馬太福音 四福音合參 線上收聽:中文和合本 現代中文譯本修訂版 現代台語 台語聖經 台語(長老會傳播中心授權） 客語 現代客語 粵語和合本 希臘文(WH-NT) 下載檔案 關於語音聖經
25:1 Cha̍p-ê Chāi-sek-lí ê Phì-jū
" Thian-kok chhin-chhiūⁿ ē-bīn ê phì-jū, cha̍p-ê chāi-sek-lí gia̍h teng chhut-khì gêng-chiap sin-lông.
25:2 Kî-tiong ū gō͘-ê gōng ê, gō͘-ê chhong-bêng ê.
25:3 Gōng ê ū gia̍h teng, bô lēng-gōa tòa iû.
25:4 To̍k-to̍k chhong-bêng ê ū gia̍h teng koh ū lēng-gōa tòa iû tī in ê iû-koàn-á lāi.
25:5 Sin-lông khah òaⁿ kàu, hiahê chāi-sek-lí soah lóng tuh-ku khùn-.khì.
25:6 Pòaⁿ-mê ū lâng tōa-siaⁿ hoah, ' Sin-lông lâi lò͘! Kín chhut-lâi gêng-chiap. '
25:7 Hit sî, hiahê chāi-sek-lí lóng chhéⁿ khí-.lâi, chún-pī tiám teng.
25:8 Gōng ê kā chhong-bêng ê kóng, ' Chhiáⁿ kā lín ê iû pun chi̍t-kóa hō͘ goán, in-ūi goán ê teng teh beh hoa-khì à. '
25:9 Chhong-bêng ê ìn kóng, ' Goán kiaⁿ iû bô kàu pun lín ēng. Siōng hó lín kakī kho khì bé. '
25:10 In koh khì bé iû ê sî, sin-lông kàu-ūi. Hiahê chún-pī piān-piān ê chāi-sek-lí kah i ji̍p-khì hù hun-iàn, mn̂g chiū koaiⁿ khí-.lâi.
25:11 " Jiân-āu, hiahê khì bé iû ê chāi-sek-lí mā lâi-kàu-ūi, kóng, ' Sin-seⁿ ah, sin-seⁿ ah, chhiáⁿ kā goán khui mn̂g. '
25:12 M̄ koh, sin-lông ìn kóng, ' Góa si̍t-chāi kā lín kóng, góa m̄ bat lín. '
25:13 Só͘-í, tio̍h kín-sīn! In-ūi lín m̄-chai hit-ê ji̍t, hit-ê sî. "
25:14 Saⁿ-ê Lô͘-po̍k ê Phì-jū
( Lk 19: 11-27)
" Thian-kok mā chhin-chhiūⁿ chi̍t-ê lâng beh chhut-mn̂g khì gōa-kok, chiū kiò i ê lô͘-po̍k lâi, kā só͘-ū ê châi-sán kau-tài in.
25:15 I chiàu kok lâng ê châi-tiāu kau gîn-pè hō͘ in. Chi̍t-ê hō͘ i gîn gō͘-chheng, chi̍t-ê hō͘ i nn̄g-chheng, chi̍t-ê hō͘ i chi̍t-chheng. Jiân-āu i chiū chhut-mn̂g khì.
25:16 Hitê niá gō͘-chheng ê, sûi-sî the̍h-khì chò senglí, koh thàn gō͘-chheng.
25:17 Hitê niá nn̄g-chheng ê mā kāng-khoán, koh thàn nn̄g-chheng.
25:18 To̍k-to̍k hit-ê niá chi̍t-chheng ê chhut-khì kā thô͘-kha ó͘ chi̍t khang, lâi kā chú-lâng kau-tài ê gîn-pè tâi khí-.lâi.
25:19 Keng-kòe chin kú, chú-lâng tńg-.lâi, chiū kah in sǹg-siàu.
25:20 Hitê niá gō͘-chheng ê lâi, koh tòa gō͘-chheng, kóng, ' Thâu-ke ah, lí kau-tài góa gō͘-chheng, lí khòaⁿ, góa ū koh thàn gō͘-chheng. '
25:21 Chú-lâng kā i kóng, ' Chin hó, hó koh chīn-tiong ê lô͘-po̍k, lí kì-jiân tī sió-sió ê tāichì chīn-tiong, góa beh phài lí lâi koán-lí tōa ê tāichì. Ji̍p lāi kah góa chò-hóe khoài-lo̍k. '
25:22 Hitê niá nn̄g-chheng ê mā lâi, kóng, ' Thâu-ke, lí kau-tài góa nn̄g-chheng. Lí khòaⁿ, góa ū koh thàn nn̄g-chheng. '
25:23 Chú-lâng kā i kóng, ' Chin hó, hó koh chīn-tiong ê lô͘-po̍k, lí kì-jiân tī sió-sió ê tāichì chīn-tiong, góa beh phài lí lâi koán-lí tōa ê tāichì. Chhiáⁿ ji̍p-lâi kah góa chò-hóe khoài-lo̍k. '
25:24 Chòe-āu, hit-ê niá chi̍t-chheng ê mā lâi, kóng, ' Thâu-ke ah, góa chai lí sī chin khek-po̍k ê lâng, bô iā chéng-chí mā beh siu-koah; bô chèng-choh mā beh siu-sêng.
25:25 Góa chin kiaⁿ, só͘-í, kā lí hit chi̍t-chhìn gîn-pè tâi tī thô͘-kha. Taⁿ lí ê gîn-pè hêng lí. '
25:26 Chú-lâng ìn kóng, ' Pháiⁿ koh pîntōaⁿ ê lô͘-po̍k, lí kì-jiân chai góa bô iā chéng-chí mā beh siu-koah, bô chèng-choh mā beh siu-sêng,
25:27 Lí eng-kai tio̍h kā góa ê gîn-pè kià tī chîⁿ-tiàm, góa tńg-.lâi ê sî thang niá pún-chîⁿ kah lī-sek lâi hêng góa.
25:28 Taⁿ lí tio̍h kā hit chi̍t-chheng kau hō͘ ū chi̍t-bān gîn-pè hit-ê lâng.
25:29 In-ūi ū ê, góa beh hō͘ i chē kah ū chhun; bô ê, liân i só͘-ū ê mā beh kā i chhiúⁿ-.lâi.
25:30 Lín tio̍h kā chit-ê bô lō͘-ēng ê lô͘-po̍k kóaⁿ chhut-.khì gōa-bīn o͘-àm ê só͘-chāi, tī hia i ē thî-khàu, kā-gê chhiat-khí. "
25:31 Chòe-āu ê Sím-phòaⁿ
" Tng Jîn-chú chhōa I ê chèng thiⁿ-sài chài-lîm ê sî, I ē chē tī êng-iāu ê pó-chō,
25:32 Bān pang ē chū-chi̍p tī I ê bīn-chêng. I ē chhin-chhiūⁿ bo̍k-chiá kā mî-iûⁿ kah soaⁿ-iûⁿ hun-khui ánne, kā bān-pang pun-chò nn̄g pêng;
25:33 Kā mî-iûⁿ an-pâi tī I ê chiàⁿ pêng, soaⁿ-iûⁿ tī tò pêng.
25:34 Hit sî, ông ē kā chiàⁿ pêng ê kóng, ' Lín chiahê tùi góa ê Thiⁿ-pē tit tio̍h un-tián ê, chìn-chêng lâi sêng-chiap tùi chhòng-chō ú-tiū í-lâi to̍h ūi lín chún-pī ê kok-tō͘.
25:35 In-ūi góa iau ê sî, lín ū hō͘ góa chia̍h; góa chhùi-ta ê sî, lín ū hō͘ góa lim; góa chhut-gōa chò-kheh, lín ū chiap-thāi góa;
25:36 Góa thǹgpaktheh ê sî, lín ū hō͘ góa chhēng; góa phòa-pēⁿ ê sî, lín ū kā góa khòaⁿ-kò͘; góa tī kaⁿ-.ni̍h, lín ū lâi kā góa thàm-hóng. '
25:37 Hit sî, gī lâng ē ìn I kóng, ' Chú ah, goán tang-sî khòaⁿ tio̍h Lí iau, ū hō͘ Lí chia̍h? Chhùi-ta, ū hō͘ Lí lim?
25:38 Tang-sî khòaⁿ tio̍h Lí chhut-gōa, ū chiap-thāi Lí? Lí thǹgpaktheh, ū hō͘ Lí chhēng?
25:39 Sím-mi̍h sî khòaⁿ tio̍h Lí phòa-pēⁿ á-.sī tī kaⁿ-.ni̍h, goán ū khì kā Lí thàm-hóng? '
25:40 Ông ē ìn kóng, ' Góa si̍t-chāi kā lín kóng, Lín ū ánne hó khoán-thāi góa ê hiaⁿ-tī tiong siōng bî-sè ê chi̍t-ê, to̍h-sī tùi-thāi góa ánne. '
25:41 Jiân-āu ông ē kā tò pêng ê kóng, ' Lín chiahê siū chiù-chó͘ ê lâng, tio̍h lī-khui góa, ji̍p-khì ūi tio̍h Mô͘-kúi kah i ê sù-chiá só͘ chún-pī ê éng-oán ê hóe-.ni̍h.
25:42 In-ūi góa iau ê sî, lín bô hō͘ góa chia̍h; góa chhùi-ta ê sî, lín bô hō͘ góa lim;
25:43 Góa chhut-gōa chò-kheh, lín bô chiap-thāi góa; góa thǹgpaktheh, lín bô hō͘ góa chhēng; góa phòa-pēⁿ kah tī kaⁿ-.ni̍h, lín bô lâi kā góa thàm-hóng. '
25:44 Hit sî, in mā ē ìn kóng, ' Chú ah, goán tang-sî khòaⁿ tio̍h lí iau, á-.sī chhùi-ta, á-.sī chhut-gōa, á-.sī thǹgpaktheh, á-.sī phòa-pēⁿ, á-.sī tī kaⁿ-.ni̍h, bô kā Lí chiàu-kò͘? '
25:45 Ông ē ìn kóng, ' Góa si̍t-chāi kā lín kóng, lín bô ánne hó khoán-thāi góa ê hiaⁿ-tī tiong siōng bî-sè ê chi̍t-ê, to̍h-sī bô ánne tùi-thāi góa. '
25:46 Chiahê lâng ē siū tio̍h éng-oán ê hêng-hoa̍t; m̄ koh, gī lâng ē tit tio̍h éng-oán ê oa̍h-miā. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。