以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
43:1 上主Tńg來聖殿
後來，伊chhōa我來到一个門，to̍h是ǹg東ê門。
43:2 你看，以色列上帝ê榮光tùi東pêng來；祂ê聲親像真chē水ê聲；地就因為祂ê榮耀來發出光。
43:3 祂親像我所看tio̍h ê款式，to̍h是我以前來beh滅城ê時所看tio̍h ê款式；hitê異象mā親像我tī迦巴魯河邊所看見ê異象，我to̍h仆落地。
43:4 上主ê榮光tùi ǹg東ê門入去tī殿內。
43:5 就ánne，聖神就舉起我，chhōa我入去內院；你看，上主ê榮光充滿tī殿內。
43:6 我聽tio̍h有一位tùi殿內ǹg我講話；有一个人khiā tī我ê身邊。
43:7 祂對我講：「人子，這是我寶座ê所在，是我腳掌所踏ê地，我beh tī chia tiàm tī以色列人ê中間，直到永遠。以色列ê子民kah in ê君王無beh koh用in ê淫行以及in ê君王ê身屍，tī koân ê所在來kā我ê聖名òe lahsap；
43:8 in hē in ê戶碇近óa我ê戶碇，in ê門框近óa我ê門框；in kah我ê中間只不過是隔一chōa牆，koh用in所行可惡ê tāichì kā我ê聖名òe lahsap，所以我受氣來beh kā in消滅。
43:9 Taⁿ in tio̍h tùi我ê面前除去in ê淫行kah君王ê身屍，離開我遠遠，我to̍h tiàm tī in ê中間直到永遠。
43:10 「人子，你tio̍h kā chitê殿指示以色列ê子民，hō͘ in因為kakī ê罪過來見笑；in mā tio̍h量殿ê規模。
43:11 In若為tio̍h kakī 所行ê一切 tāichì來見笑，你tio̍h指示in chitê殿ê規模kah它ê款式，它出ê所在，它入ê所在，kah它一切ê規模，以及它一切ê禮儀，它一切ê規模，它一切ê法度，lóng tī in ê目chiu 前寫落來；hō͘ in守一切ê規模，一切ê禮儀來照ánne行。
43:12 殿ê法度to̍h是ánne，tī山頂四箍圍ê界內lóng做至聖。你看，這to̍h是殿ê法度。
43:13 祭壇
以下是壇ê量數，是用肘來量ê；(一个肘是一肘koh加一巴掌)；壇底一肘，闊一肘，四箍圍ê墘有緣邊，高一巴掌，這to̍h是壇ê座。
43:14 Tùi óa土腳ê底座到下層ê khiat-á，高兩肘，闊一肘，tùi細khiat-á到大khiat-á，高四肘，闊一肘。
43:15 頂面ê壇有四肘，壇ê頂面有thóng出來四支角。
43:16 壇長十二肘，闊十二肘，款式是四角形。
43:17 四面ê khiat-á，長十四肘，闊十四肘；四箍圍ê緣邊有半肘，它ê底座四箍圍一肘。它ê崎層ǹg東。
43:18 奉獻祭壇
至koân上主對我講：「人子，至koân上主ánne講：起造祭壇為tio̍h beh tī hit頂面獻燒祭，hiù血，到造成ê時，它ê例親像下底：
43:19 至koân上主講，你tio̍h用一隻公ê牛á做贖罪ê祭，交hō͘祭司利未人撒督ê kiáⁿ孫，to̍h是hiahê親近我來服事我ê。
43:20 你tio̍h取牛á ê血，抹tī壇ê四角頭kah khiat-á ê四角頭，以及四箍圍ê緣邊；ánne來hō͘它清氣，koh為tio̍h伊贖罪。
43:21 你mā tio̍h kā hit隻做贖罪祭ê牛á，tī聖所ê外面燒，厝內定tio̍h ê所在。
43:22 第二日，tio̍h kā無缺點ê山羊káng獻做贖罪ê祭；in ē清氣hitê壇，親像bat用公ê牛á kā它清氣。
43:23 伊已經kā它清氣，tio̍h獻一隻無缺點ê公ê牛kah羊群中一隻無缺點ê公ê綿羊。
43:24 你tio̍h kā chiahê物獻tī上主ê面前，祭司tio̍h用鹽sám tī in頂面，獻hō͘上主做燒祭。
43:25 七日內，每日你tio̍h準備一隻公ê山羊做贖罪ê祭；in mā tio̍h準備一隻公ê牛á kah羊群中一隻公ê綿羊，lóng tio̍h無缺點ê。
43:26 經過七日，in beh為壇贖罪，hō͘它清氣；ánne kā它分別做聖。
43:27 Hiahê日滿了後，tùi第八日以後，祭司tio̍h tī壇頂獻lín ê燒祭kah平安ê祭；我beh接納lín。這是至koân上主講ê。」
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。