以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
52:1 Siōng-chú beh Chín-kiù Ê-lú-sa-lèm
Si-óng, khí-.lâi! Khí-.lâi! Chhēng lí ê tōa khùi-la̍t; sèng-siâⁿ Ê-lú-sa-lèm, chhēng lí súi ê saⁿ-khò͘; in-ūi tùi taⁿ í-āu, bô siū kat-lé kah bô chheng-khì ê, it-tēng bô koh ji̍p-khì lí ê tiong-kan.
52:2 Ê-lú-sa-lèm, tio̍h pōaⁿ-khì tîn-ai! Khí-lâi chē! Si-óng siū lia̍h ê jîn-bîn, tio̍h tháu-khui lí ām-kún ê só-liān.
52:3 Siōng-chú ánne kóng: Lín siū bē, bô the̍h lâng ê chîⁿ, tit tio̍h sio̍k-hôe, mā bô ēng chîⁿ.
52:4 Chì-koân Siōng-chú ánne kóng: Khí-thâu Góa ê chú-bîn lo̍h-khì Ai-gi̍p, tī hia kià-kha, koh ū A-siul lâng bô-iân bô-kò͘ kā in ap-chè.
52:5 Siōng-chú kóng: Góa ê chú-bîn kì-jiân bô-iân bô-kò͘ hō͘ lâng lia̍h-.khì, taⁿ Góa tī chia teh chò siáⁿ-mi̍h? Siōng-chú kóng: Kā in koán-hat ê lâng hōa-hōa háu teh kiò, Góa ê miâ kui ji̍t siū siat-to̍k.
52:6 Só͘-í, Góa ê chú-bîn ē chai Góa ê miâ; kàu hit ji̍t in ē chai teh kóng ê to̍h-sī Góa; lí khòaⁿ, sī Góa!
52:7 Pò hó siau-sit, thoân hô-pêng, pò hok-khì ê hó siau-sit, thoân kiù-un ê, i tùi Si-óng kóng: Lí ê Siōng-tè chò ông à! I ê kha chiūⁿ soaⁿ téng, i ê kha-jiah kàu chiah súi!
52:8 Lí thiaⁿ, lí só͘ siú-bōng ê lâng ê siaⁿ! In chhut tōa-siaⁿ, chò-hóe chhiùⁿ koa; in-ūi Siōng-chú tò tńg-lâi Si-óng ê sî, in ē tng-thâu tùi-bīn khòaⁿ-.tio̍h.
52:9 Ê-lú-sa-lèm pha-hng ê só͘-chāi, lí tio̍h chhut hoaⁿ-hí ê siaⁿ, chò-hóe chhiùⁿ koa; in-ūi Siōng-chú an-ùi I ê chú-bîn, kiù-sio̍k Ê-lú-sa-lèm.
52:10 Siōng-chú tī bān-kok ê ba̍k-chiu chêng kā I sèng-chhiú ê chhiú-ńg lu̍t khí-.lâi; tē-ke̍k ê lâng lóng khòaⁿ tio̍h lán ê Siōng-tè ê chín-kiù.
52:11 Lín tio̍h lī-khui! Lī-khui! Tùi hia chhut-.lâi. M̄-thang bong bô chheng-khì ê mi̍h; tùi in tiong-kan chhut-.lâi. Lín kng Siōng-chú khì-kū ê lâng, tio̍h kakī chheng-khì.
52:12 Lín chhut-.lâi ê sî, m̄-bián tio̍h-kip, mā m̄-bián tô-cháu. In-ūi Siōng-chú it-tēng kiâⁿ tī lín ê thâu-chêng, I-su-la-el ê Siōng-tè it-tēng chò lín āu-bīn ê pó-hō͘.
52:13 Siū khó͘ ê Po̍k-jîn
Lí khòaⁿ, Góa ê lô͘-po̍k beh ēng tì-hūi chò tāichì, beh siū kí-khí seng koân, koh beh chiâⁿ-chò chin koân.
52:14 Chin chē lâng ūi lí tio̍h-kiaⁿ kah gāng-.khì, i ê bīn-māu pí pa̍t lâng khah ū sún-siong, i ê hêng-chōng pí sè-kan lâng khah ū sún-hāi.
52:15 Chhin-chhiūⁿ ánne, i mā beh kek-tōng chin chē kok ê jîn-bîn; lia̍t ông beh tùi i lâi am in ê chhùi. In-ūi só͘ m̄ bat tùi in kóng ê, in ē khòaⁿ-.tio̍h; m̄ bat thiaⁿ-.tio̍h ê, in ē bêng-pe̍k.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。