi以色列人ê中間揀出利未人,hō͘ in清氣。
8:7 Hō͘ in清氣tio̍h ánne行:用除去罪ê水hiù tī in身軀,koh kah in用剃頭刀剃全身軀,洗衫褲,清氣本身。
8:8 後來,in tio̍h取一隻牛káng-á kah伊ê素祭,to̍h是調和油ê幼麵粉;你tio̍h另外取一隻牛káng-á做贖罪祭。
8:9 你tio̍h chhōa利未人到會幕前,聚集以色列族ê全會眾。
8:10 Koh chhōa利未人到上主ê面前,以色列人tio̍h tī利未人ê頂面hōaⁿ手。
8:11 亞倫tio̍h獻利未人tī上主ê面前,做以色列人ê搖祭,hō͘ in thang做服事上主ê工。
8:12 利未人tio̍h tī hiahê牛káng-á ê頭殼頂hōaⁿ手;你tio̍h獻一隻做贖罪祭,koh獻一隻做燒祭hō͘上主,來kā利未人贖罪。
8:13 「你tio̍h hō͘利未人khiā tī亞倫kah伊ê kiáⁿ ê面前,獻in做搖祭hō͘上主。
8:14 Án-ne,你tio̍h tùi以色列人分別利未人,利未人to̍h beh歸tī我。
8:15 Chit時了後,利未人tio̍h入去做會幕ê工;你tio̍h hō͘ in清氣,獻in做搖祭,
8:16 因為in是tùi以色列中完全歸我ê,我揀選in來屬tī我,來替一切頭胎ê,to̍h是以色列人ê頭chiūⁿ ê。
8:17 因為以色列中一切頭chiūⁿ生ê,á是人,á是chengseⁿ,lóng是我ê。我tī埃及地phah死一切頭chiūⁿ生ê hit日,已經kā in分別做聖歸tī我。
8:18 我揀選利未人,來替以色列人一切頭chiūⁿ生ê。
8:19 我tùi以色列人中揀選利未人,賞賜亞倫kah伊ê kiáⁿ孫,thang替以色列人做會幕ê差用,koh為以色列人贖罪;免得以色列人óa近聖所ê時,有災禍臨到以色列人ê中間。
8:20 摩西kah亞倫以及以色列全會眾,to̍h對利未人ánne行;見若上主論起利未人所命令摩西ê,以色列人to̍h對in ánne行。
8:21 就ánne,利未人清氣kakī ,除去罪,洗in ê衫褲;亞倫kā in獻做搖祭tī上主ê面前,亞倫koh為in贖罪來hō͘ in清氣。
8:22 然後利未人入去,tī亞倫kah伊ê kiáⁿ ê面前,tī會幕中做in ê工。上主論利未人來命令摩西ê,以色列人to̍hánne對in行。
8:23 上主吩咐摩西講:
8:24 「論利未人是ánne:tùi二十五歲以上,in tio̍h來會幕做差用。
8:25 到五十歲to̍h停工,無koh做差用;
8:26 總是,tio̍h tī會幕,kah in ê兄弟做伙侍候,守所交帶ê,無koh做工;關係所交帶利未人ê,你tio̍h對in ánne行。」
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。