以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
65:1 Siōng-chú Têng-hoa̍t Pōe-poān ê Lâng
Siōng-chú kóng, " Pêng-siông sî m̄ bat mn̄g Góa ê, taⁿ Góa hō͘ in mn̄g; iáu-bōe ū chhōe Góa ê, taⁿ Góa hō͘ in tú-.tio̍h; iáu-bōe ū kiû-kiò Góa ê miâ ê, Góa tùi in kóng: Góa tī chia! Góa tī chia!
65:2 Góa kui ji̍t chhun chhiú ǹg hiahê pōe-ge̍k ê jîn-bîn; in chhut-chāi kakī ê ì-sù, kiâⁿ m̄-hó ê lō͘.
65:3 Chiahê jîn-bîn tiāⁿtiāⁿ tng-bīn jiá Góa siū-khì; in tī hn̂g tiong hiàn chè, tī chng-hiā téng sio hiuⁿ;
65:4 in tòa tī bōng lāi, hioh tī ún-ba̍t ê só͘-chāi; in chia̍h ti-bah, in ê khì-kū lāi ū khó-ò͘ⁿ ê mi̍h chò ê thng;
65:5 in koh tùi lâng kóng, ' Lí tio̍h siám-khui! M̄-thang óa-kīn góa, in-ūi góa pí lí khah sèng-kiat. ' Siōng-chú kóng, ' Chiahê lâng sī Góa phīⁿ-khang tiong ê hóe-ian, sī kui ji̍t teh to̍h ê hóe. '
65:6 " Lí khòaⁿ, che lóng siá tī Góa ê bīn-chêng. Góa bô beh tiām-tiām, it-tēng beh kiâⁿ pò-èng, beh tī in ê bīn-chêng kā in pò-èng.
65:7 In-ūi lín ê chōe-ok kah lín ê chó͘-sian ê chōe-ok, tī soaⁿ-.ni̍h sio hiuⁿ, tī niá téng siat-to̍k Góa, só͘-í, Góa beh chiàu in pêng-sî só͘ kiâⁿ ê, tī in ê heng chêng kā in pò-èng. "
65:8 Siōng-chú ánne kóng, " Chhin-chhiūⁿ tī phû-tô pha lāi iáu ū ē-tàng chò chiú, lâng chiū kóng, ' M̄-thang húi-hoāi, in-ūi ū hok-khì tī hit lāi-bīn. ' Só͘-í, ūi tio̍h Góa chiahê lô͘-po̍k ê iân-kò͘, Góa mā beh chiàu ánne lâi kiâⁿ, bô beh kā in choân-pō͘ siau-bia̍t.
65:9 Góa beh tùi Iâ-kop ê tiong-kan chhōa chhut kiáⁿ-sun, tùi Iô-tah ê tiong-kan chhōa chhut sêng-chiap Góa ê chèng soaⁿ ê. Góa kéng ê jîn-bîn beh sêng-chiap i; Góa chiahê lô͘-po̍k beh tī hia tòa.
65:10 Sia-lông beh chiâⁿ-chò chhī iûⁿ ê só͘-chāi, A-kol ê soaⁿ-kok beh chiâⁿ-chò gû-kûn tó teh khùn ê só͘-chāi, lóng sī beh hō͘ cháu-chhōe Góa ê jîn-bîn lâi tit-.tio̍h.
65:11 " Chóng-.sī, lín chiahê pàng-sak Siōng-chú, bē kì-tit Góa ê sèng-soaⁿ, koh kā Ga-t（ Chù, Ba-bú-lông só͘ chông-pài ê hēng-ūn chi sîn ） pān toh, kā Me-nî（ Chù, Ba-bú-lông só͘ chông-pài ê miā-ūn chi sîn ）Koàn-tiān tiâu-hô ê chiú ê,
65:12 Góa beh hō͘ lín chù tiāⁿ tio̍h kui tī to hā, lóng ē khut-sin siū thâi; in-ūi Góa kiò, lín bô ìn; Góa kóng-ōe, lín bô chun-thàn; tian-tò kiâⁿ Góa ba̍k-chiu tiong khòaⁿ-chò pháiⁿ ê, kéng Góa só͘ bô hoaⁿ-hí ê. "
65:13 Só͘-í, chì-koân Siōng-chú ánne kóng: Lí khòaⁿ, Góa ê lô͘-po̍k beh chia̍h, m̄ koh, lín ē iau; lí khòaⁿ, Góa ê lô͘-po̍k beh lim, m̄ koh, lín ē chhùi-ta; lí khòaⁿ, Góa ê lô͘-po̍k beh hoaⁿ-hí, m̄ koh, lín ē kiàn-siàu.
65:14 Lí khòaⁿ, Góa ê lô͘-po̍k in-ūi sim khoài-lo̍k chhut hoaⁿ-hí ê siaⁿ, m̄ koh, lín ē in-ūi sim iu-chhiû ai-khàu, koh in-ūi sim-sîn iu-siong ai-háu.
65:15 Lín ē lâu lín ê miâ, hō͘ Góa kéng ê chú-bîn kí i lâi chiù-chó͘. Chì-koân Siōng-chú beh thâi lín, m̄ koh, beh lēng-gōa ēng sin ê miâ lâi chheng I ê lô͘-po̍k.
65:16 Án-ne, tī tē-chiūⁿ ūi kakī kiû hok-khì ê, ē ǹg chin-si̍t ê Siōng-chú kiû hok-khì; tī tē-chiūⁿ chiùchōa ê, ē kí chin-si̍t ê Siōng-chú lâi chiùchōa. In-ūi chá-chêng ê hoān-lān í-keng bē kì-.tit, mā tī Góa ê ba̍k-chiu chêng khàm ba̍t."
65:17 Sin ê Chhòng-chō
Siōng-chú kóng, " Lí khòaⁿ, Góa chhòng-chō sin thiⁿ sin tē, í-chêng ê tāichì bô koh ē kì-tit, mā bô koh tui-sióng.
65:18 Lín tio̍h in-ūi Góa só͘ chhòng-chō ê lâi éng-oán hoaⁿ-hí khoài-lo̍k; in-ūi Góa chhòng-chō Ê-lú-sa-lèm, hō͘ i chò hoaⁿ-hí ê, chhòng-chō i ê jîn-bîn, hō͘ in hoaⁿ-hí khoài-lo̍k.
65:19 Góa beh in-ūi Ê-lú-sa-lèm lâi hoaⁿ-hí, in-ūi Góa ê chú-bîn lâi khoài-lo̍k; kî-tiong it-tēng bô koh thiaⁿ tio̍h thî-khàu ê siaⁿ kah ai-háu ê siaⁿ;
65:20 kî-tiong it-tēng bô koh ū kúi-ji̍t-á to̍h sí-.khì ê eⁿ-á, mā bô ū hòe-siū bô boán-chiok ê lāu lâng; in-ūi chi̍t pah hòe sí ê, iáu sǹg sī gín'á, chi̍t pah hòe sí ê chōe-jîn, iáu koh sī siū chiù-chó͘ ê.
65:21 In beh khí chhù, kakī tòa; beh chai-chèng phû-tô hn̂g, lâi chia̍h i ê kóe-chí.
65:22 In bô beh khí-chō, hō͘ pa̍t lâng lâi tòa; in bô beh chai-chèng, hō͘ pa̍t lâng lâi chia̍h; in-ūi Góa ê chú-bîn ê ji̍t-chí ē chhin-chhiūⁿ chhiū ê ji̍t-chí; Góa kéng ê chú-bîn chhin-chhiú lô-khó͘ tit tio̍h ê, beh kú-tn̂g hióng-siū.
65:23 In it-tēng bô khang-khang lô-khó͘, só͘ seⁿ ê mā bô tú tio̍h chai-hāi, in-ūi in lóng sī tit tio̍h Siōng-chú sù-hok ê lâng ê kiáⁿ-sun; in ê kiáⁿ-sun mā beh kah i ū hūn.
65:24 In iáu-bōe kiû-kiò, Góa chiū kā i ìn; in tútú teh kóng ê sî, Góa chiū thiaⁿ-.tio̍h.
65:25 Chhâi-lông beh kah iûⁿ-ko chò-hóe chia̍h, sai beh chia̍h chháu chhin-chhiūⁿ gû; thô͘-soa hún beh chò chôa ê chia̍h-mi̍h. Tī Góa ê sèng-soaⁿ choân tē, lóng bô sún-siong, bô chân-hāi. Che sī Siōng-chú kóng ê. "
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。