出埃及記 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
40:1 Tio̍h Khí Sèng-bō͘
Siōng-chú hoan-hù Mô͘-se kóng,
40:2 " Chiaⁿ-goe̍h chhe-it, lí tio̍h khí chū-chi̍p ēng ê hōe-bō͘.
40:3 Lí tio̍h kā hoat-kūi hē tī hit lāi-bīn, ēng tiùⁿ-lî kā i jia-cha̍h.
40:4 Kng toh ji̍p-.khì, pâi-siat téng-bīn ê mi̍h. Kng teng-tâi ji̍p-.khì, tiám i ê teng.
40:5 Kng sio hiuⁿ ê kim-tôaⁿ, hē tī hoat-kūi chêng, kòa hōe-bō͘ mn̂g ê mn̂g-lî.
40:6 Kā sio-chè ê tôaⁿ, hē tī chū-chi̍p ê hōe-bō͘ mn̂g chêng.
40:7 Kā sé-tn̄g ê phûn, hē tī hōe-bō͘ kah tôaⁿ ê tiong-kan, té chúi tī phûn lāi.
40:8 Koh tī sì-kho͘-ûi khiā tiâⁿ-ûi, kòa tiâⁿ-mn̂g ê mn̂g-lî.
40:9 " Ēng iû boah hōe-bō͘ kah kî-tiong só͘-ū ê khì-kū lâi hun-pia̍t chò sèng, i chiū chiâⁿ-chò sèng.
40:10 Koh boah sio-chè ê tôaⁿ kah i só͘-ū ê khì-kū, kā tôaⁿ hun-pia̍t chò sèng, tôaⁿ chiū chiâⁿ-chò chì-sèng.
40:11 Mā tio̍h boah sé-tn̄g ê phûn, kā i hun-pia̍t chò sèng.
40:12 " Koh tio̍h chhōa A-lông kah i hiahê kiáⁿ, lâi-kàu hōe-bō͘ mn̂g chêng, ēng chúi kā in sé.
40:13 Mā kā A-lông chhēng sèng-saⁿ, koh ēng iû kā i boah, kā i hun-pia̍t chò sèng, hō͘ i chò chè-si lâi ho̍k-sāi Góa.
40:14 Koh chhōa i hiahê kiáⁿ lâi, kā in chhēng lāi-phàu.
40:15 Tio̍h kā in boah iû, chhin-chhiūⁿ boah in lāu-pē sio-siâng, hō͘ in chò chè-si lâi ho̍k-sāi Góa. In siū boah iû beh éng-oán chò chè-si, kàu ta̍k sè-tāi. "
40:16 Mô͘-se ánne kiâⁿ, lóng sī chiàu Siōng-chú só͘ hoan-hù i ê lâi kiâⁿ.
40:17 Tē-jī nî chiaⁿ-goe̍h chhe-it, hōe-bō͘ chiū khiā khí-.lâi.
40:18 Mô͘-se khiā hōe-bō͘ hē hiahê khū, khiā hiahê pán, chhng hiahê hoâiⁿ-kông, khiā hiahê thiāu.
40:19 Tī hōe-bō͘ téng tah pò͘-pêⁿ, kā pò͘-pêⁿ ê kòa khàm tī i ê téng-bīn, sī chiàu Siōng-chú só͘ hoan-hù Mô͘-se ê.
40:20 Koh kā lu̍t-hoat hē tī kūi lāi, ēng kǹg chhng tī kūi-.ni̍h, kā si-un-só͘ hē tī kūi téng.
40:21 Kng kūi ji̍p-lâi hōe-bō͘, kòa tiùⁿ-lî lâi jia-cha̍h hoat-kūi, sī chiàu Siōng-chú só͘ hoan-hù Mô͘-se ê.
40:22 Koh kā toh-á hē tī hōe-bō͘ lāi, hē tī hōe-bō͘ ê pak pêng, hē tī tiùⁿ-lî ê gōa-bīn.
40:23 Hit téng-bīn ēng piáⁿ pâi tī Siōng-chú ê bīn-chêng, sī chiàu Siōng-chú só͘ hoan-hù Mô͘-se ê.
40:24 Koh hē teng-tâi tī hōe-bō͘ lāi kah toh-á sio-tùi, tī hōe-bō͘ ê lâm pêng.
40:25 Tī Siōng-chú ê bīn-chêng tiám teng, sī chiàu Siōng-chú só͘ hoan-hù Mô͘-se ê.
40:26 Koh hē kim-tôaⁿ tī hōe-bō͘ lāi ê tiùⁿ-lî chêng,
40:27 tī hit téng-bīn sio phang-liāu ê hiuⁿ, sī chiàu Siōng-chú só͘ hoan-hù Mô͘-se ê.
40:28 Koh kòa hōe-bō͘ mn̂g ê mn̂g-lî.
40:29 Tī chū-chi̍p ê hōe-bō͘ mn̂g chêng, hē sio-chè ê tôaⁿ, kā sio-chè kah sò͘-chè hiàn tī hit téng-bīn, sī chiàu Siōng-chú só͘ hoan-hù Mô͘-se ê.
40:30 Kā sé-tn̄g ê phûn hē tī hōe-bō͘ kah tôaⁿ ê tiong-kan, phûn lāi té chúi, thang sé-tn̄g.
40:31 Mô͘-se kah A-lông kah i hiahê kiáⁿ, tī hia sé-chhiú, sé kha.
40:32 In ji̍p-khì hōe-bō͘ ê sî, á-.sī lâi-kàu tôaⁿ ê sî chiū sé, sī chiàu Siōng-chú só͘ hoan-hù Mô͘-se ê.
40:33 Tī hōe-bō͘ kah tôaⁿ ê sì-kho͘-ûi khiā tiùⁿ-ûi, mā kòa tiùⁿ-ûi mn̂g ê mn̂g-lî, ánne Mô͘-se chiū oân-kang.
40:34 Hûn Jia-khàm Hōe-bō͘
( BSK 9: 15-23)
Hit sî, hûn jia-khàm hōe-bō͘, Siōng-chú ê êng-kng chhiong-móa hōe-bō͘.
40:35 Mô͘-se bē tàng ji̍p-khì hōe-bō͘, in-ūi hûn thêng tī hit téng-bīn, koh ū Siōng-chú ê êng-kng chhiong-móa tī hōe-bō͘.
40:36 Hûn tùi hōe-bō͘ siu tńg-.khì ê sî, I-su-la-el lâng chiū chhut-hoat kiâⁿ in ê lō͘-thêng.
40:37 Hûn nā bô siu tńg-.khì, in chiū bô chhut-hoat kiâⁿ lō͘, it-ti̍t kàu hûn siu tńg-.khì.
40:38 Ji̍t-sî, Siōng-chú ê hûn tī hōe-bō͘ téng; àm-sî hit tiong-kan ū hóe, tī I-su-la-el choân ke ê ba̍k-chiu chêng. Tī in só͘ kiâⁿ ê lō͘-thêng lóng sī ánne.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。