以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
42:1 Sèng-tiān Hù-kīn ê Nn̄g Keng Chhù-the̍h
I chhōa góa chhut-lâi-kàu gōa-īⁿ, koh chhōa góa ji̍p-khì lēng-gōa keh-khui ê tē sio tùi-bīn ê pâng; hit keng pâng ǹg pak, tī chhù-the̍h ê tùi-bīn.
42:2 Tī chi̍t pah tiú tn̂g, gō͘-cha̍p tiú khoah ê thâu-chêng ū pak-mn̂g.
42:3 Sio̍k lāi-īⁿ jī-cha̍p tiú ê tùi-bīn, koh sio̍k gōa-īⁿ pho͘ chio̍h tē ê tùi-bīn, ū lâu ê lông tùi lâu ê lông, saⁿ chàn.
42:4 Tī hiahê pâng ê thâu-chêng ū chi̍t tiâu lō͘, khoah cha̍p tiú, ǹg lāi-bīn chi̍t pah tiú ê lō͘. In ê mn̂g lóng ǹg pak.
42:5 Téng-chàn ê pâng khah e̍h, in-ūi hō͘ lâu ê lông chiàm i ê tē; pí tiong-chàn, ē-chàn chiàm khah chē.
42:6 In-ūi i ū saⁿ chàn, chóng-.sī, bô thiāu, chhin-chhiūⁿ hiahê īⁿ ê thiāu, só͘-í i ê téng-chàn pí tē-pêⁿ ê ē-chàn, tiong-chàn khah e̍h.
42:7 Jî-chhiáⁿ tī gōa-bīn ê pâng ê piⁿ-á, ǹg hit-ê pâng ê thâu-chêng ê gōa-īⁿ, tn̂g gō͘-cha̍p tiú.
42:8 In-ūi gōa-īⁿ chiahê pâng, tn̂g gō͘-cha̍p tiú. Lí khòaⁿ, tiān ê thâu-chêng ū chi̍t pah tiú.
42:9 Tī pâng ê ē-bīn, tùi tang pêng ū ji̍p-khì ê só͘-chāi; to̍h-sī lâng tùi gōa-īⁿ ē-tàng ji̍p-khì hia.
42:10 Ǹg lâm tī īⁿ ê chhiûⁿ ê khoah, tī keh-khui ê só͘-chāi tùi-bīn, mā tī chhù-the̍h ê tùi-bīn, ū hiahê pâng.
42:11 I ê thâu-chêng ū lō͘, in chhin-chhiūⁿ ǹg pak ê pâng ê khoán-sit, tn̂g-khoah lóng sio-kāng; chhut-ji̍p ê só͘-chāi lóng chiàu in ê khoán-sit, mā chiàu in ê mn̂g.
42:12 Chiàu ǹg lâm hiahê pâng ê mn̂g, tī lō͘ ê thâu-chêng ū mn̂g, to̍h-sī tang pêng ê chhiûⁿ bīn-chêng ê lō͘, tī ji̍p-khì ê só͘-chāi.
42:13 I kā góa kóng, " Keh-khui ê só͘-chāi ê thâu-chêng, chiahê pak pêng ê pâng, lâm pêng ê pâng lóng sī sèng ê pâng; chhin-kīn Siōng-chú ê chè-si ē tī hia chia̍h chì-sèng ê mi̍h, mā ēng chì-sèng ê mi̍h, to̍h-sī sò͘-chè, sio̍k-chōe-chè, pó͘ kòe-si̍t ê chè, hē tī hit só͘-chāi, in-ūi chit só͘-chāi sī sèng.
42:14 Chè-si ji̍p-khì ê sî, chiū m̄ thang tùi sèng-só͘ chhut-lâi-kàu gōa-īⁿ; tio̍h tī hia pàng-lo̍h in kiâⁿ chit-hūn ê sî só͘ chhēng ê saⁿ, in-ūi he sī sèng; tio̍h ōaⁿ in ê saⁿ chiah thang kàu sio̍k tī jîn-bîn ê só͘-chāi. "
42:15 Sèng-tiān Sì-kho͘-ûi ê Chhùn-chhioh
I niû lāi chhù liáu-āu, chiū chhōa góa chhut-khì ǹg tang ê mn̂g, niû i ê sì-kho͘-ûi.
42:16 I ēng ko-chhioh niû tang hng, to̍h-sī ēng ko-chhioh niû i ê sì-kho͘-ûi, gō͘-pah ko-chhioh.
42:17 I ēng ko-chhioh niû pak hng, niû i ê sì-kho͘-ûi, gō͘-pah ko-chhioh.
42:18 I ēng ko-chhioh niû lâm hng, gō͘-pah ko-chhioh.
42:19 I oat kàu se hng, ēng ko-chhioh lâi niû, gō͘-pah ko-chhioh.
42:20 I niû i ê sù-hong, sì-kho͘-ûi ū chhiûⁿ, tn̂g gō͘ pah, khoah gō͘ pah, lâi hun-pia̍t sèng ê kah pêng-siông ê.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。