約翰福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 福州話 粵語和合本 希臘文(WH-NT) 下載檔案 關於語音聖經
16:1 " Góa kā lín kóng chiahê tāichì, sī beh hō͘ lín ê sìn-sim bē iô-tāng.
16:2 Sè-kan lâng ē kā lín kóaⁿ-chhut hōe-tn̂g. Sî teh beh kàu, hiahê siūⁿ beh thâi lín ê lâng, lóng ē siūⁿ kóng in sī teh ho̍k-sāi Siōng-tè.
16:3 In ē chò chiahê tāichì, sī in-ūi in m̄ bat Thiⁿ-pē, mā m̄ bat góa.
16:4 To̍k-to̍k Góa ū kā lín kóng chiahê tāichì, sī beh hō͘ lín kàu-sî thang ē kì-tit, góa bat kā lín kóng. "Sèng Sîn ê Kang-chok
" Góa bô tī khí-thâu to̍h kā lín kóng chiahê tāichì, sī in-ūi góa iáu kah lín chò-hóe.
16:5 Taⁿ góa teh beh tńg-khì chhe-phài góa lâi ê hit ūi hia; lín tiong-kan bô lâng mn̄g góa kóng, ' Lí beh khì tó-ūi? '
16:6 Góa kā lín kóng chiahê tāichì liáu-āu, lín soah móa-sim iu-būn.
16:7 M̄ koh, góa tio̍h kā si̍t-chêng kā lín kóng; góa khì sī tùi lín ū lī-ek; góa nā bô-.khì, hit ūi Pó-hūi-su chiū bē lâi lín chia; góa nā khì, chiū ē chhe I lâi lín chia.
16:8 Sèng Sîn lâi ê sî, ē chí-chèng sè-kan tùi chōe, tùi gī, tùi sím-phòaⁿ ê chhò-gō͘ koan-liām.
16:9 Chōe ê hong-bīn, in-ūi in m̄-sìn góa;
16:10 Gī ê hong-bīn, in-ūi góa teh beh tńg-khì Thiⁿ-pē hia, lín bē koh khòaⁿ tio̍h góa;
16:11 Sím-phòaⁿ ê hong-bīn, in-ūi chit sè-kan ê thóng-tī-chiá í-keng siū sím-phòaⁿ.
16:12 " Góa iáu ū chin chē hāng tāichì beh kā lín kóng, to̍k-to̍k lín chitmá iáu bē tàng liáu-kái.
16:13 Chin-lí ê Sèng Sîn lâi ê sî, I ē chhōa lín liáu-kái it-chhè ê chin-lí. I m̄-sī chiàu kakī ê ì-sù lâi kóng, sī kā I só͘ thiaⁿ-.tio̍h ê lâi kóng, mā ē kā bī-lâi ê tāichì pò lín chai.
16:14 I ē kā êng-kng kui hō͘ góa, in-ūi I ē kā tùi góa só͘ niá-siū ê thoân-pò hō͘ lín.
16:15 Thiⁿ-pē só͘-ū ê it-chhè lóng sī góa ê, só͘-í góa chiah kóng, Sèng Sîn ē kā tùi góa só͘ niá-siū ê chin-lí thoân-pò hō͘ lín. "
16:16 Iu-būn Ē Piàn-chò Hoaⁿ-hí
" Koh bô gōa kú, lín chiū bē tàng khòaⁿ tio̍h góa, koh-chài bô gōa kú, lín chiū ē koh khòaⁿ tio̍h góa. "
16:17 Ū kúi-nā-ê bûn-tô͘ hō͘-siong kóng, " I kā lán kóng, ' Koh bô gōa kú, lín chiū bē tàng khòaⁿ tio̍h góa, koh-chài bô gōa kú, lín chiū ē koh khòaⁿ tio̍h góa. ', koh kóng, ' In-ūi góa teh beh tńg-khì Thiⁿ-pē hia. ' Chiahê ōe sī siáⁿ-mi̍h ì-sù? "
16:18 Só͘-í, in it-ti̍t mn̄g, " I só͘ kóng ê ' Koh bô gōa kú. ' Sī siáⁿ-mi̍h ì-sù? Lán m̄-chai I teh kóng siáⁿ-mi̍h. "
16:19 I-é-su chai in ài beh mn̄g I, chiū kā in kóng, " Lín in-ūi góa kóng, ' Koh bô gōa kú, lín chiū bē tàng khòaⁿ tio̍h góa, koh-chài bô gōa kú, lín chiū ē koh khòaⁿ tio̍h góa. ' Teh mn̄g-lâi mn̄g-khì, sī-.bô?
16:20 Góa si̍t-chāi kā lín kóng, lín ē thî-khàu ai-siong, sè-kan ē hoaⁿ-hí; lín ē iu-būn, m̄ koh, lín ê iu-būn ē piàn-chò hoaⁿ-hí.
16:21 Hū-jîn lâng beh seⁿ kiáⁿ chiū iu-būn, in-ūi i ê sán-kî kàu à; eⁿ-á chhut-sì liáu-āu, i soah bē kì-tit seⁿ kiáⁿ ê thòng-khó͘, in-ūi i ē hoaⁿ-hí ū eⁿ-á chhut-sì tī sè-kan.
16:22 Chhin-chhiūⁿ ánne, lín chitmá ū iu-būn, chóng-.sī, góa ē koh kìⁿ tio̍h lín, lín ê sim chiū ē hoaⁿ-hí; bô lâng ē-tàng kā lín ê hoaⁿ-hí chhiúⁿ-.khì.
16:23 " Kàu hit ji̍t, lín bē koh mn̄g góa siáⁿ-mi̍h. Góa si̍t-chāi kā lín kóng, lín hōng góa ê miâ tùi Thiⁿ-pē só͘ kiû ê, I lóng ē siúⁿ-sù hō͘ lín.
16:24 Lín kàu taⁿ iáu m̄ bat hōng góa ê miâ kiû siáⁿ-mi̍h; lín tio̍h kiû, chiū ē tit tio̍h, hō͘ lín ê hoaⁿ-hí móa-móa. "
16:25 Góa Í-keng Iâⁿ Kòe Sè-kan
" Chiahê tāichì Góa lóng ēng phì-jū kā lín kóng kòe à. Sî teh beh kàu, Góa bē koh-chài ēng phì-jū kā lín kóng, góa beh bêng-khak tùi lín kóng-khí Thiⁿ-pē ê tāichì.
16:26 Hitê ji̍t nā kàu, lín tio̍h hōng góa ê miâ kî-kiû. Góa bô kā lín kóng, góa beh thè lín tùi Thiⁿ-pē khún-kiû.
16:27 Thiⁿ-pē pún-sin to̍h thiàⁿ lín, sī in-ūi lín ū thiàⁿ góa, koh ū sìn góa sī tùi Thiⁿ-pē hia lâi ê.
16:28 Góa tùi Thiⁿ-pē hia chhut-.lâi, lâi-kàu sè-kan; taⁿ koh beh lī-khui sè-kan, tńg-khì Thiⁿ-pē hia. "
16:29 Bûn-tô͘ kóng, " Taⁿ Lí bêng-khak tùi goán kóng, m̄-sī ēng phì-jū.
16:30 Taⁿ goán chai Lí ta̍k hāng tāichì lóng chai, m̄-bián lâng kā Lí mn̄g. In-ūi ánne, goán sìn Lí sī tùi Siōng-tè hia lâi ê. "
16:31 I-é-su mn̄g kóng, " Taⁿ lín ū sìn bô?
16:32 Sî teh beh kàu, kî-si̍t í-keng kàu à. Lín ē sì-sòaⁿ, ta̍k lâng tńg-khì kakī ê só͘-chāi, pàng góa kakī chi̍t-ê; chóng-.sī, góa m̄-sī kakī chi̍t-ê, in-ūi ū Thiⁿ-pē kah góa tông-chāi.
16:33 Góa í-keng kā chiahê tāichì kā lín kóng, sī beh hō͘ lín tī góa ê lāi-bīn ū pêng-an. Lín tī sè-kan ē ū khó͘-lān; to̍k-to̍k lín thang hòng-sim, góa í-keng iâⁿ-kòe sè-kan. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。