加拉太書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權) 客語 現代客語 福州話 粵語和合本 希臘文(WH-NT) 下載檔案 關於語音聖經
3:1 靠律法á是信仰
Lín chiahê戇加拉太人!耶穌基督釘十字架,已經對lín顯明tī lín ê目chiu 前,kám m̄是?Taⁿ lín是去hō͘啥人迷去?
3:2 我kantaⁿ問lín一項tāichì:Lín前領受聖神是靠守律法,á是靠信所聽tio̍h ê福音?
3:3 Lín ná ē hiah戇?Lín既然tùi靠聖神開始,chitmá beh靠肉體來完成,是無?
3:4 Lín受hiah chē艱苦kám lóng無chhái工?一定是有路用chiah tio̍h。
3:5 亞伯拉罕是義人ê例
上帝賜lín聖神,koh tī lín中間行神跡,是因為lín守律法,á是因為lín信所聽tio̍h ê福音?
3:6 經典ánne講:亞伯拉罕信上帝,上帝to̍h kā伊看做是義人。(註:創15:16)
3:7 所以,lín tio̍h知,有信ê人chiah是亞伯拉罕ê kiáⁿ孫。
3:8 經典早to̍h看出,上帝beh hō͘外邦人tùi信來kah上帝有和好ê關係,所以,kā chitê好消息先傳hō͘亞伯拉罕,講:「萬邦ē因為你來受上帝ê祝福!」(註:創12:3)
3:9 Án-ne,所有信ê人,mā ē kah有信ê亞伯拉罕做伙受祝福!
3:10 Hiahê óa靠遵守律法ê人,lóng活tī咒詛下面,因為有記載:無遵守記tī律法書所規定來行ê人,lóng tio̍h受上帝咒詛。(註:申27:26)
3:11 Án-ne,無人ē tàng óa靠律法來kah上帝建立和好ê關係,因為經典有講:Tùi信來kah上帝有和好關係ê人ē得tio̍h活命。(註:哈2:4)
3:12 M̄ koh,律法m̄是用信做根據。經典有ánne講:遵守律法ê人ē靠hiahê律法來活。(註:利18:5)
3:13 基督已經受咒詛來救贖咱脫離律法ê咒詛,因為有記載:所有吊tī柴頭頂ê人,lóng tio̍h受上帝ê咒詛。(註:申21:23)
3:14 基督ánne做是beh kā亞伯拉罕ê福氣通過基督耶穌來賜hō͘外邦人,mā beh hō͘咱tùi信來領受上帝所應允ê聖神。
3:15 律法kah應允
兄弟姊妹,我用咱日常生活ê一个例來說明:契約一旦成立,to̍h bē用得kā它廢除á是加添。
3:16 上帝有kah亞伯拉罕以及伊ê kiáⁿ孫立約。經典並無指真chē人講:「kiáⁿ-kiáⁿ孫孫」。是講:「你ê kiáⁿ孫。」這是teh指一个人,to̍h是基督。
3:17 我ê意思是講:上帝有kah亞伯拉罕立約,koh答應beh守約。四百三十年後chiah出現ê律法bē tàng廢除hitê約,來hō͘上帝ê應允歸tī空空。
3:18 因為承接上帝所賜ê產業若是根據律法,to̍h無koh靠應允;總是,上帝賜產業hō͘亞伯拉罕是照應允。
3:19 Án-ne,律法有啥物路用?律法是為tio̍h beh hō͘人知啥物是過失,由天使通過一个中間人所設立ê,一直到hit位得tio̍h應允ê Kiáⁿ孫來臨ê時就結束。
3:20 M̄ koh,屬單方ê tāichì無需要中間人,上帝是單方teh做chit項tāichì。
3:21 律法ê緣起kah目的
Án-ne講起來,律法kah上帝ê應允kám有衝突?絕對無!因為若是律法ē hō͘人得tio̍h活命,人to̍h ē tàng靠律法來kah上帝建立和好ê關係。
3:22 總是,經典講萬民lóng圍tī罪惡內,上帝只有通過信耶穌基督,來做領受應允ê根據。Chiahê應允是beh賞賜hō͘ hiahê信ê人。
3:23 總是,tī chitê「信」ê時代來臨以前,咱受律法監視tiâu ·leh,一直到「信」ê時代,「信」chiah顯明出來為止。
3:24 Án-ne,tī基督來臨以前,律法做咱ê監護人,chhōa咱來歸基督,hō͘咱tùi「信」來kah上帝和好。
3:25 Tī基督內面成做一體
Chit-má「信」ê時代已經來臨,律法to̍h無koh做咱ê監護人。
3:26 Lín大家tùi信來kah基督耶穌結聯,lóng成做上帝ê kiáⁿ兒。
3:27 Lín所有領受洗禮來kah基督結聯ê人,lóng入tī基督,有祂ê活命。
3:28 Án-ne,無分偤太人á是外邦人,奴隸á是自由ê人,chapo͘人á是chabó͘人,tī基督耶穌內面lóng成做一體。
3:29 Lín既然屬基督,to̍h是亞伯拉罕ê kiáⁿ孫,to̍h ē tàng承受上帝對亞伯拉罕ê應允。
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。