利未記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
4:1 為失誤犯罪來獻祭ê規定
上主吩咐摩西講:
4:2 「你tio̍h吩咐以色列人講:若有人犯罪,失誤犯tio̍h上主所命令m̄ thang行ê一項。
4:3 「若受抹油ê祭司犯罪,連累人民tī罪,to̍h tio̍h為伊所犯ê罪,用無缺點ê牛káng-á,獻hō͘上主做贖罪祭。
4:4 伊tio̍h牽牛káng-á到會幕門口,tī上主ê面前,tī牛káng-á ê頭殼頂hōaⁿ手,tī上主ê面前thâi hit隻牛káng-á。
4:5 受抹油ê祭司tio̍h取淡薄á牛káng ê血,帶到會幕。
4:6 祭司tio̍h用指頭á ùn血,tī上主ê面前,對聖所ê帳簾前,hiù血七pái。
4:7 祭司koh tio̍h用淡薄á血抹tī會幕內,tī上主ê面前,香壇hiahê角,伊mā tio̍h kā牛káng-á ê血lóng piàⁿ tī會幕門口ê燒祭ê壇腳。
4:8 伊tio̍h kā贖罪祭ê牛káng-á所有ê油lóng the̍h起來,蓋腹內ê油kah腹內所有ê油,
4:9 以及兩粒腰子kah in所有ê油,to̍h是óa近腰雙pêng ê油kah肝裡ê網紗,以及腰子,一概lóng the̍h起來,kah tùi謝恩祭ê牛káng-á所the̍h起來ê相siâng。
4:10 祭司tio̍h tī燒祭ê壇頂燒hiahê物件。
4:11 牛káng-á ê皮kah所有ê肉,以及伊ê頭,伊ê腿,伊ê腹內,伊ê屎,
4:12 to̍h是kui隻牛káng-á tio̍h帶出去營外到清氣ê所在,piàⁿ火灰ê所在,tī柴頂用火燒,一定tio̍h tī piàⁿ火灰ê所在燒。
4:13 「若是以色列全會眾做m̄ tio̍h,行上主所命令m̄ thang行ê一項致使有罪,tāichì iáu koh隱密,會眾iáu無看tio̍h 。
4:14 人一下知所犯ê罪,會眾to̍h tio̍h獻一隻牛káng-á-kiáⁿ做贖罪祭,牽來到會幕前。
4:15 會中ê長老to̍h tio̍h tī上主ê面前,tī牛káng-á ê頭殼頂hōaⁿ手,tio̍h tī上主ê面前thâi hit隻牛káng-á。
4:16 受抹油ê祭司tio̍h取淡薄牛káng-á ê血,帶到會幕來。
4:17 祭司tio̍h用指頭á ùn血tī上主ê面前,tī帳簾ê頭前,hiù七pái。
4:18 Koh tio̍h用淡薄á血抹tī會幕內,tī上主ê面前ê壇hiahê角,伊mā tio̍h用所有ê血,lóng piàⁿ tī會幕ê門口ê燒祭ê壇腳。
4:19 Tio̍h kā所有ê油lóng the̍h起來,hē tī壇頂燒。
4:20 Tio̍h親像所行tī贖罪祭ê牛káng-á ánne來行tī chit隻牛káng-á,祭司tio̍h ánne替in贖罪,into̍h ē得tio̍h赦免。
4:21 伊tio̍h kā牛káng-á帶出營外去燒,親像燒頭一隻牛káng-á相siâng,這是會眾ê贖罪祭。
4:22 「官長若有犯罪,失誤行上主—伊ê上帝所命令m̄ thang行ê一項事,致使有罪,
4:23 所犯ê罪到伊kakī 知影,to̍h tio̍h牽一隻無缺點ê山羊káng做伊ê禮物。
4:24 Tio̍h tī山羊ê頭殼頂hōaⁿ手,tī上主ê面前,ti7thâi燒祭ê chengseⁿ ê所在kā牠thâi,這是贖罪祭。
4:25 祭司tio̍h用指頭á the̍h淡薄贖罪祭ê血,抹tī燒祭ê壇hiahê角,kā血piàⁿ tī燒祭ê壇腳。
4:26 伊kā所有ê油lóng tio̍h燒tī壇頂,親像謝恩祭ê油相siâng。關係伊ê罪,祭司tio̍h ánne kā伊贖罪,伊to̍h ē得tio̍h赦免。
4:27 「人民中若有人錯誤犯罪,行上主所命令m̄ thang行ê一項事,致使有罪,
4:28 所犯ê罪到伊kakī 知影ê時,伊因為所犯ê罪,to̍h tio̍h牽一隻無缺點ê山羊母,做伊ê禮物。
4:29 Tio̍h tī贖罪chengseⁿ ê頭殼頂hōaⁿ手,tī燒祭ê所在thâi贖罪祭ê chengseⁿ。
4:30 祭司tio̍h用指頭á the̍h淡薄羊血,抹tī燒祭ê壇hiahê角,所有ê血lóng tio̍h piàⁿ tī壇腳裡。
4:31 Tio̍h kā牠所有ê油lóng the̍h起來,親像the̍h謝恩祭ê油相siâng,祭司tio̍h tī壇頂燒,tī上主ê面前做芳味,祭司tio̍h為伊贖罪,伊to̍h ē得tio̍h赦免。
4:32 「伊若牽一隻綿羊á做贖罪祭ê禮物,to̍h tio̍h牽一隻無缺點ê羊母。
4:33 Tio̍h tī贖罪chengseⁿ ê頭殼頂hōaⁿ手,ti7thâi燒祭ê所在thâi贖罪祭ê chengseⁿ。
4:34 祭司tio̍h用指頭á the̍h淡薄贖罪祭chengseⁿ ê血,抹tī燒祭ê壇hiahê角,所有ê血lóng tio̍h piàⁿ tī壇腳裡。
4:35 Tio̍h kā牠所有ê油lóng the̍h起來,親像謝恩祭the̍h去羊á ê油。祭司tio̍h tī壇頂燒,親像獻hō͘上主ê火祭。關係伊所犯tio̍h ê罪,祭司tio̍h ánne kā伊贖罪,伊to̍h ē得tio̍h赦免。
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。