以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
62:1 Ê-lú-sa-lèm ê Êng-hôa
Góa in-ūi Si-óng ê iân-kò͘ it-tēng bô beh tiām-tiām, in-ūi Ê-lú-sa-lèm ê iân-kò͘ it-tēng bô beh hioh-khùn, it-ti̍t kàu i ê kong-gī chhin-chhiūⁿ kng teh hoat-chhut, i ê chín-kiù chhin-chhiūⁿ teng teh to̍h.
62:2 Lia̍t kok ē khòaⁿ tio̍h lí ê kong-gī; lia̍t ông ē khòaⁿ tio̍h lí ê êng-kng. Lí ē hông chheng-ho͘ sin ê miâ, to̍h-sī Siōng-chú chhin-chhùi só͘ chheng-ho͘ ê.
62:3 Lí ē chiâⁿ-chò Siōng-chú chhiú tiong súi ê ông-koan, chiâⁿ-chò Siōng-chú chiáng tiong ê bián-liû.
62:4 Lí bô koh hông kiò-chò " Siū khì-sak-.ê", lí ê tē mā bô koh hông kiò-chò " Pha-hng ê". Lí ē hông kiò-chò " Góa só͘ hoaⁿ-hí ê", lí ê tē mā ē hông kiò-chò " Ū tiōng-hu ê". In-ūi Siōng-chú kah-ì lí, lí ê tē mā ē chiâⁿ-chò ū tiōng-hu ê.
62:5 In-ūi chhin-chhiūⁿ siàu-liân lâng chhōa chāi-sek-lí, lí ê jîn-bîn mā beh ánne chhōa lí; chhin-chhiūⁿ sin-lông kah-ì sin-niû, lí ê Siōng-chú mā beh ánne kah-ì lí.
62:6 Ê-lú-sa-lèm, Góa tī lí ê siâⁿ téng siat-li̍p siú-bōng ê lâng, in kui ji̍t kui mê bô tiām-tiām. Khún-kiû Siōng-chú ê, lín m̄ thang hioh-khùn,
62:7 mā m̄ thang hō͘ I hioh-khùn, it-ti̍t kàu I kiàn-li̍p Ê-lú-sa-lèm, hō͘ Ê-lú-sa-lèm tī tē-chiūⁿ chiâⁿ-chò thang oló ê.
62:8 Siōng-chú kí kakī ê chiàⁿ chhiú kah tōa koân-lêng ê chhiú-kut chiùchōa kóng: Góa it-tēng bô koh kā lí ê ngó͘-kok hō͘ lí ê tùi-te̍k chò chia̍h-mi̍h, gōa-pang lâng mā bô koh lim lí só͘ lô-khó͘ lâi tit tio̍h ê sin chiú.
62:9 To̍k-to̍k hiahê siu-koah ê beh tit tio̍h chia̍h pá lâi oló Siōng-chú; hiahê siu-chi̍p phû-tô ê ē tī Góa sèng-só͘ ê īⁿ lāi lim chiú.
62:10 Lín tio̍h tùi siâⁿ mn̂g keng-kòe, chún-pī jîn-bîn ê lō͘; thūn koân-tōa lō͘, tû-khì chio̍h-thâu, ūi tio̍h lia̍t kok khiā tōa kî.
62:11 Lí khòaⁿ, Siōng-chú bat thoân-pò kàu tē-ke̍k, kóng: Lín tio̍h kā Si-óng ê jîn-bîn kóng: Lí khòaⁿ, lí ê chín-kiù lâi ā. Lí khòaⁿ, I ê siúⁿ-sù tī I hia, I ê pò-tap tī I ê bīn-chêng.
62:12 Lâng ē kā in chheng-chò " Sèng ê chú-bîn ", kā in kiò-chò " Siōng-chú só͘ sio̍k-hôe ê"; lí mā ē hông kiò-chò " Chhōe tio̍h ê, bô siū pàng-sak ê siâⁿ ".
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。