啟示錄 線上收聽:中文和合本 現代中文譯本修訂版 現代台語 台語聖經 台語(長老會傳播中心授權) 客語 現代客語 福州話 粵語和合本 希臘文(WH-NT) 下載檔案 關於語音聖經
6:1 Thiah-khui Thâu La̍k-ê Hong-ìn
Iûⁿ-ko khui chhit-ê hong-ìn tiong-kan ê chi̍t-ê ê sî, góa teh khòaⁿ, ū thiaⁿ tio̍h sì chiah oa̍h-mi̍h ê chi̍t chiah, ēng ná chhin-chhiūⁿ lûi ê siaⁿ kóng, " Lâi! "
6:2 Góa chi̍t ē khòaⁿ, chiū khòaⁿ tio̍h chi̍t chiah pe̍h bé, khiâ bé ê lâng gia̍h kiong, mā ū niá-siū bián-liû, chhut-hoat cheng-chiàn, tek-sèng koh-chài tek-sèng.
6:3 Iûⁿ-ko thiah-khui tē-jī-ê hong-ìn ê sî, góa thiaⁿ tio̍h tē-jī chiah oa̍h-mi̍h kóng, " Lâi! "
6:4 Hit sî, koh ū chi̍t chiah chhiah-sek ê bé chhut-.lâi, khiâ bé ê lâng ū niá-siū koân-pèng, thang tùi tē-chiūⁿ chhiúⁿ-toa̍t hô-pêng, hō͘ jîn-lūi hō͘-siong sat-hāi; i koh ū niá-siū chi̍t ki tōa ki kiàm.
6:5 Iûⁿ-ko thiah-khui tē-saⁿ-ê hong-ìn ê sî, góa thiaⁿ tio̍h tē-saⁿ chiah oa̍h-mi̍h kóng, " Lâi! " Góa chi̍t ē khòaⁿ, chiū khòaⁿ tio̍h chi̍t chiah o͘ bé, khiâ bé ê lâng chhiú the̍h chhìn-á.
6:6 Góa thiaⁿ tio̍h kahná ū siaⁿ tùi sì chiah oa̍h-mi̍h ê tiong-kan hoat-chhut, kóng, " Chi̍t kang ê kang-chîⁿ kantaⁿ ē-tàng bé chi̍t kong-seng ê sió-be̍h, nā-sī tōa-be̍h ē-tàng bé saⁿ kong-seng. Iû kah chiú m̄ thang phahsńg. "
6:7 Iûⁿ-ko thiah-khui tē-sì-ê hong-ìn ê sî, góa thiaⁿ tio̍h tē-sì chiah oa̍h-mi̍h kóng, " Lâi! "
6:8 Góa chi̍t ē khòaⁿ, chiū khòaⁿ tio̍h chi̍t chiah hóe-hu-sek ê bé, khiâ bé ê lâng miâ kiò-chò sí-bông, im-hú tòe tī i ê āu-bīn. I ū niá-siū koân-pèng, thang tī-lí tē-chiūⁿ ê sì-hūn chi-it, ēng to-kiàm, ki-hng, un-e̍k kah tē-chiūⁿ ê iá-siù, lâi sat-hāi lâng lūi.
6:9 Iûⁿ-ko thiah-khui tē-gō͘-ê hong-ìn ê sî, góa khòaⁿ tio̍h chè-tôaⁿ ē-bīn, ū ūi tio̍h Siōng-tè ê tō-lí kah tiong-si̍t chò kiàn-chèng lâi siū sat-hāi hiahê lâng ê lêng-hûn.
6:10 In tōa-siaⁿ hoah, " Sèng-kiat koh chin-si̍t ê Chú-cháiⁿ ah, tio̍h koh gōa kú Lí chiah beh sím-phòaⁿ tē-chiūⁿ ê lâng, thang ūi tio̍h goán só͘ lâu ê hoeh sin-oan? "
6:11 In ta̍k lâng lóng niá-siū chi̍t-niá pe̍h saⁿ, koh ū siaⁿ kā in kóng, Tio̍h koh hioh chi̍t-sî-á, thèng-hāu kî-tha pêⁿ-pêⁿ chò lô͘-po̍k ê kah lín ê hiaⁿ-tī chí-mōe, to̍h-sī teh beh kah lín kāng-khoán siū sat-hāi ê lâng ê jîn-sò͘ kàu-gia̍h.
6:12 Āu-lâi, góa khòaⁿ tio̍h iûⁿ-ko thiah-khui tē-la̍k-ê hong-ìn ê sî, hut-jiân tōa tē-tāng, ji̍t-thâu piàn kah chhin-chhiūⁿ o͘ môa-pò͘ hiahni̍h o͘, kui-ê goe̍h-niû piàn kah chhin-chhiūⁿ hoeh hiahni̍h âng;
6:13 Thiⁿ téng ê chheⁿ tūi-lo̍h tē, chhin-chhiūⁿ bû-hoa-kó chhiū hō͘ tōa hong sàu-kòe, iáu-bōe se̍k ê kóe-chí lak liáu-liáu.
6:14 Thiⁿ chhin-chhiūⁿ teh kńg chheh ánne siau-sit-.khì, soaⁿ kah hái-tó lóng iô-choah, lī-khui goân ūi.
6:15 Tē chiūⁿ ê kun-ông, tōa-koaⁿ, kun-tiúⁿ, hó-gia̍h lâng, ū sè-le̍k ê, í-ki̍p só͘-ū chò lô͘-po̍k ê kah chū-iû ê, lóng khì bih tiàm soaⁿ-tōng kah soaⁿ-giâm.
6:16 In tùi soaⁿ-niá kah soaⁿ-giâm hoah, " Tó lo̍h-lâi kā goán khàm-.leh, hō͘ goán thang siám-phiah hit ūi chē tī pó-chō ê bīn kah iûⁿ-ko ê siū-khì.
6:17 In-ūi in cho-gū Siōng-tè siū-khì ê tōa ji̍t-chí í-keng kàu à, siáⁿ lâng khiā ē tiâu? "
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。