以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
56:1 Siōng-chú Èng-ín Gōa-pang lâng Chiâⁿ-chò I ê Chú-bîn
Siōng-chú ánne kóng, " Lín tio̍h siú kong-pêⁿ, kiâⁿ kong-gī; in-ūi Góa ê kiù-un í-keng kīn, Góa ê kong-gī beh hián-bêng.
56:2 Siú An-hioh-ji̍t bô khì pōe-ge̍k-.tio̍h, kìm-chí kakī ê chhiú bô chò pháiⁿ; ánne kiâⁿ, ánne chhî-siú ê, hit khoán lâng ū hok-khì. "
56:3 Kah Siōng-chú liân-ha̍p ê gōa-pang lâng m̄ thang kóng: " Siōng-chú it-tēng kā góa kah I ê chú-bîn hun-lī." Thài-kàm mā m̄ thang kóng, " Lí khòaⁿ, góa sī ta-.khì ê chhiū. "
56:4 In-ūi kiàn-nā siú Góa chiahê An-hioh-ji̍t, kéng Góa só͘ hoaⁿ-hí ê tāichì, koh chhî-siú Góa ê iok ê thài-kàm, Siōng-chú ánne kóng:
56:5 " Chiahê lâng, Góa beh hō͘ in tī Góa ê chhù, tī Góa ê chhiûⁿ-ûi lāi, ū kì-hō, ū miâ-jī, pí ū kiáⁿ-jî khah hó; Góa beh hō͘ i éng-oán ê miâ, bē kā i chián-tû. "
56:6 Iáu ū hiahê kah Siōng-chú kiat-liân ê gōa-pang lâng, in beh ho̍k-sāi I, beh thiàⁿ Siōng-chú ê miâ, beh chò I ê lô͘-po̍k; to̍h-sī siú An-hioh-ji̍t bô pōe-ge̍k, koh chhî-siú Góa ê iok ê lâng.
56:7 Siōng-chú kóng, " Góa beh chhōa in lâi-kàu Góa ê sèng-soaⁿ, hō͘ in tī Góa ê chhù kî-tó lâi hoaⁿ-hí. In ê sio-chè kah lé-mi̍h tī Góa ê tôaⁿ téng, it-tēng tit tio̍h chiap-la̍p, in-ūi Góa ê chhù beh kiò-chò bān-bîn kî-tó ê chhù. "
56:8 Chì-koân Siōng-chú, to̍h-sī chio-chi̍p I-su-la-el siū kóaⁿ-sòaⁿ ê, I kóng, " Hiahê siū chio-chi̍p ê lâng í-gōa, Góa iáu beh chio-chi̍p pa̍t lâng lâi kui-óa i."
56:9 I-su-la-el ê Léng-siù Siū Khián-chek
Soaⁿ-iá chiahê siù lóng tio̍h lâi thun-chia̍h, chhiū-nâ lāi chiahê siù mā tio̍h ánne.
56:10 I ê siú-bōng ê lâng sī chheⁿmê, lóng bô tì-sek, lóng sī é-káu, bē pūi ê káu; in kantaⁿ tó-.leh, bîn-bāng, ài khùn.
56:11 Chiahê káu tham-chia̍h, m̄-chai pá. Chiahê bo̍k-chiá bē tàng bêng-pe̍k, ta̍k lâng kiâⁿ kakī ê phian lō͘, ta̍k-ê tùi kok hong-bīn kiû kakī ê lī-ek.
56:12 In kóng, lâi à! Góa khì phâng chiú, lán lim kāu chiú kàu chùi; bîn-á-chài ē chhin-chhiūⁿ kin-á-ji̍t, iàn-lo̍k ke̍k tōa bô pí.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。