耶利米書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
43:1 I-é-lí-miah Hông Lia̍h-khì Ai-gi̍p
I-é-lí-miah tùi chèng lâng kóng chheng-chhó Siōng-chú — in ê Siōng-tè it-chhè ê ōe, to̍h-sī Siōng-chú — in ê Siōng-tè chhe i só͘ kóng it-chhè ê ōe.
43:2 Ho-sia-iah ê kiáⁿ A-cha-lí-ah kah Ka-le-ah ê kiáⁿ Io-ha-nân, í-ki̍p só͘-ū kiau-ngō͘ ê lâng chiū tùi I-é-lí-miah kóng, " Lí kóng pe̍h-chha̍t ōe! Siōng-chú — lán ê Siōng-tè pēng bô chhe lí lâi kóng, ' Lín m̄ thang khì Ai-gi̍p, lâi kià-kha tī hia. '
43:3 Che sī Nê-lé-iù ê kiáⁿ Pa-lo-sih sái-lōng lí lâi hāi goán, beh kā goán kau tī Kal-tí-ah lâng ê chhiú, hō͘ in kā goán thâi-sí, á-.sī kā goán lia̍h khì-kàu Ba-bú-lông. "
43:4 Chiū ánne, Ka-le-ah ê kiáⁿ Io-ha-nân kah só͘-ū kun-tiúⁿ, í-ki̍p chèng lâng m̄ chun-thàn Siōng-chú ê ōe, lâi tòa tī Iô-tah tē.
43:5 Ka-le-ah ê kiáⁿ Io-ha-nân kah só͘-ū ê kun-tiúⁿ, chiū kā chhun lo̍h-.lâi ê Iô-tah lâng, to̍h-sī tùi in siū kóaⁿ khì hiahê kok tńg-lâi beh kià-kha tī Iô-tah tē ê,
43:6 bô-lūn chapo͘ lâng, chabó͘ lâng, gín'á kah ông ê hiahê chabó͘ kiáⁿ, í-ki̍p sī-ōe-tiúⁿ Ne-bu-cha-la-tàn só͘ lâu lâi kau-tài Sia-hóaⁿ ê sun — A-hi-kam ê kiáⁿ Ge-tá-lia̍h ê kûn-chiòng, kah I-é-lí-miah sian-ti, í-ki̍p Nê-lé-iù ê kiáⁿ Pa-lo-sih, lóng lia̍h khì-kàu Ai-gi̍p tē, khì-kàu Ta̍k-pe-neh.
43:7 Che sī in-ūi in m̄ chun-thàn Siōng-chú ê ōe.
43:8 Tī Ta̍k-pe-neh, Siōng-chú ê ōe koh lîm-kàu I-é-lí-miah, kóng,
43:9 " Lí tio̍h ēng chhiú the̍h kúi tè tōa lia̍p chio̍h-thâu, tī Iô-tah lâng ê bīn-chêng khǹg tī thia̍p chng ê hoe-thô͘ lāi, to̍h-sī tī Ta̍k-pe-neh Hôa-láu ê ông-kiong mn̂g hia,
43:10 Kā in kóng, ' Bān-kun ê Siōng-chú — I-su-la-el ê Siōng-tè ánne kóng: Lí khòaⁿ, Góa beh tiàu Góa ê lô͘-po̍k — Ba-bú-lông ông Nep-kat-ne-chal lâi. Tī só͘ khǹg ê chio̍h-thâu téng, Góa beh an-tì i ê pó-chō, i ē tī hit lia̍p chio̍h-thâu téng tah súi ê pò͘-pêⁿ.
43:11 I ē lâi kong-kek Ai-gi̍p tē, eng-kai sí ê chiū sí, eng-kai lia̍h ê chiū siū lia̍h, eng-kai hō͘ to thâi ê chiū hō͘ to thâi.
43:12 Góa mā beh tī Ai-gi̍p hiahê sîn-bêng ê biō khí hóe, i ē ēng hóe sio hiahê biō, kā in lia̍h-.khì; i ē tit tio̍h Ai-gi̍p tē, chhin-chhiūⁿ bo̍k-chiá chhēng i ê saⁿ, tùi hia an-jiân chhut-.khì.
43:13 I it-tēng ē phah-chhùi Ai-gi̍p tē ê Bia̍t-si-mé-si tiau-khek ê thiāu, ēng hóe sio Ai-gi̍p hiahê sîn-bêng ê biō. '"
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。