以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
66:1 Siōng-chú Sím-phòaⁿ Bān-kok
Siōng-chú ánne kóng, " Thiⁿ sī Góa ê chō-ūi, tē sī Góa ê kha-ta̍h-í. Lín beh kā Góa khí siáⁿ-mi̍h khoán ê chhù? Sím-mi̍h khoán ê só͘-chāi sī beh chò Góa an-hioh ê só͘-chāi?
66:2 Chiahê lóng sī Góa ê chhiú só͘ chhòng-chō ê, só͘-í, chiahê chiū lóng ū. Chóng-.sī, Góa só͘ khòaⁿ-kò͘ ê, to̍h-sī hiahê khiam-pi, thòng-hóe kah in-ūi Góa ê ōe lâi phi̍h-phi̍h chhoah ê lâng.
66:3 " In thâi gû, kahná teh thâi lâng; hiàn iûⁿ, kahná teh kòng tn̄g káu ām-kún; hiàn lé-mi̍h, kahná teh hiàn ti-hoeh; sio jú-hiuⁿ, kahná teh oló ngó͘-siōng. In kéng kakī ê tō-lō͘, sim ì-ài in hiahê khó-ò͘ⁿ ê tāichì.
66:4 Só͘-í, góa mā beh kéng ē bê-he̍k in ê tāichì, hō͘ in só͘ kiaⁿ-hiâⁿ ê lîm-kàu in; in-ūi góa kiò, bô lâng ìn; góa kóng-ōe, in bô beh chun-thàn; tian-tò kiâⁿ góa ba̍k-chiu tiong khòaⁿ-chò pháiⁿ ê, kéng góa só͘ bô hoaⁿ-hí ê."
66:5 Lín in-ūi Siōng-chú ê ōe lâi phi̍h-phi̍h chhoah ê lâng, tio̍h thiaⁿ I ê ōe: Lín ê hiaⁿ-tī oàn-hūn lín, koh in-ūi Góa ê miâ lâi kā lín kóaⁿ-chhut ê, bat kóng: Goān Siōng-chú tit tio̍h êng-kng, hō͘ goán ē-tàng khòaⁿ tio̍h lín ê hoaⁿ-hí. Chóng-.sī, in ē tú tio̍h kiàn-siàu.
66:6 Ū soan-hoa ê siaⁿ tùi siâⁿ lāi hoat-chhut! Ū hiáng-siaⁿ tùi tiān lāi hoat-chhut! Chiū-sī Siōng-chú pò-èng I ê tùi-te̍k ê siaⁿ.
66:7 Si-óng iáu-bōe tú tio̍h seⁿ kiáⁿ ê kan-khó͘ chiū seng-sán, iáu-bōe chai thàng-thiàⁿ chiū seⁿ chapo͘ kiáⁿ.
66:8 Chhin-chhiūⁿ chit khoán ê tāichì, siáⁿ lâng bat thiaⁿ-.tio̍h? Chiahê tāichì siáⁿ lâng bat khòaⁿ-.tio̍h? Kok kám ē chi̍t ji̍t to̍h lâi kiàn-li̍p? Jîn-bîn kám ē chi̍t-sî-á to̍h lâi chhut-sì? Chóng-.sī, Si-óng chi̍t-ē tú tio̍h seⁿ kiáⁿ ê kan-khó͘ chiū seⁿ kiáⁿ-jî.
66:9 Góa í-keng hō͘ i lîm-phûn, kám bô beh hō͘ i seⁿ-chhut kiáⁿ-jî? Lí ê Siōng-chú kóng: Góa hō͘ lâng seⁿ kiáⁿ ê, kám ē koaiⁿ-ba̍t i ê thai?
66:10 Lín chiahê thiàⁿ Ê-lú-sa-lèm ê, tio̍h kah i tâng khoài-lo̍k, ūi i hoaⁿ-hí; lín ūi tio̍h i pi-ai ê, taⁿ tio̍h kah i hoaⁿ-hí khoài-lo̍k;
66:11 thang hō͘ lín suh i ê an-ùi ê leng-thâu lâi tit tio̍h pá, hō͘ lín tit tio̍h i hong-sēng ê êng-kng, lâi móa-sim hoaⁿ-hí.
66:12 Siōng-chú ánne kóng, " Lí khòaⁿ, Góa beh hō͘ pêng-an khui-khoah chhin-chhiūⁿ kang-hô kàu tī i; koh hō͘ lia̍t kok ê êng-kng kàu tī i, chhin-chhiūⁿ tiòng móa ê hô. Lín beh hióng-siū i, lín ē hō͘ i phō lâi tī sin piⁿ, tī i ê kha-thâu-u téng iô.
66:13 Chhin-chhiūⁿ lâng tit tio̍h i ê lāu-bú an-ùi, Góa mā beh ánne an-ùi lín; lín mā beh tī Ê-lú-sa-lèm tit tio̍h an-ùi.
66:14 Lín khòaⁿ-.tio̍h, sim chiū khoài-lo̍k; lín ê kut ē tit tio̍h chu-jūn, chhin-chhiūⁿ nńg-nńg ê chháu. Siōng-chú ê chhiú ē hián-hiān hō͘ I ê lô͘-po̍k chai; I mā ē tùi I ê tùi-te̍k siū-khì. "
66:15 Lí khòaⁿ, Siōng-chú ē tī hóe tiong kàng-lîm, I ê chhia chhin-chhiūⁿ kńg-lê-á hong; I ēng tōa siū-khì lâi kiâⁿ pò-èng, ēng hóe-iām kiâⁿ chek-hoa̍t.
66:16 In-ūi Siōng-chú beh ēng hóe, ēng to kah it-chhè ū hia̍t-khì ê lâng cheng-chiàn, jî-chhiáⁿ hō͘ Siōng-chú thâi-sí ê chin chē.
66:17 Siōng-chú kóng, " Hiahê hun-pia̍t chò sèng, chheng-khì kakī ê, chìn-ji̍p tī hn̂g lāi, kin-tòe hit tiong-kan chi̍t-ê lâng ê āu-bīn, chia̍h ti-bah kah khó-ò͘ⁿ ê mi̍h í-ki̍p niáu-chhí, in ē chò-hóe bia̍t-bông. Che sī Siōng-chú kóng ê.
66:18 In-ūi Góa chai in ê hêng-ûi kah in ê liām-thâu. Sî kàu, Góa beh chū-chi̍p bān-bîn bān-cho̍k; in ē lâi, ē khòaⁿ tio̍h Góa ê êng-kng,
66:19 Góa beh Siat kì-hō tī in tiong-kan. " Tô-cháu ê, góa beh chhe in kàu lia̍t kok, to̍h-sī kàu Tal-si-sih, Phu-l, khui kiong ê Lù-t kah Thô͘-bal, Iá-oán kah pêng-sî bô thiaⁿ tio̍h góa ê miâ-siaⁿ, bô khòaⁿ tio̍h góa ê êng-kng ê hn̄g-hn̄g ê tó-sū; in ē kā góa ê êng-kng thoân-pò tī lia̍t kok tiong.
66:20 In beh sàng lín ê chèng hiaⁿ-tī tùi lia̍t kok tiong tò tńg-.lâi, hō͘ in ū ê khiâ bé, ū ê chē chhia, chē kiō, khiâ lô, khiâ lo̍k-tô, kàu Góa ê sèng-soaⁿ Ê-lú-sa-lèm, chiâⁿ-chò lé-mi̍h, hiàn hō͘ Siōng-chú; chhin-chhiūⁿ I-su-la-el lâng ēng chheng-khì ê khì-kū té lé-mi̍h, hiàn tī Siōng-chú ê tiān. Che sī Siōng-chú kóng ê. "
66:21 Siōng-chú kóng, góa beh tùi in tiong-kan chhú lâng lâi chò chè-si, chò Lē-bī lâng."
66:22 Siōng-chú kóng: In-ūi Góa só͘ chō ê sin thiⁿ sin tē, tī Góa ê bīn-chêng kú-tn̂g chûn-chāi; chhin-chhiūⁿ ánne, lín ê kiáⁿ-sun kah lín ê miâ-jī, mā ē kú-tn̂g chûn-chāi.
66:23 Ta̍k pái tú tio̍h goe̍h ê chhe-it, ta̍k pái tú tio̍h An-hioh-ji̍t, kiàn-nā ū hia̍t-khì ê, ē kàu Góa ê bīn-chêng kūi-pài. Che sī Siōng-chú kóng ê. "
66:24 " In ē chhut-khì khòaⁿ hiahê pōe-ge̍k Góa ê lâng ê sin-si; in-ūi in ê thâng bē sí, in ê hóe bē hoa; kiàn-nā ū hia̍t-khì ê lóng ē thó-ià in. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。