民數記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
35:1 Hun-phòe hō͘ Lē-bī Lâng ê Siâⁿ
Siōng-chú tī Mô͘-ap ê pêng-goân, Iol-tàn hô piⁿ, I-é-lī-kho siâⁿ tùi-bīn, hoan-hù Mô͘-se kóng,
35:2 " Lí bēng-lēng I-su-la-el lâng, tio̍h tùi in só͘ tit tio̍h ê sán-gia̍p, ēng siâⁿ hō͘ Lē-bī lâng tòa, mā tio̍h ēng siâⁿ sì-kho͘-ûi ê kau-iá hō͘ Lē-bī lâng.
35:3 Siâⁿ beh hō͘ in tòa, kau-iá beh chò in ê gû, iûⁿ, châi-bu̍t kah ta̍k chióng chengseⁿ ê lō͘-ēng.
35:4 Lín só͘ hō͘ Lē-bī lâng siâⁿ gōa ê kau-iá, tùi siâⁿ-kha sì-kho͘-ûi niû chhut chi̍t chheng tiú.
35:5 Lí tī siâⁿ gōa niû, tang pêng nn̄g-chheng tiú, lâm pêng nn̄g-chheng tiú, sai pêng nn̄g-chheng tiú, pak pêng nn̄g-chheng tiú, siâⁿ tī tiong-ng; che sī beh hō͘ in chò siâⁿ ê kau-iá.
35:6 Lín só͘ hō͘ Lē-bī lâng hiahê siâⁿ, kî-tiong tio̍h ū la̍k-ê tô-siám ê siâⁿ; lín tio̍h ánne siat-li̍p, hō͘ thâi-sí-lâng ê thang tô-cháu khì hia; chiahê í-gōa, tio̍h koh hō͘ in sì-cha̍p-jī-ê siâⁿ.
35:7 Lín tio̍h hō͘ Lē-bī lâng ê siâⁿ, chóng-kiōng sì-cha̍p-peh-ê; siâⁿ kah kau-iá, lóng tio̍h hō͘ in.
35:8 Kóng tio̍h lín tùi I-su-la-el lâng ê sán-gia̍p tiong, só͘ hō͘ Lē-bī lâng ê siâⁿ, tùi sán-gia̍p chē ê, chhú khah chē siâⁿ, tùi sán-gia̍p chió ê, chhú chió; kok chiàu só͘ sêng-chiap ê sán-gia̍p poah chhut siâⁿ lâi hō͘ Lē-bī lâng. "
35:9 Tô-siám ê Siâⁿ
( SBK 19: 1-13; ISA 20: 1-9)
Siōng-chú hoan-hù Mô͘-se kóng,
35:10 " Lí tio̍h hoan-hù I-su-la-el lâng, kā in kóng: Lín kòe Iol-tàn hô, ji̍p-khì Ka-nân tē,
35:11 chiū tio̍h poah-chhut kúi-ê siâⁿ, hō͘ lín chò tô-siám ê siâⁿ, hō͘ sit-gō͘ thâi-sí-lâng ê hiong-chhiú thang tô-cháu khì hia.
35:12 Chiahê siâⁿ thang hō͘ lín siám-phiah hit-ê pò-siû ê lâng, hō͘ hiong-chhiú bô tì-kàu sí, thèng-hāu i khiā tī hōe-chiòng ê bīn-chêng siū sím-phòaⁿ.
35:13 Lín só͘ poah chhut-.lâi ê siâⁿ, tio̍h chò lín la̍k-ê tô-siám ê siâⁿ.
35:14 Tī Iol-tàn hô gōa tio̍h poah-chhut saⁿ-ê siâⁿ, tī Ka-nân tē mā tio̍h poah-chhut saⁿ-ê siâⁿ, chò tô-siám ê siâⁿ.
35:15 Chit la̍k-ê siâⁿ tio̍h hō͘ I-su-la-el lâng kah in tiong-kan ê chhut-gōa lâng, í-ki̍p kià-kha ê chò tô-siám ê lō͘-ēng, hō͘ sit-gō͘ thâi lâng ê thang cháu-khì hia.
35:16 " Siat-sú lâng ēng thih-khì phah lâng tì-sú sí, i to̍h-sī hiong-hoān, hiong-hoān it-tēng tio̍h hō͘ i sí.
35:17 I ê chhiú nā ēng ē hō͘ lâng sí ê chio̍h-thâu tìm lâng, tì-sú lâng sí, i to̍h-sī hiong-hoān, hiong-hoān it-tēng tio̍h sí.
35:18 I ê chhiú nā ēng ē hō͘ lâng sí ê chhâ phah lâng, tì-sú lâng sí, i to̍h-sī hiong-hoān, hiong-hoān it-tēng tio̍h sí.
35:19 Pò-siû ê, pún-sin tio̍h thâi-sí hit-ê hiong-hoān; chi̍t ē tú tio̍h i chiū tio̍h kā i thâi-sí.
35:20 " Lâng nā oàn-hūn hit-ê lâng lâi kā i chhia-tó, á-.sī bih-.leh ēng mi̍h kā i tìm, tì-sú sí,
35:21 kiámchhái in-ūi khioh-hūn ēng chhiú phah lâng tì-sú sí, hit-ê phah lâng ê chiū it-tēng tio̍h sí, in-ūi i chin-chiàⁿ sī hiong-hoān, pò-siû ê tú tio̍h hiong-hoān, chiū kā i thâi-sí.
35:22 " Siat-sú lâng bô khioh-hūn, hut-jiân kā i phah-tó, á-.sī bô bih-.leh, ēng mi̍h kā i tìm,
35:23 á-.sī bô khòaⁿ-.tio̍h ê sî, ēng ē phah-sí-lâng ê chio̍h-thâu tìm tio̍h i, lâi tì-sú sí, kah i pún bô oan-siû, mā bô ì-sù beh hāi i,
35:24 hōe-chiòng chiū tio̍h chiàu hiahê hoat-tō͘, tī phah-sí-lâng ê kah pò-siû-.ê ê tiong-kan kā i sím-phòaⁿ.
35:25 Hōe-chiòng tio̍h kiù hit-ê sit-gō͘ thâi lâng ê thoat-lī pò lâng-miā-.ê ê chhiú; hōe-chiòng mā tio̍h hō͘ i tò tńg-khì i só͘ cháu-ji̍p tô-siám ê siâⁿ, i tio̍h tòa tī hit lāi-bīn, thèng-hāu kàu boah sèng-iû ê tōa-chè-si sí.
35:26 Chóng-.sī, sit-gō͘ thâi-sí-lâng ê, bô-lūn án-chóaⁿ, nā chhut-khì i só͘ cháu-ji̍p tô-siám ê siâⁿ ê kéng-gōa,
35:27 pò-siû-.ê nā tī tô-siám ê siâⁿ ê kéng-gōa tú tio̍h i, lâi thâi-sí hit-ê hiong-hoān, pò-siû-.ê chiū bô thâi-sí-lâng ê chōe.
35:28 In-ūi i eng-kai tio̍h tòa i tô-siám ê siâⁿ, thèng-hāu tōa-chè-si sí; tōa-chè-si sí liáu-āu, sit-gō͘ thâi lâng ê chiah thang tńg-khì i sán-gia̍p ê tē.
35:29 Che tī lín it-chhè tòa ê só͘-chāi beh chò lín ta̍k sè-tāi ê lu̍t-lē.
35:30 " Kiàn-nā thâi-sí-lâng, hit-ê hiong-hoān tio̍h chiàu kúi-nā-ê kiàn-chèng-jîn ê ōe lâi hō͘ i sí; nā chí ū chi̍t-ê lâng chò kiàn-chèng, chiū m̄ thang hō͘ lâng sí.
35:31 Thâi-sí-lâng hoān tio̍h sí-chōe ê, lín m̄ thang siu sio̍k-hôe sèⁿ-miā ê kè-chîⁿ, it-tēng tio̍h hō͘ i sí.
35:32 Hitê cháu kàu tô-siám ê siâⁿ ê lâng, lín m̄ thang kā i the̍h sio̍k-hôe ê kè, hō͘ i tī chè-si bōe sí ê chìn-chêng, koh lâi tòa pún-tē.
35:33 Án-ne, lín chiū bô òe lahsap lín só͘ tòa ê tē, in-ūi hoeh sī òe lahsap tē ê; nā ū hoeh lâu tī tē-.ni̍h, siat-sú m̄-sī lâu hit-ê thâi lâng-.ê ê hoeh, hit-ê tē chiū bē tàng chheng-khì.
35:34 Lín m̄ thang òe lahsap lín só͘ tòa ê tē, to̍h-sī Góa tiàm tī hit tiong-kan ê tē, in-ūi Góa — Siōng-chú tiàm tī I-su-la-el lâng ê tiong-kan. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。