列王紀上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
21:1 Na-bot ê Phû-tô Hn̂g
Chiahê tāichì liáu-āu, E-chu-le-el lâng Na-bot ū phû-tô hn̂g tī E-chu-le-el, kīn Sa-má-lī-a ông A-hap ê ông-kiong.
21:2 A-hap kā Na-bot kóng, " Lí kā lí ê phû-tô hn̂g hō͘ góa, góa thang chò chhài-hn̂g, in-ūi sī kīn tī góa ê ông-kiong; góa ē ēng koh khah hó ê hn̂g kah lí ōaⁿ, á-.sī lí nā ài gîn, góa chiū chiàu kè-chîⁿ hō͘ lí. "
21:3 Na-bot kā A-hap kóng, " Kā góa ê chó͘-sian só͘ lâu ê sán-gia̍p hō͘ lí, chit-ê tāichì goān Siōng-chú kìm-chí góa. "
21:4 A-hap in-ūi E-chu-le-el lâng Na-bot só͘ kóng ê ōe, chiū ut-chut bô hoaⁿ-hí, tò tńg-khì i ê chhù, in-ūi Na-bot bat kóng, " Góa m̄ kā góa ê chó͘-sian gia̍p hō͘ lí. " A-hap chiū tó tī bîn-chhn̂g, bīn ǹg lāi-bīn, mā m̄-chia̍h.
21:5 Ông-hō͘ I-é-che-bel lâi-kàu i hia, mn̄g i kóng, " Lí ê sim-lāi iu-būn soah m̄-chia̍h, sī siáⁿ iân-kò͘? "
21:6 I kā i kóng, " In-ūi góa tùi E-chu-le-el lâng Na-bot kóng, ' Lí kā lí ê phû-tô hn̂g hō͘ góa, góa ēng gîn hō͘ lí, á-.sī lí nā ài, góa chiū ēng phû-tô hn̂g ōaⁿ hō͘ lí. ' I kóng, ' Góa ê phû-tô hn̂g, góa m̄ hō͘ lí. '"
21:7 Ông-hō͘ I-é-che-bel kā i kóng, " Lí chit-chūn sī teh koán-lí I-su-la-el kok á m̄-sī? Chò lí khí-lâi chia̍h, hō͘ lí ê sim hoaⁿ-hí, góa ē kā E-chu-le-el lâng Na-bot ê phû-tô hn̂g hō͘ lí. "
21:8 I chiū ēng A-hap ê miâ siá phoe, ēng ông ê ìn lâi tǹg, kià hiahê phoe hō͘ Na-bot ê lāi siâⁿ hiahê kah i tòa chò-hóe ê tiúⁿ-ló kùi-cho̍k.
21:9 I siá tī phoe-.ni̍h ánne kóng, " Lín tio̍h soan-pò͘ kìm-chia̍h, hō͘ Na-bot chē tī jîn-bîn tiong-kan ê koân ūi;
21:10 koh siat nn̄g-ê húi-lūi tī i ê bīn-chêng chò kiàn-chèng, kò i kóng, ' Lí húi-pòng Siōng-chú kah ông! ' Jiân-āu kā i thoa chhut-.khì, ēng chio̍h-thâu kā i tìm-sí. "
21:11 I siâⁿ lāi ê lâng, to̍h-sī tòa tī hit-ê siâⁿ ê tiúⁿ-ló kah kùi-cho̍k, chiū chiàu I-é-che-bel só͘ siá ê ōe, to̍h-sī chiàu i kià hō͘ in ê phoe só͘ siá ê lâi kiâⁿ.
21:12 In soan-pò͘ kìm-chia̍h, hō͘ Na-bot chē tī jîn-bîn tiong-kan ê koân ūi.
21:13 Hit nn̄g-ê húi-lūi ji̍p-.khì, chē tī i ê bīn-chêng, húi-lūi tng jîn-bîn ê bīn-chêng chò kiàn-chèng kò Na-bot, kóng, " Na-bot húi-pòng Siōng-chú kah ông! " In chiū kā i thoa chhut siâⁿ gōa, ēng chio̍h-thâu kā i tìm-sí.
21:14 Jiân-āu chiū chhe lâng khì kā I-é-che-bel kóng, " Na-bot í-keng hō͘ chio̍h-thâu tìm-sí à. "
21:15 I-é-che-bel thiaⁿ tio̍h Na-bot hō͘ chio̍h-thâu tìm-sí, chiū kā A-hap kóng, " Lí khí-lâi chiáng-koán E-chu-le-el lâng Na-bot m̄-khéng ūi tio̍h kè-chîⁿ hō͘ lí ê phû-tô hn̂g, in-ūi Na-bot í-keng sí, bô miā à. "
21:16 A-hap thiaⁿ tio̍h Na-bot í-keng sí, chiū khí-.lâi, lo̍h-khì E-chu-le-el lâng Na-bot ê phû-tô hn̂g hia, beh lâi chiáng-koán.
21:17 Siōng-chú ê ōe lîm-kàu Thi-si-bih lâng E-li-iah, kóng,
21:18 " Lí khí-.lâi, khì kìⁿ tòa tī Sa-má-lī-a ê I-su-la-el ông A-hap. I lo̍h-khì Na-bot ê phû-tô hn̂g teh beh chiáng-koán, chit-chūn i tī hia.
21:19 Lí tio̍h kā i kóng, ' Siōng-chú ánne kóng: Lí kám ū thâi-sí-lâng koh chiáng-koán i ê sán-gia̍p? ' Koh tio̍h kā i kóng, ' Siōng-chú ánne kóng： Káu tī siáⁿ-mi̍h só͘-chāi chīⁿ Na-bot ê hoeh, káu mā ē tī hia chīⁿ lí ê hoeh, to̍h-sī lí pún-sin ê hoeh. '"
21:20 A-hap kā E-li-iah kóng, " Góa ê tùi-te̍k, lí kám chhōe ē tio̍h góa? " I ìn kóng, " Góa chhōe tio̍h lí, in-ūi lí chhut-bē kakī, kiâⁿ Siōng-chú khòaⁿ-chò pháiⁿ ê tāichì.
21:21 Siōng-chú kóng, ' Góa ē kàng chai-hō hō͘ lí, beh kā lí choân-pō͘ tû-bia̍t. Kiàn-nā sio̍k A-hap ê chapo͘ teng, bô-lūn siū khu-sok ê á-.sī chū-iû ê, lóng tī I-su-la-el tiong kā i chián-tû.
21:22 Góa ē hō͘ lí ê ke chhin-chhiūⁿ Ne-bat ê kiáⁿ Ia-lô-ba-am ê ke, koh chhin-chhiūⁿ A-hi-iah ê kiáⁿ Ba-siah ê ke, in-ūi lí ū pōe-ge̍k kek-tōng Góa siū-khì ê tāichì, koh hō͘ I-su-la-el hoān chōe. '
21:23 Kóng tio̍h I-é-che-bel, Siōng-chú mā ū kóng, ' Káu ē chia̍h I-é-che-bel tī E-chu-le-el ê gōa-siâⁿ.
21:24 Sio̍k A-hap ê lâng, sí tī siâⁿ lāi ê, káu ē kā i chia̍h, sí tī chhân-iá ê, khong-tiong ê chiáu ē kā i chia̍h. '"
21:25 ( Chóng-.sī, bô lâng chhin-chhiūⁿ A-hap, in-ūi i chhut-bē kakī, kiâⁿ Siōng-chú khòaⁿ-chò pháiⁿ ê tāichì, sī tùi i ê ông-hō͘ I-é-che-bel kā i sái-lōng ê.
21:26 I kiâⁿ tōa khó-ò͘ⁿ ê tāichì, in-ūi i tòe hiahê ngó͘-siōng, chhin-chhiūⁿ Siōng-chú tī I-su-la-el lâng ê bīn-chêng só͘ kóaⁿ-chhut ê A-mô͘-lī lâng ánne. )
21:27 A-hap thiaⁿ tio̍h chiahê ōe, chiū thiah-li̍h saⁿ, seng-khu chhēng chho͘ môa-pò͘, kìm-chia̍h, khùn mā tó tī chho͘ môa-pò͘, koh ûn-ûn-á kiâⁿ.
21:28 Siōng-chú ê ōe lîm-kàu Thi-si-bih lâng E-li-iah kóng,
21:29 " A-hap ná ē tī Góa ê bīn-chêng kakī khiam-pi, lí kám ū khòaⁿ-.tio̍h? In-ūi i kakī tī Góa ê bīn-chêng khiam-pi, só͘-í, Góa bô beh tī i oa̍h-.leh ê ji̍t kàng chit-ê chai-hō, sī beh tī i ê kiáⁿ ê ji̍t, kàng chit-ê chai-hō tī i ê ke. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。