以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
46:1 Be-l（ chù, Ba-bú-lông lâng ê chi̍t-ê chú-iáu sîn-bêng ）khut-lo̍h-.khì, Ne-bó（ chù, chi̍t-ê Ba-bú-lông lâng ê sîn-bêng, chiáng-koán ha̍k-si̍p kah bûn-jī ）phak lo̍h-.khì; in ê ngó͘-siōng tô tī siù kah chengseⁿ ê téng-bīn; lín pêng-sî só͘ kng ê, taⁿ chiâⁿ-chò tāng-tàⁿ, hō͘ ià-siān ê chengseⁿ teh chài.
46:2 In lóng chò chi̍t-ē phak lo̍h-.khì, khut-lo̍h-.khì, bē tàng kò͘ in ê tāng-tàⁿ, in pún-sin mā hō͘ lâng lia̍h-.khì.
46:3 Iâ-kop ke, I-su-la-el ê chú-bîn só͘-ū iáu chhun lo̍h-.lâi ê, tio̍h thiaⁿ Góa ê ōe: Lín tùi chhut-sì chiū hō͘ Góa āiⁿ, tùi chhut thai chiū hō͘ Góa phō.
46:4 Sīm-chì kàu lín nî lāu, Góa iû-goân sī ánne; sīm-chì kàu lín thâu-mn̂g pe̍h, Góa iû-goân beh chiàu-kò͘ lín. Góa í-keng chō lín, mā beh ióng-io̍k lín; Góa beh phāiⁿ lín, mā beh kiù lín.
46:5 Lín beh ēng siáⁿ lâng kah Góa sio-pí, kah Góa pêng-téng, thang kah Góa pí-phēng, hō͘ goán sio-kāng?
46:6 Ū lâng tùi tē-á lāi piàⁿ-chhut kim, ēng thian-phêng chhìn gîn, koh chhiàⁿ gîn-chhiūⁿ chè-chō sîn-pu̍t, jiân-āu in phak-lo̍h, koh kā i kūi-pài.
46:7 In kā i kng tī keng-kah-thâu téng, tòa-khì chhāi tī i ê só͘-chāi, i chiū tiāⁿtiāⁿ khiā-.leh; i bô lī-khui i ê pún ūi; lâng kiû-kiò i, i bē tàng ìn, mā bē kiù lâng thoat-lī hoān-lān.
46:8 Lín tio̍h siàu-liām chit-ê tāichì, kakī chò tāi-tiōng-hu; pōe-ge̍k ê lâng, tio̍h ēng sim lâi siūⁿ.
46:9 Lín tio̍h tui-liām siōng kó͘-chá ê tāichì. In-ūi góa sī Siōng-tè, í-gōa bô pa̍t-ê; góa sī Siōng-tè, mā bô pa̍t-ê kah góa ē pí-.tit.
46:10 Góa tùi khí-thâu to̍h chí-bêng lō͘-bóe ê tāichì, tùi kó͘-chá to̍h chí-bêng iáu-bōe chiâⁿ ê tāichì. Góa kóng: Góa ê kè-ōe it-tēng khiā chāi, kiàn-nā Góa só͘ hoaⁿ-hí ê, Góa ē kā i chiâⁿ.
46:11 Góa tiàu eng-chiáu tùi tang-hong lâi, tiàu hit-ê chiâⁿ Góa ê kè-ōe ê lâng tùi hn̄g-hn̄g ê só͘-chāi lâi. Góa í-keng kóng-chhut ê, it-tēng ē kā i chiâⁿ; Góa í-keng tiāⁿ tio̍h ê, mā it-tēng ē chò hō͘ i chiâⁿ.
46:12 Lín chiahê ngē-sim koh lī-khui kong-gī ê lâng, lín tio̍h thiaⁿ Góa ê ōe.
46:13 Góa beh hō͘ Góa ê kong-gī kīn-óa, it-tēng bô lī-khui hn̄g-hn̄g. Góa ê kiù-un it-tēng bô iân-chhiân; Góa beh si kiù-un tī Si-óng, mā beh si Góa ê êng-kng tī I-su-la-el.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。