以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
44:1 Siōng-chú Sī Ûi-it ê Siōng-tè
Siōng-Chú kóng: Góa ê lô͘-po̍k Iâ-kop, Góa só͘ kéng ê I-su-la-el, taⁿ lí tio̍h thiaⁿ.
44:2 Chō-sêng lí koh tùi thai-.ni̍h chō-chiū lí, mā beh pang-chān lí ê Siōng-chú ánne kóng: Góa ê lô͘-po̍k Iâ-kop, Góa só͘ kéng ê E-siu-lûn, m̄-bián kiaⁿ.
44:3 In-ūi Góa beh kā chúi piàⁿ hō͘ chhùi-ta ê lâng, ēng hô chúi koàn-ak ta tē. Góa beh kā Góa ê sîn kàng-lo̍h tī lí ê kiáⁿ-sun, kā Góa ê hok-khì kàng-lo̍h tī lí ê āu-tāi.
44:4 In ē chhin-chhiūⁿ chúi tiong teh seng-tióng ê chheⁿ-chháu, chhin-chhiūⁿ khe piⁿ ê liú-chhiū.
44:5 Chit-ê beh kóng: Góa sī sio̍k Siōng-chú ê; hit-ê beh ēng Iâ-kop ê miâ kakī chheng-ho͘, koh ū chit-ê beh chhin-chhiú siá: Kui tī Siōng-chú ê, mā beh ēng I-su-la-el ê miâ chheng-ho͘ kakī.
44:6 Siōng-chú, I-su-la-el ê ông, kiù-sio̍k ê Chú — bān-kun ê Siōng-chú ánne kóng: Góa sī khí-thâu ê, Góa sī lō͘-bóe ê; Góa í-gōa bô ū chin-sîn.
44:7 Tùi Góa siat-li̍p kó͘-chá ê jîn-bîn hit sî khí, siáⁿ lâng chhin-chhiūⁿ Góa ē-tàng soan-kò, ē-tàng kóng bêng, ē-tàng ī-giân? Kiò i kā chiong-lâi ê tāichì kah beh chiâⁿ ê tāichì kóng bêng!
44:8 Lín m̄-bián lún, mā m̄-bián kiaⁿ; Góa kám m̄-sī tùi kó͘-chá to̍h kóng bêng, kā lí chí-sī? Koh ū lín sī Góa ê kiàn-chèng! Góa í-gōa kám ū pa̍t-ê chin-sîn? Si̍t-chāi bô koh ū kî-tha ê chio̍h-pôaⁿ, Góa m̄ bat ū pa̍t-ê.
44:9 Hi-ké ê Ngó͘-siōng
Tiau khek ngó͘-siōng ê lâng choân-pō͘ lóng sī khang-hi; in só͘ hoaⁿ-hí ê lóng bô lī-ek; in ê kiàn-chèng-jîn bô khòaⁿ-.tio̍h, mā m̄-chai pòaⁿ-hāng, tì-sú hō͘ in kiàn-siàu.
44:10 Siáⁿ lâng chè-chō sîn-pu̍t, chù-chō bô lī-ek ê ngó͘-siōng?
44:11 Lí khòaⁿ, i ê tâng-phōaⁿ lóng ē kiàn-siàu. Kang-chhiūⁿ put-kò sī lâng, chhut-chāi in chū-hōe, chhut-chāi in khiā-.leh; in lóng ē kiaⁿ-hiâⁿ, chò-hóe kiàn-siàu.
44:12 Thih-chhiūⁿ chō pó͘-thâu, ēng hóe-thòaⁿ toàn-liān, ēng thûi kā i phah, ēng i ū la̍t ê chhiú lâi tûi, tì-sú pak-tó͘ iau bô la̍t; bô lim chúi lâi ià-siān.
44:13 Ba̍k-chhiūⁿ khan chîn-sòaⁿ, ēng pit lâi ōe, ēng lāi to lâi khek, ēng îⁿ-chhioh ōe bô͘, hóng lâng ê hêng, chò chhin-chhiūⁿ lâng ê súi, hō͘ i tiàm tī chhù lāi.
44:14 I chhò pek-hiuⁿ chhiū, koh chhú la̍t chhiū kah siōng chhiū. I tī chhiū-nâ lāi kéng tiāⁿ tio̍h chi̍t châng, á-.sī chai-chèng chhêng chhiū, tit tio̍h hō͘-chúi koàn-ak tōa châng.
44:15 Chit khoán chhiū, lâng ēng lâi hiâⁿ hóe hang sio, koh sio lâi piak piáⁿ, mā chng sîn-pu̍t lâi kūi-pài, koh khek ngó͘-siōng lâi kha̍p-thâu pài.
44:16 I ēng chi̍t hūn sio tī hóe-.ni̍h, ēng chi̍t hūn chú bah lâi chia̍h, piak bah lâi chia̍h pá, koh kakī hang sio kóng, " Ah-hah, góa hang sio ā, góa kìⁿ tio̍h hóe à. "
44:17 I ēng chhun lo̍h-.lâi ê chng chi̍t sian sîn-pu̍t, to̍h-sī tiau-khek ê ngó͘-siōng. I phak lo̍h-lâi kā i pài, tùi i kî-tó kóng, " Kiû lí kiù góa, in-ūi lí sī góa ê sîn-bêng. "
44:18 In m̄-chai, mā bē hiáu siūⁿ, in-ūi i kô͘ in ê ba̍k-chiu, hō͘ in khòaⁿ bē tio̍h; that-ba̍t in ê sim, hō͘ in bē bêng-pe̍k.
44:19 Bô lâng bêng-pe̍k, mā bô tì-sek, bô chhong-bêng, bē hiáu kóng, " Góa bat the̍h chi̍t hūn tī hóe-.ni̍h sio, tī hóe-thòaⁿ téng piak piáⁿ, sio bah lâi chia̍h; chit-ê chhun lo̍h-.lâi ê, góa kám thang chò khó-ò͘ⁿ ê mi̍h? Góa kám thang tùi chhâ-thâu kha̍p-pài? "
44:20 I ēng hóe-hu chò chia̍h-mi̍h, i ê sim hun-bê, hō͘ i phian-siâ, i bē tàng kakī kiù, mā bē tàng kóng, " Góa ê chiàⁿ chhiú lāi kám m̄-sī ū pe̍h-chha̍t? "
44:21 Siōng-chú Sī Chhòng-chō ê Chú-cháiⁿ
Siōng-chú kóng: Iâ-kop, I-su-la-el, in-ūi lí sī Góa ê lô͘-po̍k, tio̍h ē kì-tit chiahê tāichì; I-su-la-el, lí sī Góa ê lô͘-po̍k, Góa chō-chiū lí, it-tēng bô bē kì-tit lí.
44:22 Góa chhat-siau lí ê kòe-sit, chhin-chhiūⁿ ba̍t hûn siau-sòaⁿ; Góa chhat-siau lí ê chōe-ok, chhin-chhiūⁿ po̍h hûn siau-sit-.khì. Lí tio̍h kui-ǹg Góa, in-ūi Góa kiù-sio̍k lí.
44:23 Chiahê thiⁿ, eng-kai tio̍h chhiùⁿ koa, in-ūi Siōng-chú í-keng kā i chò-chiâⁿ. Tē ê chhim ê só͘-chāi, eng-kai chhut hoaⁿ-hí ê siaⁿ; chiahê soaⁿ eng-kai chhut siaⁿ chhiùⁿ koa; chhiū-nâ kah kî-tiong só͘-ū ê chhiū lóng tio̍h ánne. In-ūi Siōng-chú ū kiù-sio̍k Iâ-kop, mā beh tī I-su-la-el tit tio̍h êng-kng.
44:24 Tùi thai-.ni̍h chō-chiū lí ê, kiù-sio̍k lí ê Siōng-chú ánne kóng, " Góa — Siōng-chú sī chō-sêng bān-mi̍h ê, sī kakī thián-khui chiahê thiⁿ, khui-khoah tāi-tē ê, siáⁿ lâng kah Góa tông-chāi?
44:25 Góa hō͘ kóng ké-ōe ê tiāu-thâu bô kong-hāu, hō͘ chiam-pok ê lâng tian-kông; hō͘ tì-hūi ê lâng thè-āu, hō͘ i ê tì-sek piàn-chò gû-gōng;
44:26 hō͘ Góa ê lô͘-po̍k ê ōe èng-giām, Góa ê sù-chiá ê kè-ōe tit tio̍h chiâⁿ. Kóng tio̍h Ê-lú-sa-lèm, Góa kóng: Tek-khak ū lâng tī hia tòa; kóng tio̍h Iô-tah ê siâⁿ, Góa kóng: Tek-khak ē siū khí-chō; pha-hng ê só͘-chāi Góa beh hō͘ i heng-khí.
44:27 Góa tùi chhim-ian kóng: Lí tio̍h ta-.khì, Góa mā beh hō͘ lí ê kang-hô ta-ta-.khì.
44:28 Koan-hē Ko-le-si, Góa kóng: I sī Góa só͘ ēng ê bo̍k-chiá, ē chiâⁿ Góa só͘ hoaⁿ-hí ê. Koan-hē Ê-lú-sa-lèm, Góa chiū kóng: I ē siū khí-chō, sèng-tiān ê tē-ki mā ē kiàn-li̍p.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。