路加福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權) 客語 現代客語 粵語和合本 希臘文(WH-NT) 下載檔案 關於語音聖經
11:1 關係祈禱ê教示
(太6:9-15;7:7-11)
耶穌tī一个所在祈禱。祈禱soah ê時,有一个門徒對祂講:「主ah,親像約翰有教示伊ê門徒祈禱,求祢mā教示阮祈禱。」
11:2 耶穌kā in講:「Lín祈禱ê時tio̍h ánne講:天父ah,願祢ê名聖,祢ê國臨到。
11:3 求祢ta̍k日照時賜阮食物。
11:4 赦免阮ê罪,因為阮mā有赦免辜負阮ê人。M̄-thang chhōa阮入去阮擔當bē起ê試探。」
11:5 耶穌koh kā門徒講:「Lín啥人若有朋友,你半暝去chhōe伊講:『朋友,the̍h三塊餅借我,
11:6 因為我有朋友旅行來chhōe我,我無物thang請伊食。』
11:7 你hitê朋友tùi內面應講:『Mài吵lah,門已經關,我kah gín-á tī床裡teh睏。我bē tàng起來the̍h hō͘你。』
11:8 我kā你講,雖然hitê人bē帶念tio̍h朋友情,起來the̍h餅hō͘你,伊iáu koh ē因為你ê迫切懇求,起來the̍h你所需要ê物hō͘你。
11:9 所以,我koh kā lín講,求ē得tio̍h,chhōe會chhōe ·tio̍h,phah門ē kā lín開。
11:10 因為有求to̍h ē得tio̍h,有chhōe to̍h ēchhōe ·tio̍h,有phah門就ē kā in開。
11:11 Lín做老父ê人,kakī ê kiáⁿ來討餅,你kám ē the̍h石頭hō͘伊?Á是來討魚,你kámē kā蛇準做魚hō͘伊?
11:12 Á是討卵,你kámē用蠍á蟲hō͘伊?
11:13 Lín chiahê人雖然pháiⁿ,iáu koh ē曉用好物hō͘ lín ê kiáⁿ兒,何況lín tī天頂ê天父,祂kám bē用聖神來hō͘對祂懇求ê人?」
11:14 耶穌kah別西卜ê爭議
(太12:22-30;可3:20-27)
耶穌趕一个啞口邪神出去,啞口ê人to̍h講話。群眾lóng感覺奇怪。
11:15 其中有幾nā个人講:「祂趕鬼是靠鬼王別西卜。」
11:16 Koh有人beh試探耶穌,要求祂行tùi天來ê神跡。
11:17 耶穌知in ê心思,to̍h kā in講:「國家若kakī 起紛爭to̍h ē拋荒,家庭若bē hô一定ē破碎。
11:18 撒旦若kakī 起紛爭,伊ê國ná khiāē tiâu?Lín講我靠別西卜趕鬼,
11:19 我若是靠別西卜趕鬼,lín ê子弟趕鬼是óa靠啥人lè?Án-ne,lín ê子弟會反駁lín ê講法。
11:20 總是,我若靠上帝ê氣力趕鬼,上帝國度就已經tī lín ê中間。」
11:21 「勇士若穿盔甲,gia̍h ke-si teh顧守伊ê厝,伊所有ê財產就安全。
11:22 總是,若有一个比伊khah猛ê來phah贏伊,就ē kā伊所óa靠ê全副武器搶去,koh kā伊ê財物分了了。
11:23 「無為我ê人to̍h是kah我對敵。無協助我ê人to̍h是teh kā我破壞。」
11:24 邪神倒Tńg來
(太12:43-45)
「邪神離開附身ê人了後,經過無水ê地,beh chhōe歇睏ê所在chhōe lóng無,to̍h講:『我beh tńg去我tùi hia出來ê hit間厝。』
11:25 Tńg去到位一看,厝內拚掃kah真清氣koh整齊。
11:26 Hitê邪神to̍h koh去帶七个比kakī khah pháiⁿ ê邪神來,入去hia tòa。Hitê人ê結局比起頭koh khah慘。」
11:27 真正ê福氣
耶穌teh講chiahê話ê時,群眾中間有一个婦人人大聲對祂講:「生你koh hō͘你suh奶ê婦人人真有福氣!」
11:28 M̄ koh,耶穌應講:「聽上帝ê道理來遵守ê人koh khah有福氣!」
11:29 要求神跡
(太12:38-42;可8:12)
群眾jú來jú chē,耶穌to̍h講:「Chit世代是pháiⁿ ê世代,in求神跡,m̄ koh,除了約拿ê神跡以外,無koh有神跡hō͘ in。
11:30 Tú親像約拿成做尼尼微人ê神跡,人子mā beh成做chit世代ê神跡。
11:31 Tī審判ê時,南方ê女王beh kah chit世代ê人做伙koh活起來,續kā chit世代ê人定罪,因為hitê女王有tùi地ê極頭來聽所羅門智慧ê話,何況tī chia有比所羅門khah偉大ê。
11:32 Tī審判ê時,尼尼微人ē kah chit世代ê人做伙koh活起來,soah kā chit世代ê人定罪,因為尼尼微人有tùi約拿所傳ê道理來悔改,何況tī chia有比約拿koh khah偉大ê。」
11:33 身軀ê燈
(太5:15;6:22-23)
「無人點燈hē tī無人看見ê所在,á是蓋tòa米斗下;一定tio̍h hē tī燈台頂,hō͘入來ê人看tio̍h hitê光。
11:34 你ê目chiu 是身軀ê燈,你ê目chiu 若金,全身軀就光明;你ê目chiu 若花,kui身軀就烏暗。
11:35 所以,tio̍h注意,m̄ thang hō͘你內面ê光暗去。
11:36 你全身軀若lóng光明,無一點á烏暗,to̍h ē親像燈光iàⁿiàⁿ teh照你,ē hō͘你完全光明。」
11:37 譴責法利賽派kah經學教師
(太23:1-36;可12:38-40;路20:45-47)
耶穌chiahê話講soah ê時,有一个法利賽派ê人請祂食飯。耶穌to̍h入去坐桌。
11:38 Hitê法利賽派ê人看tio̍h耶穌無洗手to̍h來食,感覺真奇怪。
11:39 耶穌to̍h kā伊講:「Taⁿ lín法利賽派ê人kantaⁿ7清氣杯kah盤ê外面,m̄ koh,lín內面充滿貪慾kah邪惡。
11:40 Lín chiahê戇人,創造外面ê上帝kám m̄是mā有創造內面?
11:41 Tio̍h kā chiahê杯盤內面ê物the̍h來賑濟人,ánne,lín ta̍k項物to̍h lóng清氣。
11:42 「Lín chiahê法利賽派ê人有災禍ah!因為lín kā薄荷、茴香á,kah ta̍k種ê菜蔬十份抽一份獻hō͘上帝,m̄ koh,lín無重視公義kah疼上帝ê tāichì。總是,chiahê tāichì tio̍h應該ài做,mā m̄ thang忽略頂面hiahê奉獻。
11:43 Lín法利賽派ê人有災禍ah!因為lín ài tī會堂內坐大位,koh ài tī大路口hō͘人kā lín請安。
11:44 Lín有災禍lah!因為lín親像看bē tio̍h ê死人ê墓,人tùi hit頂面行過mā m̄知。」
11:45 有一个律法ê教師應耶穌講:「老師,祢講chiahê話mā侮辱tio̍h阮。」
11:46 M̄ koh,耶穌應講:「Lín chiahê律法教師mā有災禍ah!因為lín kā人擔無法得ê重擔hō͘人擔;m̄ koh,lín kakī 連一支指頭á都m̄肯振動來減輕hiahê重擔。
11:47 Lín一定有災禍ah!因為lín為lín祖先殺害ê先知造墓。
11:48 Án-ne,lín kakī 證實lín mā贊成祖先所做ê tāichì,koh歡喜來造in ê墓。
11:49 所以,上帝ê智慧有講:『我beh差先知kah使徒去in hia,其中有ê inē kā伊害死,有ê inē kā伊迫害。』
11:50 Án-ne,tùi創造世界以來所流眾先知ê血lóng beh kā lín chit世代討,
11:51 to̍h是tùi亞伯ê血到撒迦利亞死tī殿kah壇ê中間所流ê血。我實在kā lín講,hiahê血債lóng beh對lín chit世代ê人討。
11:52 Lín chiahê律法教師有災禍!因為lín kā開智識ê門ê鎖匙gia̍h去。Lín kakī 無beh入去,koh阻擋想beh入去ê人。」
11:53 耶穌tùi hia出來ê時,經學教師kah法利賽派ê人koh khah出力,劇烈攻擊耶穌,逼祂講khah chē話。
11:54 In teh等耶穌講m̄ tio̍h話ê時,thang chhńg祂ê話縫。
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。