Kì-jiân Siōng-tè hō͘ lán chìn-ji̍p I ê an-hioh ê èng-ín iáu tī-.leh, lán tio̍h ū kèng-ùi ê sim, chiah bián-tit lín tiong-kan kiámchhái ū lâng siūⁿ kóng tit bē tio̍h chit-ê èng-ín. 4:2 Hok-im pêⁿ-pêⁿ ū thoân hō͘ in, mā ū thoân hō͘ lán; chóng-.sī, in só͘ thiaⁿ ê sìn-sit tùi in bô lī-ek, in-ūi thiaⁿ ê lâng bô ēng sìn-sim lâi niá-siū. 4:3 Lán chiahê sìn ê lâng, ē-tàng chìn-ji̍p Siōng-tè só͘ siúⁿ-sù ê an-hioh. Chiàu I só͘ kóng, góa chiū tī siū-khì tiong chiùchōa kóng, In choa̍t-tùi bē tàng chìn-ji̍p góa ê an-hioh. (chù, SPh 95:11) kî-si̍t Siōng-tè tī chhòng-chō ú-tiū ê sî, I ê kang-chok í-keng oân-sêng. 4:4 Koan-hē " Tē-chhit ji̍t ", keng-tián ū chi̍t-ê só͘-chāi ánne kóng, Siōng-tè tī tē-chhit ji̍t, soah I it-chhè ê kang-chok lâi an-hioh. (chù, CSK 2:2) 4:5 Kâng chit-hāng tāichì ū koh kóng, In choa̍t-tùi bē tàng chìn-ji̍p góa ê an-hioh. (chù, SPh 95:11) 4:6 Hiahê chìn-chêng tit tio̍h hok-im ê lâng, in-ūi m̄ sūn-ho̍k, soah bē tàng chìn-ji̍p an-hioh, Siōng-tè chiū ūi kî-tha ê lâng pó-liû chit-ê an-hioh. 4:7 Kúi-nā nî āu, tī Ta-bi̍t ê chheh ū kì-chài, Siōng-tè koh lēng-gōa tēng chi̍t ji̍t, kiò-chò " Kin-á-ji̍t ", chhin-chhiūⁿ téng-bīn só͘ kóng, kin-á-ji̍t lín nā thiaⁿ tio̍h Siōng-tè ê siaⁿ, m̄ thang ngē lín ê sim. (chù, SPh 95:7-8) 4:8 Io-siú-ah nā ū tài-niá jîn-bîn chìn-ji̍p an-hioh, āu-lâi Siōng-tè it-tēng bē koh kóng-khí pa̍t-ji̍t. 4:9 Án-ne khòaⁿ khí-.lâi, Siōng-tè iáu ūi tio̍h I ê chú-bîn pó lâu chi̍t-ê An-hioh-ji̍t. 4:10 In-ūi chìn-ji̍p Siōng-tè só͘ sù an-hioh ê lâng, chhin-chhiūⁿ Siōng-tè soah I ê kang-chok kāng-khoán, in mā ē soah in it-chhè ê kang-chok lâi an-hioh. 4:11 Só͘-í, lán tio̍h chīn-la̍t lâi chìn-ji̍p chit-ê an-hioh, chiah bián-tit ū lâng chhin-chhiūⁿ hiahê m̄-sìn ê lâng poa̍h-tó sit-pāi. 4:12 Siōng-tè ê ōe sī oa̍h ê, koh sī ū kong-hāu ê, pí it-chhè siaam bīn lāi ê kiàm khah lāi, ē-tàng chhah-ji̍p, sīm-chì phòa-khui lâng ê lêng kah hûn, í-ki̍p kut-chat kah kut-chhóe, koh ē-tàng phòaⁿ-toàn lâng sim-lāi ê io̍k-bōng kah sim-su ì-liām. 4:13 Só͘-ū ê pī-chō-bu̍t, bô chi̍t hāng ē-tàng tùi Siōng-tè ún-môa; bān-mi̍h lóng pō-lō͘ tī I ê ba̍k-chiu chêng; lán ê kiâⁿ-ta̍h lóng tio̍h tùi I kau-tài chheng-chhó. 4:14
Tōa-chè-si I-é-su
Lán kì-jiân ū chi̍t ūi úi-tāi-.ê tōa-chè-si, to̍h-sī Siōng-tè ê Kiáⁿ I-é-su, I í-keng chiūⁿ thiⁿ tī Siōng-tè ê bīn-chêng, lán tio̍h chhî-siú lán só͘ kong-khai sêng-jīn ê sìn-gióng. 4:15 Lán chit ūi tōa-chè-si, m̄-sī bē thé-thiap lán ê loán-jio̍k; I tī ta̍k hāng tāichì lóng kah lán kāng-khoán ū siū chhì-thàm, m̄ koh, I bô hoān chōe. 4:16 Só͘-í, lán tio̍h hó-táⁿ lâi chiū-kīn Siōng-tè un-tián ê pó-chō, thang niá-siū liân-bín, mā thang tit tio̍h un-tián, chò lán ki̍p-sî ê pang-chān.