以賽亞書 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
38:1 Hi-che-kia Ông Phòa-pēⁿ kah Khong-ho̍k
( LOH 20: 1-11; LTH 32: 24-26)
Hiahê ji̍t ê tiong-kan, Hi-che-kia phòa-pēⁿ teh beh sí. A-mô͘-su ê kiáⁿ — I-sá-iah sian-ti khì kìⁿ i, tùi i kóng, " Siōng-chú ánne kóng: Lí tio̍h siat-hoat lí ê ka-sū, in-ūi lí teh beh sí, bē oa̍h à. "
38:2 Hi-che-kia chiū oa̍t tńg-sin, bīn ǹg piah, tùi Siōng-chú kî-tó, kóng,
38:3 " Siōng-chú ah, kiû Lí kì-liām góa tī Lí ê bīn-chêng án-chóaⁿ chûn oân-choân ê sim, chiàu sêng-si̍t lâi kiâⁿ, koh chò Lí só͘ khòaⁿ-chò hó ê. " Hi-che-kia chiū tōa-siaⁿ thî-khàu.
38:4 Chiū ánne, Siōng-chú ê ōe lîm-kàu I-sá-iah kóng,
38:5 " Lí khì kā Hi-che-kia kóng, ' Lí ê chó͘-sian Ta-bi̍t ê Siōng-tè — Siōng-chú ánne kóng: Góa í-keng thiaⁿ tio̍h lí ê kî-tó, khòaⁿ tio̍h lí ê ba̍k-sái. Lí khòaⁿ, Góa beh ke-thiⁿ lí ê hòe-siū cha̍p-gō͘ nî.
38:6 Góa koh beh kiù lí kah chit-ê siâⁿ thoat-lī A-siul ông ê chhiú, mā beh pó-hō͘ chit-ê siâⁿ. '"
38:7 I-sá-iah kóng, " Siōng-chú ē chiâⁿ I só͘ kóng ê. Che sī Siōng-chú beh hō͘ lí ê tiāu-thâu:
38:8 Lí khòaⁿ, A-khà-chuh ê ji̍t-kui tòe ji̍t chìn-chêng ê iáⁿ, góa beh hō͘ i thè-āu cha̍p tō͘. " Chiū ánne, chìn-chêng ê ji̍t-iáⁿ kó-jiân tī ji̍t-kui ê téng-bīn thè-āu cha̍p tō͘.
38:9 Iô-tah ông Hi-che-kia phòa-pēⁿ í-keng hó, chiū chò si, kóng:
38:10 Góa kóng, tútú tī góa tiong-liân ê ji̍t, góa tio̍h ji̍p im-kan ê mn̂g, bē tit thang hióng-siū góa iáu chhun lo̍h-.lâi ê nî-ji̍t.
38:11 Góa kóng: Góa bē kìⁿ tio̍h Siōng-chú, to̍h-sī tī oa̍h-lâng ê tē, bē kìⁿ tio̍h Siōng-chú, góa bē tàng kah tiàm tī tē-chiūⁿ ê jîn-bîn chò-hóe khòaⁿ lâng ê bīn.
38:12 Góa tòa ê só͘-chāi siū chhian-sóa lī-khui góa, chhin-chhiūⁿ kò͘ iûⁿ ê lâng ê pò͘-pêⁿ ánne; góa kā sèⁿ-miā kńg khí-.lâi kah chit pò͘ ê lâng kńg pò͘ sio-siâng. I beh kā góa tùi pò͘-kui-thâu chián-tn̄g; tùi chá-khí kàu ê-hng, Siōng-chú it-ti̍t siūⁿ beh kiat-sok góa ê sèⁿ-miā.
38:13 Góa hō͘ kakī an-chēng kàu thiⁿ-kng; I chhin-chhiūⁿ sai at-tn̄g góa só͘-ū ê kut-thâu, tùi chá-khí kàu ê-hng, Siōng-chú it-ti̍t siūⁿ beh kiat-sok góa ê sèⁿ-miā.
38:14 Góa chhin-chhiūⁿ ìⁿ-á, chhin-chhiūⁿ pe̍h-ho̍h, gí-bú gí-ngiáu, koh chhin-chhiūⁿ pan-kah ai-kiò; góa in-ūi gia̍h thâu khòaⁿ, ba̍k-chiu ba̍k-hîn. Siōng-chú ah, góa siū ap-chè, kiû Lí ūi góa choh pó.
38:15 Góa ū siáⁿ-mi̍h thang kóng? I kā góa kóng ê, mā ū kā góa chiâⁿ; góa in-ūi sim-lāi ê khó͘-to̍k, tī it-seng ê nî-ji̍t beh ûn-ûn-á kiâⁿ.
38:16 Chú ah, lâng tit tio̍h oa̍h sī chāi tī Lí, góa ê sim-sîn oa̍h-.leh, mā lóng sī ánne; só͘-í, kiû Lí hō͘ góa koh hó khí-.lâi, iû-goân oa̍h-.leh!
38:17 Lí khòaⁿ, góa siū chin tōa ê kan-khó͘, sī ūi tio̍h beh hō͘ góa tit tio̍h pêng-an; Lí in-ūi thiàⁿ góa ê lêng-hûn, chiū kiù góa thoat-lī bia̍t-bông ê hām-kheⁿ, in-ūi Lí kā góa só͘-ū ê chōe hiat tī Lí ê kha-chiah-phiaⁿ āu.
38:18 In-ūi im-kan bē tàng kám-siā Lí, sí-bông bē tàng oló Lí; lo̍h hûn-bōng ê lâng bē tàng ǹg-bāng Lí ê sêng-si̍t.
38:19 Chí-ū oa̍h-lâng, oa̍h-lâng beh kám-siā Lí, chhin-chhiūⁿ góa kin-á-ji̍t teh kám-siā Lí; chò lāu-pē ê beh hō͘ kiáⁿ-jî chai Lí ê sêng-si̍t.
38:20 Siōng-chú piān-piān beh kiù góa, só͘-í, goán chāi-seⁿ ê ji̍t beh tī Siōng-chú ê tiān, ēng si-hiân ê ga̍k-khì, chhiùⁿ góa ê si-koa.
38:21 I-sá-iah bat kóng, tio̍h the̍h chi̍t tè bû-hoa-kó piáⁿ, lâi tah tī liàp-á, ông chiū tit tio̍h i hó.
38:22 Hi-che-kia mā bat kóng: Góa beh chiūⁿ Siōng-chú ê tiān, ū siáⁿ-mi̍h tiāu-thâu?
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。