以西結書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
34:1 I-su-la-el ê Bo̍k-chiá
Siōng-chú ê ōe lîm-kàu góa, kóng,
34:2 " Jîn-chú, lí tio̍h soan-pò͘ kong-kek I-su-la-el chiahê bo̍k-chiá, lí tio̍h soan-pò͘ lâi tùi in kóng, chì-koân Siōng-chú tùi chiahê bo̍k-chiá ánne kóng: Ū chai-eh ah! I-su-la-el chiahê bo̍k-chiá in-ūi in iúⁿ-chhī kakī. Bo̍k-chiá kám bô eng-kai iúⁿ-chhī iûⁿ-kûn?
34:3 Lín chia̍h i ê iû, chhēng i ê mn̂g, thâi i ê pûi bah ê mā bô teh iúⁿ-chhī iûⁿ-kûn.
34:4 Loán-jio̍k ê, lín bô kò͘ hō͘ i ióng; phòa-pēⁿ ê, lín bô kā i i-tī; siū-siong ê, lín bô kā i pau; siū kóaⁿ-tio̍k ê, lín bô kā i chhōa tò tńg-.lâi; sit-lo̍h ê, lín bô khì chhōe i; to̍k-to̍k ēng kiông-pō kah giâm-giâm ê koán-hat.
34:5 In-ūi bô bo̍k-chiá, iûⁿ chiū sì-sòaⁿ; sì-sòaⁿ liáu-āu, chiū chiâⁿ-chò só͘-ū iá-siù ê chia̍h-mi̍h.
34:6 Góa ê iûⁿ sì-kè kiâⁿ tī chiahê soaⁿ-.ni̍h, tī ta̍k-ê koân ê soaⁿ téng, sì-sòaⁿ tī choân tē, bô lâng khì jiok, bô lâng khì chhōe.
34:7 " Só͘-í, lín chiahê bo̍k-chiá tio̍h thiaⁿ Siōng-chú ê ōe.
34:8 Chì-koân Siōng-chú kóng: Góa kí Góa ê éng-oán oa̍h-miā lâi chiùchōa, Góa ê iûⁿ in-ūi bô bo̍k-chiá, chiū chiâⁿ-chò siū chhiúⁿ ê mi̍h, iûⁿ mā chò só͘-ū iá-siù ê chia̍h-mi̍h. Góa ê bo̍k-chiá mā bô khì chhōe Góa ê iûⁿ; chiahê bo̍k-chiá in-ūi in iúⁿ-chhī kakī, bô teh iúⁿ-chhī Góa ê iûⁿ.
34:9 Só͘-í, lín chiahê bo̍k-chiá tio̍h thiaⁿ Siōng-chú ê ōe.
34:10 Chì-koân Siōng-chú ánne kóng: Góa kah bo̍k-chiá chò tùi-te̍k, beh tùi in ê chhiú tui-thó Góa ê iûⁿ, hō͘ in bô koh iúⁿ-chhī iûⁿ-kûn; bo̍k-chiá mā bô koh iúⁿ-chhī kakī. Góa beh kiù Góa ê iûⁿ thoat-lī in ê chhùi, bô koh chò in ê chia̍h-mi̍h. "
34:11 Hó Bo̍k-chiá
" In-ūi chì-koân Siōng-chú ánne kóng, lí khòaⁿ, Góa beh pún-sin khì chhōe Góa ê iûⁿ, lâi chhōe kah tio̍h.
34:12 Bo̍k-chiá tī iûⁿ-kûn sì-sòaⁿ ê ji̍t, án-chóaⁿ chhōe i ê iûⁿ, Góa mā beh chhin-chhiūⁿ ánne lâi chhōe Góa ê iûⁿ. Chiahê iûⁿ tī ba̍t hûn o͘-àm ê ji̍t, sì-sòaⁿ kàu ta̍k só͘-chāi, Góa beh tùi hia kā in kiù tò tńg-.lâi.
34:13 Góa beh tùi lia̍t kok tiong kā in chhōa chhut-.lâi, tùi ta̍k kok ê lāi-bīn kā in chū-chi̍p, chhōa in tńg-lâi in ê pún só͘-chāi, mā beh tī I-su-la-el soaⁿ chiahê khe piⁿ, kéng lāi só͘-ū thang tòa ê só͘-chāi lâi kā in iúⁿ-chhī.
34:14 Góa beh tī hó-hó ê chháu-tiûⁿ kā in iúⁿ-chhī, in ê iûⁿ-tiâu ē siat tī I-su-la-el koân ūi ê soaⁿ, in ē tī hó-hó ê iûⁿ-tiâu lāi tó teh khùn, mā ē tī I-su-la-el soaⁿ pûi koh súi ê chháu-tiûⁿ chia̍h chháu.
34:15 Chì-koân Siōng-chú kóng: Góa beh chhin-sin iúⁿ-chhī Góa ê iûⁿ, hō͘ in tó teh khùn.
34:16 " Sit-lo̍h ê, Góa beh khì chhōe i; siū kóaⁿ-tio̍k ê, Góa beh chhōa i tńg-.lâi; siū-siong ê, Góa beh kā i pau; phòa-pēⁿ ê, Góa beh kā i i-tī; chóng-.sī, pûi ê, ióng ê, Góa beh kā i tû-bia̍t, mā beh péng kong kā in iúⁿ-chhī.
34:17 " Góa ê iûⁿ-kûn, kóng tio̍h lín, chì-koân Siōng-chú ánne kóng: Góa beh tī iûⁿ kah iûⁿ ê tiong-kan, kang ê mî-iûⁿ kah kang ê soaⁿ-iûⁿ ê tiong-kan kiâⁿ phòaⁿ-toàn.
34:18 Lí tī hó-hó ê chháu-tiûⁿ chia̍h chháu, kám iáu lia̍h-chò sī sió-khóa tāichì? Chhun lo̍h-.lâi ê chháu, lín kèng-jiân ēng kha thún-ta̍h? Lín lim chheng ê chúi, chhun lo̍h-.lâi ê chúi, lín kèng-jiân ēng kha phah hō͘ i lô?
34:19 Kóng tio̍h Góa ê iûⁿ, in sī chia̍h lín ēng kha ta̍h ê, lim lín ēng kha phah-lô ê.
34:20 " Só͘-í, chì-koân Siōng-chú tùi in ánne kóng: Lí khòaⁿ, Góa pún-sin tī pûi ê iûⁿ kah sán ê iûⁿ ê tiong-kan kiâⁿ phòaⁿ-toàn.
34:21 In-ūi lín ēng seng-khu, ēng keng-kah-thâu kheh in, ēng lín ê kak tak phòa-pēⁿ ê, tì-sú hō͘ in sì-sòaⁿ tī gōa-bīn.
34:22 Só͘-í, Góa beh chín-kiù Góa ê iûⁿ-kûn, bô koh hō͘ in chò siū chhiúⁿ ê mi̍h; Góa mā beh tī iûⁿ kah iûⁿ ê tiong-kan kiâⁿ phòaⁿ-toàn.
34:23 Góa beh siat-li̍p chi̍t-ê bo̍k-chiá lâi chiàu-kò͘ in, i ē kā in iúⁿ-chhī, to̍h-sī Góa ê lô͘-po̍k — Ta-bi̍t. I ē kā in iúⁿ-chhī, chò in ê bo̍k-chiá.
34:24 Góa — Siōng-chú beh chò in ê Siōng-tè, Góa ê lô͘-po̍k — Ta-bi̍t ē tī in ê tiong-kan chò siú-léng. Che sī Siōng-chú kóng ê.
34:25 " Góa beh kah in li̍p pêng-an ê iok, hō͘ ok-siù tùi kéng lāi toān-choa̍t, in chiū ē an-jiân tòa tī khòng-iá, khùn tī chhiū-nâ lāi.
34:26 Góa beh hō͘ in kah Góa ê soaⁿ ê sì-kho͘-ûi ê só͘-chāi chiâⁿ-chò hok-khì ê goân-thâu, Góa mā beh chiàu-sî lo̍h hō͘, beh ū si hok-khì ê tōa hō͘.
34:27 Chhân-iá ê chhiū ē kiat kóe-chí, tē mā ē ū chhut-sán; in ē an-jiân tòa tī pún só͘-chāi. Góa at-tn̄g in só͘ phāiⁿ ê ka-taⁿ, kiù in thoat-lī hit-ê lia̍h in chò lô͘-lē ê lâng ê chhiú; hit sî, in chiū ē chai Góa sī Siōng-chú.
34:28 In bô koh chò gōa-pang lâng só͘ chhiúⁿ ê mi̍h, tē-chiūⁿ ê iá-siù mā bô koh kā in thun-chia̍h; sī beh hō͘ in an-jiân seng-oa̍h, bô lâng ē koh hō͘ in kiaⁿ-hiâⁿ.
34:29 Góa beh kā in heng-khí chi̍t-ê chhut-miâ ê chai-chèng só͘-chāi; in tī kéng lāi bô koh hō͘ ki-hng só͘ bia̍t, mā bô koh siū tio̍h gōa-pang lâng ê lêng-jio̍k.
34:30 In chiū ē chai Góa — Siōng-chú — in ê Siōng-tè sī kah in tông-chāi, mā ē chai in I-su-la-el ê jîn-bîn sī Góa ê chú-bîn. Che sī chì-koân Siōng-chú kóng ê.
34:31 " Lín sī Góa ê iûⁿ, sī Góa chháu-tiûⁿ ê iûⁿ; lín sī lâng, Góa mā sī lín ê Siōng-tè. Che sī chì-koân Siōng-chú kóng ê. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。