Kó͘-chá Siōng-tè thok chèng sian-ti, ēng kok chióng hong-hoat tùi lán ê chó͘-sian kóng-ōe. 1:2 M̄ koh, tī chit-ê boa̍t-sè, I thong-kòe I ê Kiáⁿ tùi lán kóng-ōe. Siōng-tè ū siat-li̍p I lâi sêng-chiap bān-mi̍h, koh ū thong-kòe I lâi chhòng-chō chit-ê sè-kài. 1:3 Ki-tok hoán-èng Siōng-tè ê êng-iāu, sī Siōng-tè pún-chit ê chin-siōng. I ēng I koân-lêng ê ōe teh î-chhî bān-mi̍h ê tia̍t-sū. I tī sé-tû jîn-lūi ê chōe liáu-āu, taⁿ chē tī chì-koân chì-chun Siōng-tè ê chiàⁿ pêng. 1:4
Sèng Kiáⁿ Pí Thiⁿ-sài khah Úi-tāi
Siōng-tè thê-seng sèng Kiáⁿ ê tē-ūi, hō͘ I pí chèng thiⁿ-sài khah úi-tāi, tú chhin-chhiūⁿ Siōng-tè só͘ siúⁿ-sù I ê miâ pí thiⁿ-sài khah chun-kùi. 1:5 Siōng-tè kám bat tùi tó chi̍t-ê thiⁿ-sài kóng, " Lí sī góa ê kiáⁿ, góa kin-á-ji̍t chò lí ê lāu-pē? " (chù, SPh 2, 7) I mā m̄ bat kí jīm-hô chi̍t-ê thiⁿ-sài kóng, " Góa beh chò i ê Thiⁿ-pē, i beh chò góa ê kiáⁿ. " (chù, SMH 7:14; LTS 17:13) 1:6 Kàu Siōng-tè teh beh chhe I ê sèng Kiáⁿ ji̍p sè-kan ê sî, kóng, " Siōng-tè só͘-ū ê thiⁿ-sài lóng tio̍h kèng-pài I. " (chù, SPh 97:7 LXX) 1:7 Koan-hē thiⁿ-sài, Siōng-tè kóng, " Siōng-tè ēng I ê thiⁿ-sài chò hong, ēng hóe-iām chò I ê chhe-ēng. " (chù, SPh 104:4) 1:8 Nā-sī koan-hē sèng Kiáⁿ, I khiok kóng, " Siōng-tè ah, Lí ê pó-chō éng-oán chûn-chāi, Lí kok-tō͘ ê koân-pèng sī chèng-ti̍t. 1:9 Lí ài kong-gī, oàn-hūn put-hoat, só͘-í, Siōng-tè— Lí ê Siōng-tè, ēng hoaⁿ-hí ê iû kā Lí boah, iâⁿ-kòe boah Lí ê tâng-phōaⁿ. " (chù, SPh 45:6-7) 1:10 Koh kóng, " Chú ah, Lí tī khí-chho͘ ū chhòng-chō tē, thiⁿ mā sī Lí ê chhiú só͘ chō ê. 1:11 Thiⁿ kah tē ē siau-bia̍t, Lí khiok ē kú-tn̂g chûn-chāi. Thiⁿ kah tē lóng ē chhin-chhiūⁿ saⁿ-khò͘ chiām-chiām kū khì, 1:12 Lí ē kā thiⁿ kah tē chhin-chhiūⁿ teh kńg gōa-saⁿ kā in kńg khí-.lâi, in chiū ē piàn-ōaⁿ. Chóng-.sī, Lí éng-oán bē piàn-ōaⁿ, Lí ê hòe-siū bû-kiông bô chīn. " (chù, SPh 102:25-27) 1:13 Siōng-tè kám bat tùi tó chi̍t-ê thiⁿ-sài kóng, " Chē tī góa ê chiàⁿ pêng, it-ti̍t kàu góa hō͘ lí ê tùi-te̍k khut-ho̍k tī lí ê kha-ē? " (chù, SPh 110:1) 1:14 Thiⁿ-sài kám m̄-sī lóng teh chò Siōng-tè chhe-ēng-ê Sèng Sîn, siū chhe-phài lâi ho̍k-sāi teh beh niá-siū chín-kiù ê lâng?