利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
5:1 Tio̍h獻贖罪祭ê規定
「若有人犯罪，to̍h是聽tio̍h chiùchōa ê聲，伊本來tio̍h做見證，總是，所看tio̍h á是所知ê，伊m̄講，伊tio̍h擔當伊ê罪。
5:2 「若有人無意中摸tio̍h無清氣ê物，á是無清氣ê獸ê身屍，á是無清氣ê chengseⁿ ê身屍，á是無清氣ê蟲thōa ê身屍，伊雖然kakī mā m̄知，伊to̍h無清氣，伊to̍h算做有罪。
5:3 「Á是伊摸tio̍h別人ê無清氣，無論bak tio̍h啥物無清氣ê物致使無清氣，總是，伊kakī m̄知，到一下知，to̍h算做有罪。
5:4 「Á是有人隨便chiùchōa，嘴講beh做pháiⁿ，beh做好，無論人tī啥物tāichì隨便chiùchōa，伊kakī ā m̄知，到一下知，to̍h tī chiahê事ê一項，伊算做是有罪。
5:5 「伊tī chiahê事ê一項有罪，to̍h tio̍h承認伊所犯ê罪。
5:6 Mā tio̍h因為所犯ê罪，帶補過失ê祭到上主ê面前，to̍h是羊群中ê母ê，á是綿羊á，á是山羊做贖罪ê祭。關係伊ê罪，祭司tio̍h ánne kā伊贖。
5:7 「伊ê氣力若無夠額thang獻一隻羊á，to̍h tio̍h因為伊所犯ê罪，用兩隻斑鴿 á是兩隻粉鳥kiáⁿ，帶到上主ê面前做補過失ê祭：一隻做贖罪祭，一隻做燒祭。
5:8 伊tio̍h kā chiahê帶到祭司hia，祭司to̍h tio̍h tāi先獻hit隻做贖罪祭ê；tùi頷頸chūn牠ê頭，總是，m̄ thang kā牠破開。
5:9 伊mā tio̍h用chitê贖罪祭ê血hiù tī壇邊，所chhun 落來ê血tio̍h拚tī壇腳hō͘它流，這是贖罪祭。
5:10 伊tio̍h照例獻第二隻做燒祭，關係伊所犯ê罪，祭司tio̍h照ánne kā伊贖，伊to̍h ē得tio̍h赦免。
5:11 「伊ê氣力若無夠額thang獻兩隻斑鴿 á是兩隻粉鳥kiáⁿ，to̍h tio̍h因為伊所犯ê罪，帶伊ê禮物來，to̍h是幼ê麵粉十分之一伊法，做贖罪祭，m̄ thang落油，mā m̄ thang chham乳香，因為這是贖罪祭。
5:12 伊tio̍h kā禮物帶到祭司hia，祭司tio̍h la̍k一la̍k，來做伊ê記念，燒tī壇頂，照獻hō͘上主ê火祭，這是贖罪祭。
5:13 關係伊tī chit幾項tāichì ê中間所犯ê一項，祭司tio̍h ánne kā伊贖，伊to̍h ē得tio̍h赦免。所chhun落來ê lóng歸hō͘祭司，kah素祭相siâng。」
5:14 贖補過失ê祭ê規定
上主吩咐摩西講：
5:15 「人若tī上主ê聖物犯罪致使有過失，to̍h tio̍h用補過失ê祭來獻hō͘上主，照你所估舍客勒ê銀，to̍h是照聖所ê舍客勒，tùi羊群中取無缺點ê綿羊káng，來做補過失ê祭。
5:16 伊koh因為tī聖物ê錯誤tio̍h賠，另外tio̍h加五分之一交hō͘祭司。祭司tio̍h用補過失ê祭ê綿羊káng，替伊贖罪，伊to̍h ē得tio̍h赦免。
5:17 「若有人犯罪做上主所命令m̄ thang行ê一項事，伊雖然m̄知mā是有罪，to̍h tio̍h擔當伊ê罪。
5:18 伊tio̍h照你所估ê，tùi羊群中牽一隻無缺點ê綿羊káng，來交hō͘祭司做補過失ê祭，因為伊失誤犯tio̍h，伊mā m̄知，祭司to̍h替伊贖罪，伊to̍h ē得tio̍h赦免。
5:19 這是補過失ê祭，因為伊tī上主ê面前實在有過失。
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。