以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
47:1 Ba-bú-lông ê Sím-phòaⁿ
Ba-bú-lông ê chāi-sek-lí, lín tio̍h lo̍h-lâi chē tī tîn-ai! Kal-tí-ah ê chabó͘ gín'á, lín bô pó-chō, tio̍h chē tī thô͘-kha; in-ūi lí bô koh hông kiò-chò nńg-chiáⁿ, iù-siù ê.
47:2 Lí tio̍h ēng chio̍h-bō bō be̍h; tû-khì lí ê phè, thǹg lí ê tn̂g-saⁿ, lō͘-hiān lí ê kha-thúi, liâu kòe khe.
47:3 Lí ê ē-sin ē lō͘-hiān, lí ê kiàn-siàu ē hō͘ lâng khòaⁿ-.tio̍h. Góa beh pò-siû; bô beh khoan-iông jīm-hô lâng.
47:4 Kiù-sio̍k goán ê Chú, I ê miâ sī bān-kun ê Siōng-chú, sī I-su-la-el ê sèng ê.
47:5 Kal-tí-ah ê chabó͘ gín'á, lí tio̍h tiām-tiām chē, ji̍p-khì tī àm-tiong, in-ūi lí bô koh hông kiò-chò lia̍t kok ê chú-bó.
47:6 Góa siū-khì Góa ê jîn-bîn, Góa hō͘ Góa ê sán-gia̍p siū lêng-jio̍k, kā in kau tī lí ê chhiú, lí lóng bô liân-bín in, kā lí ke̍k tāng ê ka-taⁿ hē tī lāu lâng ê sin chiūⁿ.
47:7 Lí kakī kóng: Góa beh éng-oán chò chú-bó, só͘-í, lí bô kā chiahê tāichì khòa tī sim-.ni̍h, mā bô siūⁿ i ê kiat-kio̍k.
47:8 Lí chit-ê iàn-lo̍k, an-jiân teh chē ê lâng, taⁿ tio̍h thiaⁿ chit-ê ōe. Lí sim-lāi siūⁿ kóng: Chí-ū góa, góa í-gōa bô pa̍t-ê. Góa it-tēng bē tì-sú chiú-kóaⁿ, mā bē tú tio̍h kiáⁿ sí-sit ê tāichì.
47:9 Chóng-.sī, kiáⁿ sí-sit kah chiú-kóaⁿ chit nn̄g kiāⁿ sū, ū chi̍t ji̍t, tī ba̍k-nih-kú ê tiong-kan ē lîm-kàu lí; tī lí kiâⁿ chin chē siâ-su̍t, tōa-tōa ōe hû liām chiù ê sî, chit nn̄g hāng tāichì ē choân-pō͘ lîm-kàu lí.
47:10 Lí pêng-sî óa-khò lí ê pháiⁿ, kóng: Bô lâng khòaⁿ tio̍h góa. Lí ê tì-hūi chhong-bêng bê-he̍k lí, lí sim-lāi koh siūⁿ kóng: Chí-ū góa, góa í-gōa bô pa̍t-ê.
47:11 In-ūi ánne, chai-hō ē lîm-kàu lí, lí m̄-chai i tùi tó-ūi lâi; chai-hāi kàu tī lí, lí mā bē tàng kā i tû-.khì; lí só͘ m̄-chai ê húi-bia̍t mā ē hut-jiân lîm-kàu lí.
47:12 Tio̍h khiā khí-.lâi! Ēng lí ê siâ-su̍t kah lí chin chē ê hû-chiù, to̍h-sī tùi lí siàu-liân só͘ lô-khó͘ ha̍k-si̍p ê, kiámchhái ē tit tio̍h lī-ek, á-.sī tit tio̍h khah iâⁿ.
47:13 Lí ê kè-ōe siuⁿ chē, tì-sú ià-siān. Taⁿ tio̍h hō͘ hiahê koan thiⁿ-siōng ê, khòaⁿ chheⁿ-sîn ê, tī goe̍h-chhe kóng ī-giân ê, lóng khí-.lâi, kiù lí thoat-lī só͘ beh lîm-kàu lí ê tāichì.
47:14 Lí khòaⁿ, in ē chhin-chhiūⁿ chháu-á hō͘ hóe sio, bē tàng kiù kakī thoat-lī hóe-iām ê ui-le̍k; che m̄-sī thang hang sio ê hóe-thòaⁿ, mā m̄-sī thang chē tī i ê bīn-chêng ê hóe.
47:15 Lí só͘ lô-khó͘ ha̍k-si̍p ê tāichì, tùi lí lâi kóng lóng ē chhin-chhiūⁿ ánne; tùi lí siàu-liân ê sî to̍h kah lí chò senglí ê mā ta̍k lâng tńg-khì i ê pún só͘-chāi, bô lâng lâu lo̍h-lâi kiù lí.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。