以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
57:1 I-su-la-el Lâng Pài Ngó͘-siōng Siū Khián-chek
Gī lâng sí-bông, bô lâng khòa tī sim-thâu; khiân-sêng ê lâng kòe-sin, bô lâng siūⁿ tio̍h chit-ê gī lâng kòe-sin sī beh thoat-lī chiong-lâi ê chai-hō.
57:2 Kiâⁿ tī chèng-ti̍t ê lâng, i ē chìn-ji̍p pêng-an ê só͘-chāi, an-jiân hioh tī i ê chhn̂g.
57:3 Lín chiahê ang-î ê kiáⁿ, kan-hu kah ki-lí ê chéng-lūi, lóng tio̍h chìn-chêng lâi.
57:4 Lín tùi siáⁿ lâng hì-lāng, tùi siáⁿ lâng khui chhùi thò͘ chi̍h? Lín kám m̄-sī pōe-ge̍k ê kiáⁿ-jî, pe̍h-chha̍t ê chéng-lūi?
57:5 Lín tī siōng chhiū ê tiong-kan, tī ta̍k châng chheⁿ-chhùi ê chhiū kha, io̍k-hóe kong sim; tī soaⁿ-kok-.ni̍h, tī chio̍h-khang lāi thâi lín ê gín'á.
57:6 Tī soaⁿ-kok lāi, kng-ku̍t ê chio̍h-thâu tiong, ū lí ê hūn-gia̍h. Chiahê to̍h-sī lí só͘ tit tio̍h ê sán-gia̍p; lí mā tùi i koàn-tiān, hiàn lé-mi̍h. In-ūi chiahê tāichì, Góa kám ē an-sim?
57:7 Lí tī koân-koân ê soaⁿ téng an-tì bîn-chhn̂g, mā tńg-khì hiàn chè.
57:8 Lí tī mn̂g-āu, mn̂g-kheng āu, khiā lí ê kì-liām; tùi pa̍t lâng lō͘-hiān seng-khu, chiūⁿ-khì lí khui-khoah ê bîn-chhn̂g kah in li̍p-iok; lí tī hia khòaⁿ tio̍h in ê bîn-chhn̂g, chiū chin ì-ài.
57:9 Lí kā iû tòa kàu ông hia, koh ke-thiⁿ lí ê phang-liāu, chhe sù-chiá khì hn̄g-hn̄g ê só͘-chāi, kakī pi-chiān, it-ti̍t kàu im-kan.
57:10 Lí in-ūi lō͘ hn̄g ià-siān, chóng-.sī, lí bô kóng: Che sī khang-khang; lí ū koh tit tio̍h khùi-la̍t, só͘-í, lí bē kám-kak loán-jio̍k.
57:11 Lí in-ūi siáⁿ lâng lâi lún-neh, kiaⁿ-hiâⁿ, tì-sú kóng pe̍h-chha̍t, bē kì-tit Góa, mā bô khòa tī lí ê sim-thâu? Góa kám m̄-sī tùi kó͘-chá to̍h tiām-tiām, lí chiah ē m̄-kiaⁿ Góa?
57:12 Góa beh chí-bêng lí ê kong-gī; kóng tio̍h lí ê só͘ kiâⁿ, tùi lí lóng bô lī-ek.
57:13 Lí tōa-siaⁿ hoah ê sî, thang hō͘ lí só͘ chū-chi̍p ê lâi kiù lí! Hong ē kā in chhoe sòaⁿ; khùi ē kā in pûn-.khì. Chóng-.sī, hit-ê óa-khò Góa ê ē tit tio̍h thó͘-tē, beh sêng-siū Góa ê sèng-soaⁿ chò sán-gia̍p.
57:14 Siōng-chú Èng-ín Pang-chō͘ kah I-tī
Ū siaⁿ kóng: " Thūn koân, thūn koân, chún-pī lō͘, tùi Góa ê jîn-bîn ê lō͘ tiong tû-khì chó͘-gāi.
57:15 " In-ūi hit-ê chì-koân chì-chun, éng-oán tī-.leh, miâ kiò-chò sèng ê, ánne kóng: Góa tòa tī chì-koân chì-sèng ê só͘-chāi, mā kah sim-sîn thòng-hóe khiam-pi ê lâng chò-hóe tòa, beh hō͘ khiam-pi ê lâng ê sim-sîn koh-oa̍h, mā hō͘ thòng-hóe ê lâng ê sim koh-oa̍h.
57:16 Góa it-tēng bô éng-oán cheng-piān, mā bô kú-tn̂g siū-khì, in-ūi khióng-kiaⁿ Góa só͘ chhòng-chō ê lâng, in ê sim kah lêng-hûn tī Góa ê bīn-chêng soe-lám.
57:17 In-ūi i tham-sim ê chōe-kò, Góa chiū siū-khì kā i phah; Góa am bīn siū-khì, i iû-goân pōe-ge̍k, chiàu i ê sim-ì khì kiâⁿ.
57:18 " Góa ū khòaⁿ tio̍h i só͘ kiâⁿ ê lō͘, mā beh kā i i hó, koh beh chhōa i, hō͘ i kah hiahê chò-hóe siong-sim ê lâng koh tit tio̍h an-ùi.
57:19 Góa chō in ê chhùi, beh hō͘ in kóng-chhut oló ê ōe; pêng-an kah hok-khì kui hō͘ hn̄g kah kīn ê lâng, Góa koh beh kā i i hó. Che sī Siōng-chú kóng ê.
57:20 To̍k-to̍k pháiⁿ lâng chhin-chhiūⁿ giâ éng ê hái, bē tàng pêng-chēng; i ê chúi chhèng-chhut ù-òe kah thô͘-môe.
57:21 Góa ê Siōng-tè kóng: Pháiⁿ lâng it-tēng bē pêng-an.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。