以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
45:1 Ko-le-si ê Sù-bēng
Góa — Siōng-chú só͘ boah iû ê Ko-le-si （ Chù, cheng-ho̍k Ba-bú-lông ê Phel-siah ông; tē-it-ê hā-lēng ín-chún siū lia̍h I-su-la-el lâng hôe Ê-lú-sa-lèm ê Phel-siah ông. ）, Góa khan i ê chiàⁿ chhiú, hō͘ lia̍t kok khut-ho̍k tī i ê bīn-chêng. Góa mā beh tháu lia̍t ông ê io-tòa, hō͘ siâⁿ mn̂g khui tī i ê bīn-chêng, jî-chhiáⁿ chiahê mn̂g it-tēng bô koaiⁿ.
45:2 Góa tùi i ánne kóng: Góa beh kiâⁿ tī lí ê bīn-chêng, siu pêⁿ khâm-khia̍t ê tē. Góa beh phah-phòa tâng ê mn̂g, chám-tn̄g thih ê mn̂g-chhòaⁿ.
45:3 Góa beh kā ún-chông ê pó-bu̍t kah ún-ba̍t ê châi-pó siúⁿ-sù hō͘ lí, hō͘ lí chai kiò lí ê miâ tiàu lí ê to̍h-sī Góa — Siōng-chú, I-su-la-el ê Siōng-tè.
45:4 In-ūi Góa ê lô͘-po̍k Iâ-kop, Góa só͘ kéng ê I-su-la-el ê iân-kò͘, Góa chiū kiò lí ê miâ tiàu lí; lí sûi-jiân m̄ bat Góa, Góa ū chheng lí ê miâ.
45:5 Góa sī Siōng-chú, tī Góa í-gōa bô ū pa̍t-ê, tû Góa í-gōa bô ū chin-sîn. Lí sûi-jiân m̄ bat Góa, Góa beh kā lí hâ io.
45:6 Tùi ji̍t chhut, mā tùi ji̍t lo̍h ê só͘-chāi, hō͘ lâng lóng chai tû Góa í-gōa bô ū pa̍t-ê. Góa sī Siōng-chú, tī Góa í-gōa bô ū pa̍t-ê.
45:7 Góa chō kng, mā chhòng-chō àm; Góa chō pêng-an, mā chhòng-chō chai-hō; chiahê lóng sī Góa — Siōng-chú só͘ chò ê.
45:8 Chiahê thiⁿ ah, tùi téng-bīn lâi tih, tùi kiong-chhong kàng-lo̍h kong-gī; tē-bīn li̍h-.khui, seⁿ-chhut kiù-un, hō͘ kong-gī chò chi̍t-ē hoat-seng. Góa — Siōng-chú bat chhòng-chō i.
45:9 Chhòng-chō kah Le̍k-sú ê Chú-cháiⁿ
Ū chai-eh ah, hit-ê kah chō i ê Chú kè-kàu ê! I put-kò sī tē-chiūⁿ hiā-phìⁿ tiong ê chi̍t tè hiā-phìⁿ; thô͘ kám thang tùi chhiau-thô͘ ê lâng kóng, " Lí teh chò siáⁿ-mi̍h? " Á-sī lí só͘ chò ê mi̍h kám thang kóng, " I bô chhiú "?
45:10 Ū chai-eh ah, hit-ê tùi lāu-pē kóng, " Lí só͘ seⁿ ê sī siáⁿ-mi̍h? " Á-sī tùi lāu-bú kóng, " Lí só͘ io ê sī siáⁿ-mi̍h? "ê lâng!
45:11 I-su-la-el ê sèng ê, to̍h-sī chō i ê Siōng-chú ánne kóng: Chiong-lâi ê tāichì lín thang mn̄g Góa; kóng tio̍h Góa chiahê kiáⁿ, í-ki̍p Góa ê chhiú só͘ chò ê, lín thang kau-tài Góa.
45:12 Góa chō tē, mā chhòng-chō lâng tī tē-chiūⁿ; Góa chhin-chhiú thián-khui chiahê thiⁿ, thiⁿ-téng ê bān-siōng mā sī Góa só͘ bēng-lēng ê.
45:13 Góa chiàu kong-gī heng-khí Ko-le-si, koh beh siu-ti̍t i it-chhè ê lō͘; i beh khí-chō Góa ê siâⁿ, tháu-pàng Góa siū lia̍h ê chú-bîn, m̄-sī ūi tio̍h kè-chîⁿ, mā m̄-sī ūi tio̍h pò-siúⁿ. Che sī bān-kun ê Siōng-chú kóng ê.
45:14 Siōng-chú ánne kóng: Ai-gi̍p lô-khó͘ tit tio̍h ê, Kú-si̍t ê châi-lī kah Se-bah ê tōa-hàn lâng, lóng ē kui lí, sio̍k lí, koh tòe lí. In ē kòa thih-liān lâi kui lí, phak-pài tī lí ê bīn-chêng kiû lí, kóng: Siōng-chú chin-chiàⁿ tī lín tiong-kan; chit-ê í-gōa bô pa̍t-ê, jî-chhiáⁿ bô pa̍t-ê chin-sîn.
45:15 Kiù-chú — I-su-la-el ê Siōng-tè ah, Lí si̍t-chāi sī kakī ún-ba̍t ê Siōng-tè.
45:16 Hiahê tiau-khek ngó͘-siōng ê lóng ē làu-khùi kiàn-siàu; in lóng ē chò chi̍t-ē kiàn-siàu.
45:17 Chóng-.sī, I-su-la-el ē tit tio̍h kiù, Siōng-chú ē ēng éng-oán ê kiù-un lâi kiù in. Lín it-tēng bô kiàn-siàu, mā bô làu-khùi, ti̍t-kàu éng sè-tāi bô soah.
45:18 In-ūi Siōng-chú sī chhòng-chō chiahê thiⁿ ê, I chin-chiàⁿ sī Siōng-tè; I chō tē lâi kā i oân-sêng, koh kā i kian-kò͘, m̄-sī khang-khang chō ê, sī chhòng-chō i lâi hō͘ lâng tòa ê. I ánne kóng: Góa sī Siōng-chú, í-gōa bô pa̍t-ê.
45:19 Góa bô tī ún-ba̍t á-.sī tī o͘-àm ê só͘-chāi lâi kóng; Góa m̄ bat tùi Iâ-kop ê kiáⁿ-sun kóng, " Lín chhōe Góa bô chhái-kang ". Góa — Siōng-chú só͘ kóng ê sī kong-gī, só͘ thoân ê sī chèng-ti̍t.
45:20 Sè-kài ê Chú kah Ba-bú-lông ê Ngó͘-siōng
Lín tùi lia̍t kok tô-thoat ê lâng, lín tio̍h chò-tīn lâi, chò-hóe óa-.lâi. Hiahê kng tiau-khek ngó͘-siōng ê chhâ, kî-kiû bē tàng kiù lâng ê sîn-bêng ê, lóng bô tì-sek.
45:21 Lín tio̍h soan-pò͘, hō͘ i chìn-chêng lâi, hō͘ in tāi-ke chham-siông; siáⁿ lâng tùi kó͘-chá to̍h chí-bêng chit-ê? Siáⁿ lâng tùi chá-chêng to̍h soan-pò͘ chit-ê? Kám m̄-sī Góa — Siōng-chú? Góa í-gōa bô koh ū chin-sîn; Góa sī kong-gī ê Siōng-tè, koh sī Kiù-chú; Góa í-gōa bô pa̍t-ê.
45:22 Tē-ke̍k ê lâng lóng tio̍h gióng-bōng Góa lâi tit tio̍h kiù; in-ūi Góa sī Siōng-chú, bô koh ū pa̍t-ê.
45:23 Góa kí kakī lâi chiùchōa, Góa ê chhùi chiàu kong-gī kóng-chhut chit-ê ōe, choa̍t-tùi bô koh siu tò-tńg, chèng lâng ê kha-thâu-u ē ǹg Góa lâi kūi-pài, chèng lâng ê chhùi ē chí Góa lâi chiùchōa.
45:24 Ū lâng gī-lūn Góa, kóng: Kong-gī, lêng-le̍k, to̍k-to̍k chāi tī Siōng-chú; lâng lóng beh kui-óa I. Só͘-ū siū-khì I ê, it-tēng ē kiàn-siàu.
45:25 I-su-la-el ê kiáⁿ-sun lóng ē in-ūi Siōng-chú lâi tit tio̍h chheng-chò gī, mā beh khoa-kháu.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。