利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
14:1 癩ko病ê潔淨規定
上主吩咐摩西講：
14:2 「癩ko ê得tio̍h清氣ê日，伊ê規例to̍h是ánne：tio̍h chhōa伊去見祭司。
14:3 祭司tio̍h出來營外，祭司tio̍h kā伊驗，你看，癩ko ê，若伊ê癩ko症已經好，
14:4 祭司tio̍h吩咐人為tio̍h hitê beh得tio̍h清氣ê，取兩隻清氣活活ê鳥kah柏香柴，朱紅色ê料kah牛膝草。
14:5 祭司tio̍h吩咐人tī活水ê頂面thâi hit兩隻鳥ê一隻，tī磁器內。
14:6 關係hit隻活鳥，伊tio̍h掠來，用柏香柴、朱紅色ê料、牛膝草kah活鳥，lóng ùn tī hit隻tī活水頂面thâiê鳥ê血。
14:7 Tio̍h hiù hitê癩ko beh得tio̍h清氣ê人七pái，to̍h斷定伊做清氣，koh放hit隻活鳥去山裡。
14:8 Beh得tio̍h清氣ê人tio̍h洗伊ê衫褲，剃伊全部ê毛，用水洗身軀就清氣；然後thang入去營內，總是，tio̍h tī kakī ê布棚外tòa七日。
14:9 到第七日，tio̍h剃伊全部ê頭毛kah嘴鬚，目眉，to̍h是剃伊所有ê毛，koh tio̍h洗伊ê衫褲，用水洗身軀，就清氣。
14:10 「到第八日，伊tio̍h取兩隻無缺點ê羊káng-á，kah一隻未滿年無缺點ê羊種á，koh tio̍h用調和油ê麵粉十分之三伊法做素祭，kah油一lok。
14:11 行清氣ê禮ê祭司，tio̍h kā hitê ài得tio̍h清氣ê人，kah hiahê物，安置tī會幕門口，上主ê面前。
14:12 祭司tio̍h取羊káng-á一隻，獻做補過失ê祭，kah油一lok，lóng搖tī上主ê面前做搖祭。
14:13 Koh tioh8thâi羊káng-á tī聖所ê所在，to̍h是thâi贖罪祭kah燒祭ê所在。補過失祭tio̍h歸hō͘祭司，親像贖罪祭仝款，是至聖ê。
14:14 祭司tio̍h the̍h淡薄á補過失祭ê血，抹tī ài得tio̍h清氣ê人正pêng ê耳á垂kah正手ê大頭拇，以及正腳ê大頭拇。
14:15 祭司tio̍h tùi hit一lok ê油中間the̍h淡薄á，倒tī kakī 倒手ê手中心。
14:16 祭司tio̍h用正手ê一支指頭á ùn倒手中心ê油，tī上主ê面前，用指頭á hiù油七pái。
14:17 祭司kā手中所chhun落來ê油，抹tī hitê ài得tio̍h清氣ê人正pêng ê耳á垂kah正手ê大頭拇，以及正腳ê大頭拇，to̍h是抹tha̍h tī補過失祭ê血頂面。
14:18 祭司手中所chhun落來ê油，tio̍h piàⁿ tī hitê ài得tio̍h清氣ê人ê頭殼頂，祭司tī上主ê面前kā伊贖罪。
14:19 「祭司tio̍h獻贖罪祭，kā hitê ài得tio̍h清氣ê人，為tio̍h伊ê無清氣贖罪，然後thâi hitê燒祭ê chengseⁿ。
14:20 祭司tio̍h tī壇頂獻燒祭kah素祭，祭司tio̍h為伊贖罪，伊to̍h清氣。
14:21 「伊若sànchhiah bē tàng準備到hiah chē，to̍h tio̍h取一隻羊káng-á做補過失ê祭，thang搖來為伊贖罪，mā tio̍h帶調和油ê幼麵粉十分之一伊法kah油一lok來做素祭。
14:22 Koh照伊ê氣力取兩隻斑鴿 á是兩隻粉鳥kiáⁿ，一隻做贖罪祭，一隻做燒祭。
14:23 到第八日，為tio̍h伊得tio̍h清氣，kā chiahê帶到會幕門口，上主ê面前，交帶祭司。
14:24 祭司tio̍h取補過失ê羊á kah油一lok，祭司tio̍h tī上主ê面前搖，來做搖祭。
14:25 伊tioh8thâi補過失祭ê羊á，祭司取淡薄á補過失祭ê血，抹tī hitê ài得tio̍h清氣ê人正pêng ê耳á垂，kah正手ê大頭拇kah正腳ê大頭拇。
14:26 祭司tio̍h kā淡薄油倒tī kakī 倒手ê手中心。
14:27 祭司用倒手裡ê油，tī上主ê面前，用正手ê一支指頭á hiù油七pái。
14:28 祭司koh用手中ê油抹淡薄tī hitê ài得tio̍h清氣ê人正pêng ê耳á垂，kah正手ê大頭拇，以及正腳ê大頭拇，to̍h是抹tī補過失祭ê血ê原位。
14:29 祭司手中所chhun落來ê油，tio̍h抹tī hitê ài得tio̍h清氣ê人ê頭殼，tī上主ê面前為伊贖罪。
14:30 伊tio̍h照伊ê氣力獻hiahê 斑鴿 ê一隻á是粉鳥kiáⁿ ê一隻，to̍h是照伊所會ê，
14:31 一隻做贖罪祭，一隻做燒祭，kah素祭做伙獻；祭司tio̍h tī上主ê面前，kā hitê ài得tio̍h清氣ê人贖罪。
14:32 人患tio̍h癩ko ê症頭，mā無力thang準備得tio̍h清氣ê禮物，hitê規例是ánne。」
14:33 厝內生菇ê規定
上主吩咐摩西kah亞倫講：
14:34 「Lín到我賞賜hō͘ lín做產業ê迦南地ê時，我用癩ko症染tio̍h一間厝，tī lín所得tio̍h做產業ê地；
14:35 厝主tio̍h去通知祭司，kā伊講：『照我看，厝內親像有症頭。』
14:36 祭司iáu未入去驗症頭ê chìn前，祭司to̍h tio̍h吩咐人，kā厝piàⁿ空，免得厝內所有ê bak tio̍h無清氣，然後祭司tio̍h入去驗hit間厝。
14:37 伊tio̍h驗hitê症頭，你看，症頭若tī厝ê壁有顯出青 á是紅ê凹痕，款式深入牆壁，
14:38 祭司tio̍h出hit間厝，到厝門口，封hit間厝七日。」
14:39 厝染Τio̍h癩ko症ê規定
「到第七日，祭司tio̍h koh去驗，你看，症頭若湠tī厝ê牆壁，
14:40 祭司to̍h tio̍h吩咐人kā hiahê染tio̍h症頭ê石iah起來，hiat tī城外無清氣ê所在。
14:41 Mā tio̍h叫人刨厝內ê四箍圍，所刨起來ê灰土，tio̍h piàⁿ tī城外無清氣ê所在。
14:42 Koh tio̍h用別塊石代替hiahê石，koh用灰土抹hit間厝。
14:43 「伊iah石，刨厝，抹灰了後，症頭若koh到，koh發現tī hit間厝，
14:44 祭司tio̍h koh入去驗，症頭若湠tī hit間厝，hit間厝是染tio̍h惡ê癩ko，是無清氣。
14:45 伊to̍htioh8拆hit間厝，它ê石，它ê柴kah它所有ê灰土，lóng搬出去城外，到無清氣ê所在。
14:46 Hit間厝封密ê時間，人若入去to̍h無清氣，到ê-hng。
14:47 睏tī hit間厝ê，tio̍h洗伊ê衫褲；tī hit間厝食ê mā tio̍h洗伊ê衫褲。
14:48 「Hit間厝抹灰了後，祭司入去驗，你看，若症頭無湠tī厝內，祭司to̍h tio̍h斷定hit間厝做清氣，因為症頭已經消滅去。
14:49 為tio̍h清氣hit間厝，tio̍h取兩隻鳥kah柏香柴，朱紅色料kah牛膝草。
14:50 Tio̍h tī活水頂，磁器ê內面thâi hit兩隻鳥ê一隻。
14:51 伊tio̍h the̍h hitê柏香柴、牛膝草、朱紅色ê料kah hit隻活鳥，lóng ùn tī hit隻受thâi ê鳥ê血kah活水，來hiù hit間厝七pái。
14:52 伊tio̍h用hit隻鳥ê血、活水、活鳥、柏香柴、牛膝草kah朱紅色料，來清氣hit間厝。
14:53 總是，tio̍h kā hit隻活鳥放tī城外ê山裡，ánne kā hit間厝贖罪，hit間厝就清氣。
14:54 「這是為tio̍h ta̍k種癩ko ê症頭kah瘡，
14:55 衫褲kah厝ê癩ko，
14:56 以及腫、癬、火斑所立ê規例，
14:57 來指明tang時是無清氣，tang時是清氣，這是癩ko ê規例。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。