雅各書 線上收聽:中文和合本 現代中文譯本修訂版 現代台語 台語聖經 台語(長老會傳播中心授權) 客語 現代客語 福州話 粵語和合本 希臘文(WH-NT) 下載檔案 關於語音聖經
3:1 Khòng-chè Chhùi-chi̍h
Chhin-ài ê hiaⁿ-tī chí-mōe, lín tiong-kan m̄ thang ū chin chē lâng chò kàu-su, in-ūi lín chai chò kàu-su ê lâng ē siū khah-giâm keh ê sím-phòaⁿ.
3:2 In-ūi lán tāi-ke tiāⁿtiāⁿ hoān chin chē chhò-gō͘. Tī kóng-ōe bô chhò-gō͘, to̍h-sī oân-choân ê lâng, mā ē-hiáu khòng-chè kakī.
3:3 Lán ēng bé-kā-kiuⁿ tàu tī bé ê chhùi, hō͘ in sūn-ho̍k, chiū ē-tàng khòng-chè kui-chiah bé.
3:4 Lín koh khòaⁿ, chûn sûi-jiân hiah tōa tâi, hō͘ tōa hong sàu ê sî, kantaⁿ ēng chi̍t ki sè-sè ê tōa lâi khòng-chè, sái chûn ê chûn-tiúⁿ chiū ē-tàng chiàu kakī ê ì-sù, kā chûn sái kàu bo̍k-tek-tē.
3:5 Chhin-chhiūⁿ ánne, chhùi-chi̍h sī sè-sè ê khì-koan, iáu koh ē kóng tōa-ōe. Lí khòaⁿ, chi̍t-tiám-á ê hóe-chheⁿ chiū ē hō͘ kui-ê chhiū-nâ lóng sio-.khì.
3:6 Chhùi-chi̍h kahná chi̍t pé hóe, sī tī lán pah-thé tiong-kan ê siâ-ok sè-kài, ē kā kui seng-khu ù-jiám; chit-ê tùi tē-ga̍k hoat-chhut ê hóe, ē kā lán it-seng ê chiân-tô͘ húi-bia̍t.
3:7 Jîn-lūi ē-tàng chè-ap ta̍k chióng ê cháu-siù, poe-chiáu, thâng-thōa kah chúi-cho̍k; kî-si̍t in mā í-keng lóng hō͘ jîn-lūi chè-ap.
3:8 To̍k-to̍k bô lâng ē-tàng chè-ap chhùi-chi̍h; chhùi-chi̍h sī bô lâng chè-ap ē-tiâu ê siâ-ok, chhiong-móa tì-miā ê to̍k.
3:9 Lán ēng chhùi-chi̍h oló lán ê Thiⁿ-pē Siōng-tè, mā ēng chhùi-chi̍h chiù-chó͘ chiàu Siōng-tè ê hêng-siōng lâi chhòng-chō ê lâng.
3:10 O-ló kah chiù-chó͘ tùi kāng chi̍t-ê chhùi-chi̍h chhut-.lâi. Chhin-ài ê hiaⁿ-tī chí-mōe, che sī bô eng-kai ê.
3:11 Tùi kāng chi̍t-ê chúi-chôaⁿ kám ē lâu chhut tiⁿ ê kah khó͘ ê chúi?
3:12 Chhin-ài ê hiaⁿ-tī chí-mōe, bû-hoa-kó chhiū kám ē seⁿ Kaⁿ-ná? Phû-tô chhiū kám ē seⁿ bû-hoa-kó? Án-ne, kiâm ê chúi-goân mā bē lâu chhut chiáⁿ-chúi!
3:13 Tùi Siōng-tè Lâi ê Tì-hūi
Lín tiong-kan siáⁿ lâng ū tì-hūi kah kiàn-sek? Nā ū, tio̍h ēng chhiong-móa tì-hūi ê un-jiû, tī seng-oa̍h tiong piáu-hiān hó phín-hēng.
3:14 Lín sim-lāi nā ū ok-to̍k ê oàn-tò͘ kah sio-cheⁿ, chiū m̄ thang khoa-kháu, m̄ thang kóng pe̍h-chha̍t lâi ûi-pōe chin-lí.
3:15 Chit khoán ê tì-hūi m̄-sī tùi thiⁿ-téng lâi ê, sī sio̍k tī sè-kan, sio̍k tī hia̍t-khì, sio̍k tī Mô͘-kúi-ê.
3:16 In-ūi ū oàn-tò͘ kah sio-cheⁿ ê só͘-chāi, chiū ū jiáu-loān kah it-chhè ê siâ-ok.
3:17 Tùi téng-bīn lâi ê tì-hūi, tē-it sī sûn-kiat, koh lâi sī hô-pêng, un-jiû, iú-siān, chû-pi, kiat hó tek-hēng ê kóe-chí, bô phian-kiàn, mā bô gūi-siān.
3:18 Kong-gī sī hô-pêng só͘ kiat ê kóe-chí, sī tùi chhiok-chìn hô-pêng ê lâng só͘ iā ê chéng-chí sánseng ê.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。