Lí khòaⁿ, Siōng-chú ê chhiú m̄-sī té, bē tàng chín-kiù; hīⁿ-khang m̄-sī tāng, bē tàng thiaⁿ. 59:2 Sī lín ê chōe-kò hō͘ lín kah Siōng-chú keh-tn̄g, lín ê chōe-ok hō͘ I tùi lín am bīn, bô beh thiaⁿ. 59:3 In-ūi lín ê chhiú bak tio̍h hoeh, lín ê chéng-thâu-á bak tio̍h chōe-ok, lín ê chhùi-tûn kóng pe̍h-chha̍t, lín ê chi̍h kóng-chhut pháiⁿ ōe. 59:4 Bô lâng ēng kong-gī lâi pín-bêng, bô lâng chiàu sêng-si̍t lâi piān-hō͘; lóng sī óa-khò hi-ké, kóng pe̍h-chha̍t. In só͘ hoâi-īn ê sī chân-hāi, só͘ seⁿ ê sī chōe-gia̍t. 59:5 In pū to̍k-chôa ê nn̄g, keⁿ ti-tu ê bāng; lâng chia̍h i ê nn̄g it-tēng ē sí. Chit-ê nn̄g nā ta̍h phòa, it-tēng ē chhut ok-chôa. 59:6 In só͘ keⁿ ê bāng bē tàng chiâⁿ-chò saⁿ-khò͘; in só͘ chò ê bē tàng kakī jia-khàm. In só͘ kiâⁿ ê lóng sī chōe-ok, in ê chhiú só͘ chò ê lóng sī kiông-pō. 59:7 In ê kha cháu lâi kiâⁿ pháiⁿ, in kóaⁿ-kín beh lâu bô chōe ê lâng ê hoeh; in ê liām-thâu lóng sī chōe-gia̍t ê liām-thâu; só͘ keng-kòe ê tōa lō͘, lóng sī pha-hng húi-bia̍t ê lō͘. 59:8 Pêng-an ê lō͘ in m̄-chai; in só͘ kiâⁿ ê lō͘-kèng bô ū kong-pêⁿ. In ūi tio̍h pún-sin chō oan-khiau ê lō͘; kiàn-nā chiàu ánne kiâⁿ ê, lóng m̄-chai pêng-an. 59:9
Jîn-bîn Jīn Chōe Hóe-kái
In-ūi ánne, kong-pêⁿ lī-khui goán hn̄g-hn̄g, kong-gī jiok goán bē tio̍h. Goán ǹg-bāng kng, tian-tò sī tit tio̍h o͘-àm, ǹg-bāng kng-bêng, tian-tò kiâⁿ tī o͘-àm tiong. 59:10 Goán bong chhiûⁿ, óa piah, chhin-chhiūⁿ chheⁿmê-.ê; goán sì-kè bong, chhin-chhiūⁿ bô ba̍k-chiu ê lâng. Goán tī ji̍t-tiong-tàu ê sî tian-tian tó-tó, chhin-chhiūⁿ hông-hun ê sî hit khoán; goán tī ióng-chòng ê lâng ê tiong-kan, ná chhin-chhiūⁿ sí-lâng. 59:11 Goán chhin-chhiūⁿ hîm teh háu, chhin-chhiūⁿ pan-kah teh haiⁿ-haiⁿ kiò; ǹg-bāng kong-pêⁿ, chóng-.sī, lóng chhōe bô; ǹg-bāng kiù-un, chóng-.sī, i lī-khui goán hn̄g-hn̄g. 59:12 Siōng-chú ah, goán ê kòe-sit tī Lí ê bīn-chêng ke-thiⁿ chin chē, chōe-ok chò kiàn-chèng teh kò goán; goán ê chōe-kò kah goán tông-chāi; kóng tio̍h goán ê chōe-kò, goán lóng chai, 59:13 to̍h-sī pōe-ge̍k m̄-jīn Siōng-chú, oa̍t tńg-sin m̄-tòe goán ê Siōng-tè, kóng-chhut chè-ap kah pōe-ge̍k ê ōe; sim siūⁿ pe̍h-chha̍t ōe, chiū sòa kóng chhut-.khì. 59:14 Jî-chhiáⁿ kong-pêⁿ thè-āu, kong-gī khiā tī hn̄g-hn̄g; sêng-si̍t poa̍h-tó tī ke-lō͘, chèng-ti̍t mā bē tàng chìn ji̍p-.lâi. 59:15Sêng-si̍t chió-chió; lī-khui pháiⁿ ê lâng, tian-tò chiâⁿ-chò siū chhiúⁿ ê mi̍h.