約翰一書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權) 客語 現代客語 福州話 粵語和合本 希臘文(WH-NT) 下載檔案 關於語音聖經
2:1 Oa̍h tī Kng-bêng Tiong
Góa ê sè-kiáⁿ, góa siá chiahê hō͘ lín, sī beh hō͘ lín bô hoān chōe; nā ū lâng hoān chōe, tī Thiⁿ-pē ê bīn-chêng, lán ū gī lâng I-é-su Ki-tok ūi lán piān-hō͘.
2:2 Ki-tok ūi tio̍h lán ê chōe, mā ūi tio̍h choân sè-kài ê lâng ê chōe, chò sio̍k-chōe-chè.
2:3 Lán nā chun-siú Siōng-tè ê kài-bēng, chiū ánne ē-tàng khak-sìn lán bat Siōng-tè.
2:4 Lâng nā kóng, " Góa bat Siōng-tè", m̄ koh, bô teh chun-siú I ê bēng-lēng, chit-ê lâng sī teh kóng pe̍h-chha̍t, i ê sim tiong bô chin-lí.
2:5 M̄ koh, lâng nā chun-siú Siōng-tè ê tō-lí, i tùi Siōng-tè ê thiàⁿ chiū oân-choân si̍t-chāi; ánne, lán chiū ē-tàng khak-sìn lán ū chiàu Siōng-tè ê chí-ì teh seng-oa̍h.
2:6 Lâng nā kóng kakī ū chun-chiàu Siōng-tè ê chí-ì, eng-kai tio̍h chiàu I-é-su Ki-tok ê giân-hêng kú-chí lâi seng-oa̍h.
2:7 Sin ê Kài-bēng
Chhin-ài ê hiaⁿ-tī chí-mōe, góa bô siá sin ê bēng-lēng hō͘ lín, sī lín tùi khí-thâu to̍h ū ê hit-ê kū ê kài-bēng, sī lín bat thiaⁿ-kòe ê sìn-sit.
2:8 M̄ koh, tùi lēng-gōa chi̍t-ê kak-tō͘ lâi khòaⁿ, góa siá hō͘ lín ê kài-bēng sī sin ê; tùi Ki-tok kah lín lâi kóng lóng sī chin-si̍t ê, in-ūi o͘-àm teh beh kòe-.khì, chin kng í-keng teh chiàu.
2:9 Lâng nā kóng kakī seng-oa̍h tī kng-bêng tiong, m̄ koh, iáu teh oàn-hūn i ê hiaⁿ-tī á-.sī chí-mōe, i sū-si̍t siōng sī iáu koh seng-oa̍h tī o͘-àm tiong.
2:10 Thiàⁿ hiaⁿ-tī á-.sī chí-mōe ê lâng, sī tī kng-bêng tiong teh seng-oa̍h, bē tì-sú hō͘ lâng poa̍h-tó hoān chōe.
2:11 M̄ koh, oàn-hūn hiaⁿ-tī á-.sī chí-mōe ê lâng, sī oa̍h tī o͘-àm tiong; i tī o͘-àm tiong teh seng-oa̍h, m̄-chai kakī ê hong-hiòng, in-ūi chit-ê o͘-àm hō͘ i ê ba̍k-chiu chheⁿmê.
2:12 Góa ê sè-kiáⁿ, góa siá phoe hō͘ lín, in-ūi óa-khò Ki-tok ê miâ, lín ê chōe í-keng tit tio̍h sià-bián.
2:13 Hū-ló sī-tōa, góa siá phoe hō͘ lín, in-ūi lín jīn-bat tùi goân-khí-thâu to̍h chûn-chāi ê hit ūi. Siàu-liân lâng, góa siá phoe hō͘ lín, in-ūi lín í-keng iâⁿ-kòe hit-ê siâ-ok. Sè-kiáⁿ, góa siá phoe hō͘ lín, in-ūi lín jīn-bat Thiⁿ-pē.
2:14 Hū-ló sī-tōa, góa siá phoe hō͘ lín, in-ūi lín jīn-bat hit-ê tùi goân-khí-thâu to̍h chûn-chāi ê hit ūi. Chheng-liân lâng, góa siá phoe hō͘ lín, in-ūi lín ióng-kiāⁿ, mā ū Siōng-tè ê tō-lí tī lín sim-lāi, lín koh í-keng iâⁿ-kòe hit-ê siâ-ok.
2:15 Kéng-kò Sè-kan
M̄-thang tham-loân sè-kan á-.sī sè-kan ê mi̍h; lâng nā thiàⁿ chit sè-kan, i chiū bô thiàⁿ Thiⁿ-pē.
2:16 In-ūi it-chhè sio̍k sè-kan ê, chhin-chhiūⁿ jio̍k-thé ê chêng-io̍k, ba̍k-chiu ê io̍k-bōng kah sè-sio̍k ê kiau-ngō͘, lóng m̄-sī tùi Thiⁿ-pē lâi, sī tùi sè-kan lâi ê.
2:17 Chit sè-kan kah sè-kan ê chêng-io̍k teh beh kòe-.khì, chóng-.sī, si̍t-hêng Siōng-tè chí-ì ê lâng éng-oán chûn-chāi.
2:18 Ki-tok ê Tùi-te̍k
Sè-kiáⁿ, boa̍t-ji̍t teh beh kàu à! Lín ū thiaⁿ tio̍h Ki-tok ê tùi-te̍k teh beh lâi; chitmá í-keng ū chin chē Ki-tok ê tùi-te̍k chhut-hiān, in-ūi ánne, lán chai boa̍t-ji̍t teh beh kàu à.
2:19 Chiahê lâng si̍t-chāi m̄-sī lán ê lâng, só͘-í, tùi lán tiong-kan chhut-.khì; in Nā-sī sio̍k tī lán, chiū ē kè-sio̍k kah lán chò-hóe; in lī-khui lán, sī beh hián-bêng in lóng m̄-sī sio̍k tī lán.
2:20 Lín í-keng lóng ū tùi Ki-tok niá-siū Sèng Sîn, só͘-í, lín lóng bat chin-lí.
2:21 Góa siá phoe hō͘ lín, m̄-sī in-ūi lín m̄ bat chin-lí, sī in-ūi lín bat chin-lí, koh chai it-chhè ê pe̍h-chha̍t lóng m̄-sī tùi chin-lí lâi.
2:22 Án-ne, sī siáⁿ-mi̍h lâng teh kóng pe̍h-chha̍t? It-tēng sī hiahê kī-choa̍t I-é-su chò Ki-tok ê lâng. Kī-choa̍t Thiⁿ-pē kah Kiáⁿ ê to̍h-sī Ki-tok ê tùi-te̍k.
2:23 Kī-choa̍t Kiáⁿ ê lâng, bē chiap-la̍p Thiⁿ-pē; sêng-jīn Kiáⁿ ê lâng, mā ē sêng-jīn Thiⁿ-pē.
2:24 Lín tio̍h kian-siú tùi khí-thâu só͘ thiaⁿ-.tio̍h ê sìn-sit. Lín nā kian-siú tùi khí-thâu só͘ thiaⁿ ê sìn-sit, lín chiū ē kè-sio̍k oa̍h tī Kiáⁿ kah Thiⁿ-pē ê lāi-bīn.
2:25 Che to̍h-sī Ki-tok hō͘ lán ê èng-ín, sī éng-oán ê oa̍h-miā.
2:26 Góa siá chiahê tāichì hō͘ lín, sī teh chí hiahê siūⁿ beh bê-he̍k lín ê lâng.
2:27 Tùi lín lâi kóng, lín tùi Ki-tok niá-siū ê Sèng Sîn it-ti̍t lóng kah lín tông-chāi, só͘-í, m̄-bián lâng lâi kā lín kà-sī, in-ūi chit-ê Sèng Sîn ē kà-sī lín bān-hāng sū. I ê kà-sī sī chin-si̍t, m̄-sī pe̍h-chha̍t. Lín tio̍h chun-chiàu Sèng Sîn ê kà-sī, tio̍h kah Ki-tok kiat-liân lâi seng-oa̍h.
2:28 Taⁿ, sè-kiáⁿ, lín tio̍h kah Ki-tok kiat-liân lâi seng-oa̍h, ánne, tī Ki-tok chài-lîm ê sî ē-tàng hó-táⁿ, bē in-ūi I ê chài-lîm, kám-kak kiàn-siàu cháu-khì bih.
2:29 Lín nā chai Ki-tok sī kong-gī, mā tio̍h chai si̍t-hêng kong-gī ê lâng chiah sī Siōng-tè ê kiáⁿ-jî.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。